فوتو: ۇوك
ءاليا يۋسۋپوۆانىڭ ايتۋىنشا, تورەشىلەر تاراپىنا تۇسىرگەن شاعىم وڭ ناتيجە بەرمەگەن.
«ەلجانا تانيەۆا وتە ەڭبەكقور سپورتشى. ول ءوزىنىڭ العاشقى وليمپياداسىنا قاتىسىپ, كەرەمەت اسەر الىپ وتىر. جاقسى ناتيجە كورسەتتى دەپ ويلايمىن. بىراق ۇرشىق جاتتىعۋى ءۇشىن وتە از ۇپاي بەردى. تانيەۆا دوپپەن جاتتىعۋدا ورەسكەل قاتە جىبەرىپ, دوپتى قولىنان ءتۇسىرىپ الدى. ال ۇرشىق جاتتىعۋىن وتە تازا ورىنداپ شىقتى. ءبىر قىزىعى, تورەشىلەر تازا ورىندالعان ۇرشىق جاتتىعۋىنا دوپتان دا تومەن ۇپاي بەردى. مەن بىردەن تورەشىلەرگە شاعىم ءتۇسىردىم. الايدا, ولار شاعىمدى قاناعاتتاندىرعان جوق. نەلىكتەن مۇنداي تومەن ۇپاي قويعانىن تۇسىنبەدىم», دەدى اليا يۋسۋپوۆا.
باس باپكەر شاكىرتىنىڭ دايىندىقتاعى تاسپاسىن جارىس كەزىندە پايدالانۋعا رۇقسات بەرمەۋى دە كەدەرگى كەلتىرگەنىن جەتكىزدى.
«جارىسقا ءبىر كۇن قالعاندا بىزدە تاعى ءبىر جاعداي بولدى. ەلجانانىڭ تاسپاسىندا Road to Paris دەگەن جازۋ بار ەدى. ۇيىمداستىرۋشىلار ءبىر كۇن قالعاندا مۇنداي جازۋى بار تاسپامەن جارىسقا جىبەرىلمەيتىنىن ايتتى. ال سپورتشىلار ءۇشىن ۇستالعان, دايىندالعان قۇرالمەن ونەر كورسەتۋ وتە ماڭىزدى. تاڭەرتەڭ دۇكەننەن سۋ جاڭا تاسپا ساتىپ الدىق. بىراق بۇل تاسپا دا جاڭا بولعاندىقتان, دۇرىس ۇشقان جوق. سودان الەم چەمپيونى, يتاليالىق سوفيا رافاەلليدەن ءبىر تاسپا سۇراپ الدىق. سول ءۇشىن راقمەت ايتامىز وعان», دەدى اليا يۋسۋپوۆا.
ول ەلجانا تانيەۆانىڭ لوس-اندجەلەستەگى وليمپيادا ويىندارىنا قاتىسۋعا نيەتتى ەكەنىن دە تىلگە تيەك ەتتى.
ايتا كەتەيىك, ەلجانا تانيەۆا كوپسايىس قورىتىندىسى بويىنشا 13- ورىنعا تۇراقتادى. ءتورت جاتتىعۋ قورىتىندىسى بويىنشا 126.600 ۇپاي جينادى. بۇل كورسەتكىش كوركەم گيمناستشىنىڭ جۇلدەگە تالاسۋىنا جەتكىلىكسىز بولدى.
