رەسپۋبليكا بويىنشا سايلاۋشىلاردىڭ 95,11 پايىزى داۋىس بەردى

استانا. 27 ءساۋىر. رەسپۋبليكا بويىنشا سايلاۋشىلاردىڭ 95,11 پايىزى داۋىس بەردى. بۇل تۋرالى قازاقستاننىڭ ورتالىق سايلاۋ كوميسسياسىنا (وسك) سىلتەمە جاساپ, 24.kz حابارلادى. وسك ءباسپاسوز قىزمەتى حابارلايدى: 2015 جىلعى 26 ساۋىردە بولعان پرەزيدەنت سايلاۋىنا داۋىس بەرۋشىلەردىڭ كەلۋ قورىتىندىلارى تۋرالى وسك توراعاسىنىڭ ورىنباسارى ۆلاديمير فووس پەن وسك-نىڭ مۇشەسى ءلاززات سۇلەيمەننىڭ قاتىسۋىمەن ساعات 22:00-دە ارنايى بريفينگ ءوتتى. «بارلىعىڭىز ازاماتتاردىڭ تەڭدەسسىز بەلسەندىلىگىنىڭ كۋاسى بولدىڭىزدار. جالپى, بارلىق وڭىرلەردە ادامدار سايلاۋ ۋچاسكەلەرىنە داۋىس بەرۋ باستالماي جاتىپ كەلىپ, جابىلعانعا دەيىن كەلۋلەرىن توقتاتقان جوق. مۇنىڭ داۋسىز فاكت ەكەنىنە سايلاۋ ۋچاسكەلەرىندە بولعان قازاقستاندىق جانە حالىقارالىق بايقاۋشىلاردىڭ كوزى جەتىپ, اتاپ ءوتتى», – دەدى ۆلاديمير فووس «قازاقستاننىڭ شەتەلدەگى ديپلوماتيالىق وكىلدىكتەرىنىڭ جانىندا قۇرىلعان ۋچاسكەلەر بويىنشا دەرەكتەردى قوسپاعاندا, سايلاۋشىلاردىڭ كەلۋى تۋرالى جەدەل مالىمەتتەردى ۇسىنۋعا دايىنبىز. ولاردان مالىمەتتەر كەشىرەك كەلىپ تۇسەدى», – دەدى وسك توراعاسىنىڭ ورىنباسارى. وبلىستىق, استانا جانە الماتى قالالىق سايلاۋ كوميسسيالارىنان جولدانعان حابارلار نەگىزىندە رەسپۋبليكا بويىنشا سايلاۋشىلاردىڭ كەلۋى 95,11 پايىزدى قۇراعانى بەلگىلى بولدى. ونىڭ ىشىندە وڭىرلەر بويىنشا كورسەتكىشتەر تومەندەگىدەي: اقمولا وبلىسى بويىنشا 96,91 %; اقتوبە وبلىسى بويىنشا 96,36 %; الماتى وبلىسى بويىنشا 98,48 %; اتىراۋ وبلىسى بويىنشا 97,75 %; باتىس قازاقستان وبلىسى بويىنشا 96,51 %; جامبىل وبلىسى بويىنشا 97,31 %; قاراعاندى وبلىسى بويىنشا 97,21 %; قوستاناي وبلىسى بويىنشا 96,80 %; قىزىلوردا وبلىسى بويىنشا 97,52 %; ماڭعىستاۋ وبلىسى بويىنشا 95,36 %; وڭتۇستىك قازاقستان وبلىسى بويىنشا 97,78 %; پاۆلودار وبلىسى بويىنشا 96,35 %; سولتۇستىك قازاقستان وبلىسى بويىنشا 97,71 %; شىعىس قازاقستان وبلىسى بويىنشا 97,47 %; استانا قالاسى بويىنشا 94,51 %; الماتى قالاسى بويىنشا 78,28 %. قازىرگى ۋاقىتتا سايلاۋ ۋچاسكەلەرىنىڭ بارلىعىندا داۋىستاردى ساناۋ جۇرگىزىلىپ جاتىر. سايلاۋ زاڭناماسىنا سايكەس, داۋىستاردى ساناۋ ۋاقىتى ساناۋ باستالعان كەزدەن باستاپ 12 ساعاتتان اسپاۋى ءتيىس. «ەرتەڭ ورتسايلاۋكومعا جەدەل دەرەكتەر كەلىپ تۇسكەننەن كەيىن سىزدەردى قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىندا داۋىس بەرۋدىڭ الدىن الا قورىتىندىلارىمەن تانىستىرامىز», – دەدى ۆلاديمير فووس بريفينگ سوڭىندا. ەلامان قوڭىر. دەرەك, سۋرەت: 24.kz.