«قاراعاندى اكادەميالىق مۋزىكالىق كومەديا تەاترىمەن جىل سايىنعى ارىپتەستىك ءبىز ءۇشىن ءداستۇر بولىپ قانا قويماي, ەلوردانىڭ مادەني ءومىرىنىڭ ماڭىزدى بولىگىنە دە اينالدى. وسىلايشا, كوپشىلىكتى مۋزىكالىق كومەديا سىندى وزگە دە جانرلارمەن تانىستىرا وتىرىپ, ونەردىڭ جاڭا قىرلارىن اشامىز. تەاتردىڭ شىعارماشىلىق ۇجىمى ەلوردالىق كورەرمەندەردى ءاردايىم جوعارى كاسىبي شەبەرلىگىمەن, جارقىن قويىلىمدارىمەن جانە كلاسسيكالىق تۋىندىلاردى بىرەگەي پايىمداۋىمەن قۋانتادى. قاراعاندىلىق ۇجىمنىڭ ءاربىر سپەكتاكلى – كورەرمەندەرگە قۋانىش پەن شابىت اكەلەتىن ەرەكشە وقيعا ەكەنىن بىلگەندىكتەن, ءبىز گاسترولدىك ونەر كورسەتۋلەردى اسىعا كۇتەمىز», دەپ اتاپ ءوتتى «استانا وپەرا» تەاترىنىڭ ديرەكتورى عالىم احمەدياروۆ.
سونىمەن گاسترول ۆ.بەرەزيننىڭ «كۇلبيكە» مۋزىكالىق ەرتەگىسىمەن اشىلادى. ودان سوڭ ىلە-شالا كورەرمەندى ي.كالماننىڭ رومانتيكاعا تولى تۋىندىسى «سيلۆا» وپەرەتتاسى كۇتەدى.
سونداي-اق اينالاسىنداعى جانداردى ءوزىنىڭ يدەيالارىمەن قىزىقتىرا بىلگەن ءوزى سوتقار, ءوزى قىزىققۇمار بالا تۋرالى حيكايانى باياندايتىن ن.ماكارەۆيچتىڭ «دىمبىلمەس» مۋزىكالىق ەرتەگىسى كورسەتىلەدى. ي.شتراۋستىڭ تاڭداۋلى مۋزىكاسىمەن جانە قىزىقتى سيۋجەتىمەن تانىمال «ۆەنەتسياداعى ءتۇن» وپەرەتتاسى دا ورىندالادى.
ال گاسترولدىڭ سوڭعى كۇنى ن.ماكارەۆيچتىڭ «بۇرشاق ۇستىندەگى حانشايىم» اتتى بالالارعا ارنالعان ميۋزيكلىنەن باستالادى. بۇل شىعارما حانشايىمنىڭ باسىنان كەشكەن وقيعالارى مەن كەدەرگىلەرى تۋرالى باياندايدى. گاسترولدىك باعدارلامانى گ.كانچەليدىڭ «حانۋمانىڭ قۋلىعى» مۋزىكالىق كومەدياسى قورىتىندىلايدى. ۇلكەن زال ساحناسىندا وتەتىن سپەكتاكل تيفليستەگى ەڭ ەپتى جەڭگەتاي – حانۋمانىڭ كوپتەگەن قىزىقتى وقيعاسىن اڭگىمەلەپ, كورەرمەندەرگە ۇمىتىلماس مۋزىكالىق اسەر سىيلاماق.
ايتا كەتەيىك, تاريحى تەرەڭ قاراعاندى اكادەميالىق مۋزىكالىق كومەديا تەاترى وپەرەتتا, مۋزىكالىق كومەديا سىندى ەلىمىز ءۇشىن بىرەگەي تەاتر جانرلارىن دامىتىپ كەلە جاتىر. بيىل اتالعان ونەر ۇجىمى ەلۋ ءبىرىنشى ماۋسىمىن اتاپ ءوتتى. تەاتر رەپەرتۋارىندا ي.كالماننىڭ «بايادەرا», «سيلۆا», «ماريتسا», ي.شتراۋستىڭ «سىعان بارونى», «جارقانات», «ۆەنەتسياداعى ءتۇن», گ.كانچەليدىڭ «حانۋمانىڭ قۋلىعى» سىندى باسقا دا الەمدىك كلاسسيكالىق وپەرەتتا جاۋھارلارىن قوسا العاندا 300-دەن استام قويىلىم ۇسىنىلعان. تەاتر ميۋزيكل, شوۋ, بالەت, وپەرالاردى بەلسەندى تۇردە قويىپ, تانىمال رەجيسسەرلەرمەن جانە حورەوگرافتارمەن بىرلەسىپ جۇمىس ىستەيدى, ءتۇرلى ەلدەن ارتىستەردى بىرلەسكەن جوبالارعا قاتىسۋعا شاقىرادى. العاش شىمىلدىعىن اشقان ۋاقىتتان بەرى تەاتر الىس-جاقىن شەتەلدەردىڭ 200-دەن استام قالاسىندا بولىپ, ونەر كورسەتىپ قايتتى.
