شىنارگۇل قايىروۆا: سايلاۋ زاڭ تالابىنا ساي ءوتتى

اتىراۋ. 26 ءساۋىر. اتىراۋدا سايلاۋ ۇدەرىسى زاڭ تالابىنا ساي ءوتتى. زاڭ بۇزۋشىلىق دەرەكتەرى بايقالمادى. بۇل تۋرالى سايلاۋدى بايقاۋ جونىندەگى رەسپۋبليكالىق قوعامدىق كوميسسياسى اتىراۋ وبلىستىق فيليالىنىڭ جەتەكشىسى شىنارگۇل قايىروۆا egemen.kz تىلشىسىمەن سۇحباتىندا ءمالىم ەتتى. – شىنارگۇل سالدۋقىزى, ءسىز جەتەكشىلىك ەتەتىن قوعامدىق ۇيىمنىڭ بايقاۋشىلارى سايلاۋ بارىسىن قالاي باقىلادى؟ – ءبىزدىڭ بايقاۋشىلارىمىز وڭىردەگى سايلاۋ ۋچاسكەلەرىنىڭ بارلىعىندا سايلاۋ ۇدەرىسىن باقىلاۋعا قاتىستى. ولار سايلاۋ ۋچاسكەلەرى اشىلعاننان باستاپ, داۋىس بەرۋ اياقتالعانعا دەيىن كىرپىك قاقپاي باقىلادى دەۋگە بولادى. ءار ەكى ساعات سايىن وڭىرلىك فيليالعا مالىمەت جولداپ وتىردى. ءبىر قۋانارلىعى, ءبىزدىڭ بايقاۋشىلارىمىزدان الىنعان مالىمەتتەردى سارالاعاندا, ءبىر نارسەگە كوزىمىز تولىق جەتتى. ول – ەلىمىزدەگى سايلاۋدىڭ زاڭ تالابىنا ساي وتكەندىگى. – ءسىزدىڭ بايقاۋشىلارىڭىزدىڭ قۇرامىندا كىمدەر بار؟ – ءبىز بايقاۋشىلارىمىزدى تاڭداعاندا, ولاردى ماجبۇرلەگەن جوقپىز. ياعني, ءبىز 232 بايقاۋشىنى ەرىكتى تۇردە تاڭدادىق. ولاردىڭ اراسىندا ءار ماماندىقتىڭ يەلەرى, ءار بۋىننىڭ وكىلدەرى بار. ماسەلەن, ستۋدەنتتەر مەن ماگيسترانتتار, مۇعالىمدەر, ءتىپتى شاعىن جانە ورتا بيزنەستىڭ وكىلدەرى, قاراپايىم جۇمىسشىلار دا ءبىزدىڭ قوعامدىق بىرلەستىكتىڭ ەرىكتى بايقاۋشىسى بولۋعا نيەت ءبىلدىردى. ءبىز ولارعا بايقاۋشىنىڭ مىندەتتەرى مەن قۇقىقتارىن, سايلاۋ ۋچاسكەسىندەگى داۋىس بەرۋدى باقىلاۋ كەزىندە ءوزىن-ءوزى ۇستاۋ ەتيكاسىن تۇسىندىردىك. – وزگە ۇيىمداردىڭ بايقاۋشىلارىمەن بايلانىستىڭىزدار ما؟ ولار سايلاۋدىڭ ءوتۋ بارىسى جايلى نە دەيدى؟ – ءيا, ءبىز سايلاۋعا دەيىن ەۋروپالىق قاۋىپسىزدىك جانە ىنتىماقتاستىق ۇيىمىنىڭ بايقاۋشىلارىمەن كەزدەسىپ, پىكىر الماسقانبىز. سايلاۋ ۋچاسكەلەرىندە كانديداتتاردىڭ سەنىمدى وكىلدەرى جانە وزگە ۇيىمدار ارقىلى كەلگەن بايقاۋشىلارمەن كەزدەستىك. ولار دا سايلاۋ ۇدەرىسىنىڭ زاڭ تالابىنا ساي وتكەنى تۋرالى ايتىپ, سايلاۋشىلاردىڭ داۋىس بەرۋگە كەلۋ بەلسەندىلىگىنىڭ جوعارى ەكەنىنە تاڭدانىسىن ءبىلدىردى. بۇل ازاماتتارىمىزدىڭ ساياسي بەلسەندىلىگىنىڭ جوعارىلاعانى, ەلىمىزدەگى دەموكراتيالىق وزگەرىستەردى قولداعانىنىڭ بەلگىسى. – سىزدەرگە شاعىم ايتۋشىلار بولدى ما؟ – ادامدار شاعىمدى بىرەۋدەن ءزابىر كورگەندە, زاڭسىزدىق ورىن العاندا عانا ايتادى. ال سايلاۋ بارىسىندا سايلاۋشىلار ەشكىمنەن ءزابىر كورگەن جوق. جوعارىدا ايتقانىمداي, زاڭ بۇزۋشىلىق كورىنىستەرى دە بايقالمادى. دەمەك, سايلاۋشىلاردىڭ شاعىم ايتۋىنا ەش نەگىز بولمادى. ءبىز سايلاۋشىلار كوڭىلدى اڭگىمەسىنەن, جانارىنىڭ جارقىلىنان بولاشاققا دەگەن سەنىمدى انىق بايقادىق. جولداسبەك شوپەعۇل. دەرەك: egemen.kz. سۋرەت: راحىم قويلىباەۆ.