فوتو: senate.parlam.kz
دەپۋتاتتار مۋزەي قىزمەتكەرلەرىمەن جانە «ارىس» قورىنىڭ, مادەنيەت, ارحيۆتەر جانە قۇجاتتاما باسقارماسىنىڭ, سونداي-اق الماتى وبلىستىق مۋزەيلەر قاۋىمداستىعىنىڭ وكىلدەرىمەن كەزدەستى. جۇزدەسۋدە جاڭالىق اۋىلىندا عىلىمي-زەرتتەۋ جۇمىستارىن قارجىلاندىرۋ ماسەلەلەرى تالقىلاندى. بۇل اۋىلدا ساياسي قۋعىن-سۇرگىنگە ۇشىراعان 163 ادامنىڭ سۇيەگى زەرتتەلدى جانە گەنەتيكالىق تالداۋ جۇرگىزۋ ارقىلى ولاردىڭ 50-ءى تۋرالى دەرەكتەر انىقتالدى.
سەناتور دارحان قىدىرالى تۇركىستان وبلىسىندا بولعان كەزدە قوجا احمەت ياساۋي كەسەنەسىنىڭ جاي-كۇيىمەن جانە قالپىنا كەلتىرۋ جۇمىستارىمەن تانىستى. تۇركىستانداعى №42 كوشەدە سالىنىپ جاتقان مەكتەپ قۇرىلىسىنىڭ الاڭىندا دا بولدى. سەناتور ساپار بارىسىندا قالالىق ءماسليحات دەپۋتاتتارىمەن كەزدەستى. وندا ءماسليحاتتاردىڭ ءرولىن, زاڭداردى ىسكە اسىرۋ بارىسى مەن تۇركىستان قالاسىنىڭ ەرەكشە مارتەبەسى تۋرالى زاڭ جوباسىن تالقىلادى.
سەنات دەپۋتاتى سونىمەن قاتار ەجەلگى ساۋران قالاسىن زەرتتەۋ ايماعىندا بولدى جانە ارحەولوگيالىق قازبا جۇمىسىنىڭ بارىسىمەن تانىستى. بۇل كونە قالا – ايماقتاعى ماڭىزدى تاريحي-مادەني ەسكەرتكىش جانە ونى زەرتتەۋ وتكەندى بىلۋدە زور ماڭىزعا يە ەكەنى ايتىلدى. الايدا زەرتتەۋ جۇمىسىنىڭ ماڭىزىنا قاراماستان, قارجى تاپشىلىعىنا بايلانىستى قولعا الىنعان اۋقىمدى ىستەر توقتاپ قالعان بولاتىن. دارحان قىدىرالى بۇل ماسەلەگە الاڭداۋشىلىق ءبىلدىرىپ, قازبا جۇمىستارىن جالعاستىرۋ, ساۋران قالاسىنىڭ ورنىنداعى تاريحي ەسكەرتكىشتەردى ساقتاۋ ءۇشىن قارجىلاندىرۋ قاجەتتىگىن اتاپ ءوتتى.
سەناتور سونداي-اق قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىندە بولىپ, مەملەكەت باسشىسىنىڭ «TURKTIME-تۇرىك ءداۋىرى» باعدارى اياسىندا جۇرگىزىلىپ جاتقان جۇمىستاردى تالقىلادى.
