فوتو: جامبىل وبلىسى اكىمدىگى
جامبىل وبلىسى ەلدوس سمەتوۆتىڭ پاريجدەن باستى جۇلدەمەن كەلۋىنە وراي «تاراز» ورتالىق ستاديونىندا گالا-كونتسەرت ۇيىمداستىردى. سپورت شەبەرىن ىستىق ىقىلاسپەن قارسى الۋعا 15 مىڭ تۇرعىن جينالعان.
ءىس-شارادا جامبىل وبلىسىنىڭ اكىمى ەربول قاراشوكەەۆ ەلدوس سمەتوۆ پەن ونىڭ جاتتىقتىرۋشىسىن وليمپ شىڭىن باعىندىرۋىمەن قۇتتىقتاپ, تاراز قالاسىنان 5 بولمەلى پاتەر (پەنتحاۋس) جانە سوڭعى ۇلگىدەگى (Lexus 600) اۆتوكولىكتىڭ كىلتىن تابىستادى. سپورت ساڭلاعىنىڭ جەكە باپكەرى عالىمجان جىلگەلديەۆكە 2 بولمەلى پاتەر مەن اۆتوكولىكتىڭ (Hyundai Santa Fe) كىلتى بەرىلدى. اكىمدىك باعالى سىيلىقتار دەمەۋشىلەر ەسەبىنەن بەرىلگەنىن دە قۇلاققاعىس ەتكەن.
«وليمپيادا ويىندارىندا ەلىمنىڭ كوك بايراعىن كوككە كوتەرىپ, ءانۇرانىمىزدى شىرقاتۋ مەنىڭ بالا كەزدەن بەرگى ارمانىم بولاتىن. سول ماقساتقا جەتۋ جولىندا ايانباي تەر توكتىم. جاقسىلىق ۇشكەمپىروۆ اتامىزدىڭ تىلەگىن ورىنداعانىما وتە قۋانىشتىمىن. بارشا جانكۇيەرلەرىمە ەرەكشە العىس ايتقىم كەلەدى. قولداۋلارىڭىزدى سەزىندىم. جەرلەستەرىمە كوپ راقمەت», دەدى پاريج وليمپياداسىنىڭ التىن مەدال يەگەرى ەلدوس سمەتوۆ.
عالىمجان جىلگەلديەۆ تە جىلدار بويى توككەن تەردىڭ اقتالعانىن ەرەكشە اتاپ ءوتتى.
گالا-كونتسەرت سوڭى ەلىمىزگە تانىمال ەسترادا جۇلدىزدارىنىڭ كونتسەرتتىك باعدارلاماسى مەن وتشاشۋعا ۇلاسقان.
