يسلام عىلىمي-زەرتتەۋ ينستيتۋتىنىڭ اشىلۋ سالتاناتىنا باس ءمۇفتي ناۋرىزباي قاجى تاعان ۇلى, جازۋشى سماعۇل ەلۋباي, اكادەميك اسقار جۇمادىلداەۆ باستاعان زيالى قاۋىم قاتىستى. ينستيتۋتتىڭ نەگىزگى ماقسات-مىندەتى – عاسىرلار قويناۋىنان جەتكەن رۋحاني-ءدىني كونە قولجازبالار مەن ەسكى كىتاپتاردى كاديكولوگيا-ماتىنتانۋلىق تۇرعىدان زەردەلەپ, ساراپتاۋعا, ونى عىلىمي اينالىمعا ەنگىزۋگە, بۇگىنگى قوعام سۇرانىسىنا وراي قايتا جارىققا شىعارۋعا ۇلەس قوسۋ.
«مەملەكەت باسشىسى قاسىم-جومارت توقاەۆ ۇكىمەت مۇشەلەرىمەن وتكەن باسقوسۋدا: «حالقىمىزدىڭ دۇنيەتانىمىنا ساي ءداستۇرلى يسلامدى دارىپتەۋ اسا ماڭىزدى. ونىڭ عىلىمي-تەوريالىق نەگىزىن دامىتۋ قاجەت...» دەگەن بولاتىن. پرەزيدەنت ماڭىز بەرگەن باعىت بويىنشا ءداستۇرلى ءدىنىمىزدىڭ اسىل قۇندىلىقتارىن عىلىمي-تەوريالىق تۇرعىدان دامىتۋ, اتا-بابالارىمىز ۇستانعان يسلامنىڭ سۇننيتتىك باعىتتاعى حانافي ءمازھابىن جاڭعىرتۋ ماقساتىندا جىل باسىندا قمدب جانىنداعى يسلام عىلىمي-زەرتتەۋ ينستيتۋتىن اشۋدى جوسپارلاعان بولاتىنبىز. بۇل جوسپارىمىز ورىندالىپ, قۋانىشقا كەنەلىپ وتىرمىز. ءوز كەزەگىندە ينستيتۋت ۇجىمى يسلام اتىن جامىلعان ءتۇرلى جاماعاتتار مەن اعىمداردىڭ ءدىني ۇستانىمدارى مەن جاسىرىن يدەيالارىن عىلىمي تۇرعىدان اشكەرەلەۋگە, سول ارقىلى ەلىمىزدىڭ تۇتاستىعى مەن بىرلىگىنە سىزات تۇسىرەتىن قاۋىپ-قاتەرلەردىڭ الدىن الۋعا نازار اۋدارادى», دەپ اتاپ ءوتتى ناۋرىزباي قاجى تاعان ۇلى.
سونداي-اق قمدب توراعاسى جينالعان قاۋىمعا يسلام عىلىمي-زەرتتەۋ ينستيتۋتىنىڭ باسشىسى رەتىندە بەلگىلى عالىم ءتورالى قىدىردى تانىستىرىپ, الداعى جۇمىسىنا تابىس تىلەدى.
ءىس-شاراعا كەلگەن زيالى قاۋىم, اتالعان ينستيتۋت يسلام وركەنيەتىنىڭ دامۋىنا ۇلەس قوسقان عالىم-عۇلامالاردىڭ ەڭبەكتەرىن زەردەلەپ, حالقىمىزدىڭ رۋحاني تۇتاستىعى مەن ىنتىماق-بىرلىگىن نىعايتۋعا سەرپىن بەرەتىن ۇيىمعا اينالادى دەگەن سەنىم ءبىلدىردى.
