سەناتور الدىمەن شىمكەنت قالاسىنداعى №6 ەمحاناسىندا بولدى. ەمحانادا كونسۋلتاتيۆتىك-دياگنوستيكالىق بولىمشە, وتباسىلىق دەنساۋلىق ساقتاۋ ورتالىعى, ەمدەۋ-الدىن الۋ بولىگى جانە الەۋمەتتىك-پسيحولوگيالىق كومەك ءبولىمى جۇمىس ىستەيدى. دارىگەرلەر مۇندا 22 سالا بويىنشا كەڭەس بەرەدى, دياگنوستيكالىق جانە زەرتحانالىق زەرتتەۋ جۇرگىزەدى, پسيحولوگيالىق كومەك كورسەتەدى.
سەناتور كەزدەسۋ بارىسىندا حالىققا ساپالى مەديتسينالىق قىزمەت كورسەتۋ ماسەلەسىن دەنساۋلىق ساقتاۋ باسقارماسى باسشىلىعىمەن جانە مەديتسينالىق مەكەمە قىزمەتكەرلەرىمەن بىرگە تالقىلادى.
ن.بەكنازاروۆ دەنساۋلىق ساقتاۋ سالاسىنىڭ مىندەتى – ازاماتتاردىڭ ءومىر ءسۇرۋ ۇزاقتىعىن ارتتىرۋ, دەنساۋلىعىن جاقسارتۋ ەكەنىن اتاپ ءوتتى. سالا قىزمەتكەرلەرىنە جان-جاقتى قولداۋ كورسەتۋ, ولاردىڭ الەۋمەتتىك جاعدايىن جاقسارتۋ ارقىلى مەديتسينا سالاسىن قارجىلاندىرۋ وسە ءتۇسىپ وتىر. جاڭا ادىلەتتى قازاقستاندى قۇرۋعا باعىتتالعان مەملەكەتتىك ساياساتتىڭ ماڭىزدى باعىتى – ۇلت دەنساۋلىعى.
دەپۋتات «قولجەتىمدى باسپانا» مەملەكەتتىك باعدارلاماسى اياسىندا «بوزارىق» شاعىن اۋدانىندا سالىنىپ جاتقان تۇرعىن ۇيلەردى دە ارالادى. قازىرگى ۋاقىتتا شىمكەنتتە جەتىم بالالاردى, كوپبالالى انالاردى, از قامتىلعان وتباسىلاردى, بيۋدجەتتىك ۇيىمداردىڭ قىزمەتكەرلەرىن قوسقاندا بارلىعى 49 736 ادام تۇرعىن ءۇي كەزەگىندە تۇر. سەناتور از قامتىلعان ازاماتتاردى تۇرعىن ۇيمەن قامتاماسىز ەتۋدىڭ ماڭىزىنا توقتالدى جانە قۇرىلىس جۇمىستارىنىڭ ساپاسىن اتاپ ءوتتى.
«مەملەكەت باسشىسى قولجەتىمدى باسپانامەن قامتاماسىز ەتۋ ءاربىر ازاماتتىڭ ءومىر ءسۇرۋ ساپاسىن ارتتىرۋعا باعىتتالعان الەۋمەتتىك ساياساتتىڭ باستى باسىمدىعى ەكەنىن اتاپ وتكەن بولاتىن. قولجەتىمدى باسپانا – حالىقتىڭ ءال-اۋقاتىن جاقسارتۋدىڭ نەگىزى. مەملەكەت وسىعان بايلانىستى تۇرعىن ۇيگە قول جەتكىزۋ مۇمكىندىگىن ارتتىرۋ ءۇشىن بىرقاتار باعدارلامانى ىسكە اسىرا باستادى, ەلىمىزدە تۇرعىن ءۇي قۇرىلىسى قارقىندى تۇردە ءجۇرىپ جاتىر. بۇل ماسەلە ءبىزدىڭ نازارىمىزدا بولادى», دەدى ن.بەكنازاروۆ.
سەناتور «ا-2 قورعاس – الماتى – شىمكەنت – وزبەكستان رەسپۋبليكاسىنىڭ شەكاراسى» اۆتوموبيل جولىن قايتا جاڭعىرتۋ جونىندەگى قۇرىلىس جۇمىستارىنىڭ بارىسىمەن تانىستى. سونداي-اق جۇك ماشينالارىن قالا سىرتىمەن جۇرگىزۋ ءۇشىن اينالما جولدىڭ ماڭىزىنا توقتالدى جانە قارجىنى ءتيىمدى جۇمساۋ مەن قۇرىلىس ساپاسىن جاقسارتۋ قاجەتتىگىن اتاپ ءوتتى.
