ولجاس سۇلەيمەنوۆ ەسىمدى ستۋدەنت قىتاي تىلىندە شىعارما جازدى

الماتى. 12 ماۋسىم. «كوپ ءتىل – ءبىر الەم – 2015» بايقاۋىنا قاتىسقان ولجاس سۇلەيمەنوۆ ەسىمدى ستۋدەنت بۇۇ سىيلىعىنا يە بولدى. بۇل تۋرالى tengrinews.kz حابارلادى. ولجاس – «بولاشاق» باعدارلاماسىنا سايكەس شانحاي قالاسىنداعى تونگجي ۋنيۆەرسيتەتىندە ءدارىس الادى. بۇۇ بايقاۋىنا قاتىسقان ول, شىعارمانى قىتاي تىلىندە جازدى. جەڭىمپازدى انىقتاۋ ءۇش ساتىدان ءوتتى. سىناق بارىسىندا ۇمىتكەردىڭ قۇندىلىقتار يدەياسىنا قاتىستى كوزقاراسى, سونداي-اق ءتىل مەڭگەرۋ شەبەرلىگى ەرەكشە سارالاندى. بارلىق سىننان سۇرىنبەي, ماڭدايى جارقىراپ وتكەن ولجاس سۇلەيمەنوۆ جەڭىمپاز اتاندى. بايقاۋدىڭ العاشقى ساتىسىنداعى سىناققا 130 ەلدەن 3500 تالاپكەر قاتىسقان ەدى. بىرىككەن ۇلتتار ۇيىمىنىڭ رەسمي تىلدەرى بولىپ سانالاتىن – اعىلشىن, اراب, قىتاي, يسپان, ورىس جانە فرانتسۋز تىلدەرىندە جازىلعان 1250 شىعارما ارنايى جاساقتالعان كوميسسيانىڭ تالقىسىنا ءتۇستى. سودان اتالعان التى ءتىل بويىنشا نەبارى 70 شىعارما يەلەرى جەڭىمپاز اتاندى. اراسىندا ولجاس بار. جاس قازاق ستۋدەنتى نيۋ-يوركتە وتەتىن دۇنيەجۇزىلىك جاستار فورۋمىنا قاتىسۋعا جولداما ۇتىپ الدى. ايتا كەتەيىك, بىرىككەن ۇلتتار ۇيىمىنىڭ  باس اسسامبلەياسىندا ەڭ ۇزدىك ستۋدەنت تۋىندىسىنىڭ تۇساۋكەسەر سالتاناتى وتەدى. تالعات ءسۇيىنباي. دەرەك, سۋرەت: tengrinews.kz.