اقتاۋ. 12 ماۋسىم. ماڭعىستاۋدا كاسىپكەر وبلىستىق اكىمشىلىكتە وزىنە قول جۇمسايمىن دەپ قورقىتتى. بۇل تۋرالى egemen.kz ءتىلشىسى حابارلادى.
اقتاۋ قالاسىنداعى تەڭىز جاعالاۋىندا بىلتىر سۇرىلگەن «راۆيل» كافەسىنىڭ يەسى باحتيار ماسيموۆ جۇرتشىلىقتى وسىلاي قورقىتتى. كافەسى ءسۇرىلىپ, جەر تەلىمى مەملەكەت مەنشىگىنە قايتارىلعان, وزىنە ماتەريالدىق جانە مورالدىق شىعىن قايتارىلماعاندىقتان ول بۇل ارەكەتكە باسقا امالى قالماعاندىقتان باراتىندىعىن ايتتى. ناقتىراق ايتساق, جەرگىلىكتى تۇرعىندار اراسىندا «كورابليك» دەگەن اتپەن ءمالىم كافەسىن جەرگىلىكتى اكىمدىك زاڭسىز دەپ تانىپ, جەر تەلىمىن بوساتۋدى تالاپ ەتكەن. سوتتاسۋدىڭ سوڭى كاسىپكەردىڭ ەمەس, اكىمدىكتىڭ پايداسىنا شەشىلىپ, جەر تەلىمى مەملەكەت مەنشىگىنە قايتارىلۋى ءتيىس بولىپ شىعادى. 2014 جىلى 4 اقپاندا «راۆيلگە» قاتىستى شىققان سوت شەشىمى, سول جىلى مامىر ايىندا ورىندالىپ, كافە ورنى تازارتىلادى. قازىر ول جەرگە اۆتوتۇراق سالىنۋدا.
اقتاۋ قالاسى اكىمىنىڭ ورىنباسارى ن.اققۇلوۆ بۇل تۋرالى «لادا» گازەتىنە بەرگەن سۇحبتىندا: «باحتيار ماسيموۆ 1998 جىلى اتالعان جەردى 10 جىلعا جالعا العان. 2008 جىلى قايتارۋ كەرەك بولعان, بىراق ول 2012 جىلعا دەيىن 4 جىل بويى زاڭسىز پايدالانىپ كەلدى. 2012 جىلى اقتاۋ قالالىق اكىمدىگى زاڭسىز پايدالانىپ وتىرعان جەر تەلىمىن قايتارۋدى سۇرادى. ماسيموۆ كىنالى ساناپ وتىرعان ماڭعىستاۋ وبلىستىق اكىمدىگى, اقتاۋ قالالىق اكىمدىگىنەن باستاپ, بارلىق اتقارۋشى جانە قۇقىق قورعاۋ ورىندارى زاڭ جۇزىندە جۇمىستاندى. ءماسيموۆتى وزىنە قول جۇمساۋعا جەتكىزەتىندەي ەشكىم قىساستىق كورسەتكەن جوق. ول ماتەريالدىق جانە مورالدىق شىعىن ءوندىرۋدى سۇرايدى. ال اكىمدىك ودان 4 جىل بويى زاڭسىز پايدالانىپ كەلگەن جەردىڭ جالداۋ اقىسىن دا, كافەنى ءسۇرۋ كەزىندە قولدانىلعان تەحنيكا, ادام كۇشىنىڭ ەسەبىن دە سۇراپ وتىرعان جوق», – دەدى.
باقتيار ماسيموۆ ەلىمىزدىڭ ىشكى ىستەر مينيسترلىگىنىڭ ىشكى اسكەرىندە قىزمەت ەتىپ, مايور شەنىندە زەينەتكە شىققان. قازىرگى تاڭدا ماڭعىستاۋ وبلىستىق ازەربايجان ەتنو-مادەني بىرلەستىگى ءماجىلىسىنىڭ توراعاسى.
گۇلايىم شىنتەمىرقىزى.
دەرەك: egemen.kz.
سۋرەت: tumba.kz.
