جادىگەرگە ماڭىز بەرگەن حالىقارالىق زەرتتەۋشى مامانداردىڭ پايىمىنا ۇڭىلسەك, ۇڭگىر قابىرعاسىنداعى تاسقا بادىزدەلگەن بەينەدە جابايى دوڭىز جانە ءۇش ادامنىڭ سۇلباسى بارى انىقتالعان. وسىنداعى سۇلبا-سۋرەتتىڭ ۇزىندىعى 4,5 مەتر ەكەن. جوعارىداعى «Nature» باسىلىمىنىڭ جازۋىنا قاراعاندا, اتالعان تاستاعى بەينە العاش 2017 جىلى تابىلىپ, سوڭعى جەتى جىل بويى عالىمدار ونىڭ جاسىن انىقتاۋمەن اينالىسقان ەكەن.
ناتيجەسىندە, ولار تاسقا باسىلعان سۇلبا-سۋرەتتى بويلاي ونگەن اكتاس قاباتىن قىرناپ الىپ, ونى لازەرلىك تاسىلمەن ىدىراتۋ ارقىلى بولشەكتەلگەن ەلەمەنتتەردىڭ مولەكۋلالىق جاسىن انىقتاعان كورىنەدى. ءسويتىپ, سۋرەتتىڭ سالىنعان ۋاقىتى بۇدان 512 عاسىر بۇرىن ەكەنى انىقتالعان.
بۇدان بۇرىن ارحەولوگتەر تاعى دا وسى ارالدىڭ لەانگ بۋلۋ سيپونگ ۇڭگىرىنەن شامامەن 45 500 جىلدىڭ الدىندا سالىنعان سۋرەتتى تاپقان ەدى.
قىسقاسى, سۋلاۆەسي ارالىنان تابىلعان كونە دۇنيەلەر الەم ارحەولوگتەرىنىڭ نازارىن اۋدارىپ وتىر. اۋستراليا ۋنيۆەرسيتەتىنىڭ پروفەسسورى, اتاقتى ارحەولوگ ادام بريمم «اتالعان پەتروگليفتە بەينەلەنگەن فيگۋرالارعا ناقتى تۇجىرىم ايتۋ قيىن. بۇل بەينەلەر ۇيلەسىمى جاعىنان ادام بالاسىنىڭ ەۆوليۋتسيالىق دامۋىنىڭ ءبىر بولىگى ەكەنى انىق. مۇنداعى كومپوزيتسيادا اڭشىلىق كورىنىس نەمەسە تەريانتروپتاردىڭ ءومىر سالتى بەينەلەنۋى مۇمكىن» دەگەن پايىم ايتىپتى.
