سۋرەتتى تۇسىرگەن – سەرىك ماەمەروۆ
قازىرگى تاڭدا اقتاۋ قالاسىن جان-جاقتى دامىتۋ ماسەلەسى تالقىلانىپ, ۇسىنىستار تىڭدالىپ, ماماندار تاراپىنان ساراپقا سالىنىپ جاتىر. جەرگىلىكتى اتقارۋشى بيلىك تۇرعىندار مەن تۋريستەرگە قولايلى جاعداي جاساۋ ءۇشىن وبلىس ورتالىعىن سوڭعى ۇردىستەرگە ساي كوركەيتۋ باعىتىن باستى نازارعا العان.
ماڭعىستاۋ وبلىسىندا ءوڭىر باسشىسى نۇرداۋلەت قيلىباي وتاندىق جانە شەتەلدىك جوبالاۋ كومپانيالارى وكىلدەرىمەن بىرگە پرەزيدەنت تاپسىرماسىنا وراي اقتاۋدىڭ ۋربانيستيكالىق دامۋ جوسپارىن تالقىلادى. باسقوسۋدا تۇركيا, بەلارۋس, قازاقستاننىڭ بەلگىلى ساۋلەتشىلەرى اقتاۋ قالاسىنداعى تەڭىز جاعالاۋىن اباتتاندىرۋ, قايتا قالپىنا كەلتىرۋ, دامىتۋ باعىتىنداعى ەرەكشە جوبالارىن ۇسىندى. جوبالاۋ كومپانيالارىنىڭ وكىلدەرى «سامال» شاعىن اۋدانىنان باستاپ «سولدات جاعالاۋىنا» دەيىنگى ارالىققا زاماناۋي ۇلگىدە ساياباق, سپورت الاڭدارىن, بىركەلكى ستيلدە پاۆيلوندار, قۇرعاق سۋبۇرقاق, اشىق قوعامدىق باسسەين مەن پيرس سالۋدى جوسپارلاپ وتىر. سونىمەن قاتار ولار تۋريستەردىڭ مەكەنىنە اينالعان اقتاۋدى ۇلتتىق ناقىشتا ايشىقتاپ, قازاقى قۇندىلىقتى تانىتۋ ماقساتىندا «اۋەندى دومبىرا» اتتى ءۇشساتىلى مونۋمەنت پەن «پارۋس» كىرەبەرىس ستەللاسىن ورناتۋدى ۇسىندى.
«اقتاۋ ەلىمىزدەگى دامۋ مەن مادەنيەتتىڭ, سونداي-اق ۇلتتىڭ تاريحي بايلىعىنىڭ تەڭىز جاعاسىنداعى شىنايى كورىنىسى بولۋى كەرەك. بۇل جۇمىستا وي مەن قيالدى, ءبىلىم مەن شەبەرلىكتى توعىستىرا وتىرىپ, اقتاۋدىڭ اجارىن ارتتىرامىز. تىڭ يدەيالار مەن ۇسىنىستار ءالى دە ساراپقا سالىنىپ, ەڭ ۇزدىك دەگەن جوبالار ىرىكتەلەدى», دەگەن وبلىس اكىمى ن.قيلىباي قالا قۇرىلىسىنا جاۋاپتى تۇلعالار مەن ساۋلەتشىلەرگە ۇسىنىلعان جوبالاردى جيناقتاپ, اقتاۋدى كوركەيتۋدىڭ تۇجىرىمداماسىن جاساۋدى تاپسىردى.
تۋريستەر كوپ كەلەتىن ماڭعاز ماڭعىستاۋداعى بىرەگەي قالا, تەڭىز جاعالاۋىنداعى جالعىز قالا – اقتاۋدىڭ اجارى مەملەكەتتىڭ مەرەيى, مادەنيەت پەن تازالىقتىڭ, سونداي-اق ۇلتتىق ءدىلىمىزدىڭ كورىنىسى بولۋى قاجەت-اق.
ماڭعىستاۋ وبلىسى
