اۆتوبۋستار تۇراقتى باقىلاۋعا الىنادى

اتىراۋ قالاسىندا دا جولاۋشىلار تاسىمالدايتىن اۆتوبۋستار جۇمىسىنا كوڭىلى تولمايتىندار بار. سيرەك بولسا دا تۇرعىندار سونداي شاعىمىن ءتىلشى قوسىنىنا حابارلاپ تۇرادى. مۇنداي شاعىمدار قالالىق اكىمدىككە دە جەتكەن بولۋى كەرەك, ەندى جولاۋشى تاسىمالدايتىن اۆتوبۋستار قوزعالىسى GPS-پەن باقىلاۋعا الىنعالى وتىر. اتىراۋ قالاسىنىڭ اكىمى نۇرلىبەك وجاەۆتىڭ جەرگىلىكتى جولاۋشى تاسىمالداۋشىلارمەن وتكىزگەن كەڭەسىندە ناق وسى ماسەلە ماقۇلداندى. بۇعان دەيىن, ياعني وتكەن جىل­دىڭ كۇزىندە قالالىق اكىمدىكتىڭ قىزمەتكەرلەرى اس­تاناداعى قوعام­دىق كولىكتە GPS جۇيەسىن ەنگىزۋ تاجىريبەسىنە زەرتتەۋ جۇرگىزىپتى. ال اتىراۋ­داعى العاشقى تاجىريبە №4 مارشرۋتتا قاتىنايتىن اۆتو­بۋس­تارعا ەنگىزىلگەن. وسى باعىتتاعى 12 اۆتوبۋسقا GPS جۇيە­سى قون­دىرىلىپ, قوعامدىق كولىكتىڭ ايالدامالارعا كەلۋى ۋاقىتى, ۇزاق تۇرۋى مەن سالونعا ادامنىڭ شەكتەن تىس كوپ ءمىنۋى, جۇرگىزۋشىلەردىڭ جول قوزعالىسى ەرە­جەسىن ساقتاۋى باقىلاۋعا الىنعان. – بۇل جۇيە قوعامدىق كولىك­تەردە جولاۋشى تاسىمالىن جاقسارتۋعا سەپتىگىن تيگىزەدى. GPS جۇيەسىن قالاداعى 200-دەن استام اۆتوبۋسقا ورناتار بولساق, ولاردىڭ كۇندەلىكتى قوزعالىسىن, قۇقىق بۇزۋشىلىقتاردى ەكراننان كورىپ وتىرۋعا بولادى, – دەگەن اتىراۋ قالاسىنىڭ اكىمى ن.وجاەۆ ءتيىستى مامان­­دارعا GPS جۇيەسىن ەنگىزۋدىڭ ءتيىمدى جولدارىن قاراستىرۋدى ۇسىندى. مۇنداي جۇيە بولاشاقتا اتى­راۋ قالاسىنداعى تاكسي قىز­مەتىنە دە قولدانىلۋى مۇمكىن. جولداسبەك شوپەعۇل, «ەگەمەن قازاقستان». اتىراۋ وبلىسى.