قىزىلوردادا سايلاۋشىلاردىڭ 97,5 پايىزى داۋىس بەردى

قىزىلوردا. 26 ءساۋىر. قىزىلوردا وبلىسىندا 388 019 ادام سايلاۋعا قاتىستى. مۇنىڭ ءوزى وڭىردەگى سايلاۋشىلاردىڭ 97,5 پايىزى داۋىس بەرگەنىن كورسەتەدى. بۇل تۋرالى egemen.kz ءتىلشىسى حابارلادى. تۇسكى ساعات 14:00-دە سايلاۋعا حالىقتىڭ 73,13 پايىزى قاتىستى دەگەن اقپارات الدىق. ارادا ەكى ساعات وتكەندە, 346 698 ادامنىڭ داۋىس بەرگەندىگى جونىندە دەرەك كەلدى. ياعني, تۇستەن كەيىن قىزىلوردالىق سايلاۋشىلاردىڭ 87,5 پايىزى داۋىس بەرىپ ۇلگەرگەن. وسىدان-اق حالىقتىڭ ەل ومىرىندەگى ەلەۋلى وقيعاعا ەنجار قاراماي, سايلاۋعا وتە بەلسەندى قاتىسقانىن بايقاۋعا بولادى. بۇگىنگى سايلاۋدىڭ مەرەكەلىك كوڭىل-كۇيدە وتكەنىن ايتقان ابزال. مىسالى, قىزىلوردا قالاسىنىڭ تۇرعىندارى نوسەرلەپ جاۋعان جاڭبىرعا قاراماي, سايلاۋ ۋچاسكەلەرىنە بارىپ, ءوز تاڭداۋلارىن جاسادى. مۇنىڭ ءوزى ەلىمىزدە ساياسي مادەنيەتتىڭ كۇن ساناپ ارتىپ كەلە جاتقانىن دالەلدەيدى. «ءدال قازىر وبلىس بويىنشا ورانالاسقان بارلىق 345 سايلاۋ ۋچاسكەسىندە داۋىس بەرۋ اياقتالدى. تىزىمگە ىلىنگەن سايلاۋشىلاردىڭ 97,5 پايىزى ساياسي ناۋقانعا تولىقتاي قاتىستى. بۇل قىزىلوردالىقتاردىڭ ساياسي بەلسەندىلىگىنىڭ ارتقانىن, ەل بولاشاعىنا بەيجاي قارامايتىنىن اڭعارتادى. سايلاۋ بارىسىندا ەشقانداي زاڭ بۇزۋشىلىق تىركەلگەن جوق. بايقاۋشىلار تاراپىنان دا سىن-ەسكەرتپەلەر ايتىلمادى. ساياسي ناۋقان وتە جوعارى دەڭگەيدە ءوتتى»,– دەدى وبلىستىق سايلاۋ كوميسسياسىنىڭ توراعاسى قورعانبەك قايروللاەۆ. ەرجان بايتىلەس. دەرەك, سۋرەت: egemen.kz.