قازىر مۇندا جاياۋ جۇرگىنشىلەر مەن ۆەلوسيپەدپەن قىدىرۋشىلارعا ارنالعان ارنايى جول سالىنىپ جاتىر. ورتالىق جاعاجاي دا كەڭەيتىلەدى. قالالىق تكش ءبولىمىنىڭ باسشىسى ازامات بەگاليننىڭ ايتۋىنشا, «شاعالانى» اباتتاندىرۋ جۇمىسى قالا كۇنى قارساڭىندا اياقتالۋعا ءتيىس. جالپى, قوستانايدا ۇلكەندى-كىشىلى 68 ساياباق بار. «تازا قازاقستان» اكتسياسىنىڭ اياسىندا بيىل سونىڭ ءبارى اباتتاندىرىلادى. مىسالى, ترياتلون پاركىنە سۋارۋ جۇيەسى تارتىلىپ, جارىق ورناتىلدى. ورىندىقتار قويىلىپ, بالالار جانە سپورت الاڭدارى سالىندى. ونىڭ توبىل وزەنىنە شىعاتىن جولى بولادى. جەڭىس ساياباعىنداعى ورىندىقتار مەن قوقىس جاشىكتەرى تولىعىمەن اۋىستىرىلدى.
كوپشىلىكپەن بىرگە سەنبىلىككە شىققان وبلىس اكىمى قۇمار اقساقالوۆ ءۇزىلىس كەزىندە ساۋىردە باستالعان ەكولوگيالىق اكتسيانىڭ ماقساتى تەك كوشە سىپىرىپ, اعاش وتىرعىزۋ عانا ەمەس, پرەزيدەنت بۇگىندە حالىقتىڭ ەكولوگيالىق مادەنيەتىن قالىپتاستىرۋعا ۇلكەن ءمان بەرىپ وتىرعانىن ايتتى.
ء«بارىمىز تازا كوشەمەن ءجۇرىپ, تازا ساياباقتا سەرۋەندەگىمىز كەلەدى. ال ونىڭ ءبارىن تازا ۇستاپ تۇرۋ تەك وزىمىزگە باينالىستى. مەملەكەت باسشىسىنىڭ باستاماسىمەن قولعا الىنعان «تازا قازاقستان» باعدارلاماسى ايماقتاردى تازارتۋمەن شەكتەلمەيدى. بۇل – ەكولوگيالىق مادەنيەتتى قالىپتاستىرۋعا باعىتتالعان ۇلكەن يدەولوگيالىق ءىس-شارا. بۇگىنگە دەيىن وبلىستىڭ 370 مىڭنان اسا تۇرعىنى سەنبىلىككە قاتىسىپ, 113 زاڭسىز قوقىس الاڭى جويىلدى. وبلىس اۋماعىنداعى 300-دەن اسا ساياباق تازارتىلدى. سۋبۇرقاقتار قالپىنا كەلتىرىلىپ, اۋقىمدى اباتتاندىرۋ جۇمىستارى اتقارىلدى. بيزنەس وكىلدەرىمەن كەزدەسۋ بارىسىندا «تازا قازاقستان» جوباسى جونىندە ءسوز قوزعالىپ, اۋىل-ايماقتاردى اباتتاندىرۋعا قاتىستى مەموراندۋمعا قول قويىلدى. وبلىس تۇرعىندارىن دا وسى ءىس-شاراعا بەلسەندى قاتىسىپ, ەلدى كوركەيتۋگە ۇلەس قوسۋعا شاقىرامىن», دەدى وبلىس اكىمى.
سەنبىلىك بارىسىندا اكىم الداعى ۋاقىتتا قالالىق جاعاجاي اۋماعىندا جازعى ستاديون سالىناتىنىن ايتتى.
قوستاناي وبلىسى
