اۋىلدىڭ ءارىن كەلتىرىپ, كوز تارتاتىن تاماشا سىيلىقتى ارنايى جاساتىپ, تۋعان اۋلىنا سىيعا تارتقان قادىر مىرزاليەۆ اتىنداعى مەكتەپتىڭ 2004 جىلعى تۇلەكتەرى بولىپ شىقتى. بيىل ولاردىڭ ورتا مەكتەپتى بىتىرگەنىنە 20 جىل تولىپ جاتىر. جالپى, مەكتەپ تۇلەكتەرىنىڭ تۋعان جەرىنە وسىنداي ەرەكشە سىيلىق جاساۋى وڭىردە جاقسى داستۇرگە اينالىپ كەلەدى.
ۇلتتىق ويۋلارمەن ءارى شامدارمەن بەزەندىرىلگەن, كۇندىز دە, تۇندە دە كوز تارتاتىن ادەمى ساعاتتى ورالدىق شەبەر ءارى كاسىپكەر, «Daryn» شەبەرحاناسىنىڭ يەسى جاراس سۇندەتوۆ جاساعان ەكەن.
– جىمپيتى اۋلىنىڭ 1986-1987 جىلى تۋعان ازاماتتارى ناۋرىز ايىنداعى سۋ تاسقىنى كەزىندە دە ەرلىككە تاتيتىن ەڭبەك كورسەتتى. اسىرەسە ەرمەك كاكىموۆ, نۇرحان ءامينوۆ, ادىلبەك بايراليەۆ, بەكجان بيسەنعاليەۆ, سەرجان سيىقوۆ, فارحات تاستاەۆ, اسحات نۇرمۇحانوۆ, سايلان جۇبانوۆ, تاراس سارسەنوۆ سەكىلدى ازاماتتارعا ەلدىڭ اتىنان العىس ايتامىز. بۇگىندە قادىر مەكتەبىنەن 20 جىل بۇرىن تۇلەپ ۇشقان تۇلەكتەر تۋعان اۋلىنا تاماشا سىي جاساپ وتىر. مىنا تۇعىرداعى ساعاتقا قاراپ, تالاي ادام تاڭداي قاعارى انىق. وسى يگى ءداستۇر جالعاسا بەرسىن! – دەگەن سىرىم اۋدانىنىڭ اكىمى جۇماگەلدى باتىرنيازوۆ اتالعان جىگىتتەرگە العىسحات تابىس ەتتى.
– ءبىز ءبىر مەكتەپتە بەس سىنىپ بولىپ قاتار وقىعان قۇرداستار ەدىك. بيىل مەكتەبىمىزدى ءتامامداپ, ۇلكەن ومىرگە قادام باسقانىمىزعا 20 جىل تولىپ وتىر. وسىعان وراي تۋعان جەرىمىزگە ەرەكشە ءبىر سىيلىق جاسايىق دەگەن ۇسىنىستى دوستارىمىزدىڭ كوبى قولدادى. اركىم قاداري-حالىنشە ۇلەس قوسىپ, 5 ملن تەڭگەدەي جينادىق. وسى قارجىعا ەرەكشە كوشە ساعاتىن جاساتىپ, تاريحى تەرەڭ جىمپيتى كەنتىنىڭ ناق ورتاسىندا, ۇستازدار ءۇيىنىڭ الدىنا ورناتىپ قويدىق, – دەيدى اۋىل تۇلەگى, كاسىپكەر مۇراتبەك مۇحامبەديەۆ.
باتىس قازاقستان وبلىسى
