فوتو: primeminister.kz
34 068 وتباسىنا ءبىر رەتتىك 100 اەك كولەمىندە وتەماقى تولەندى. وسى ماقساتتارعا بارلىعى 12,5 ملرد تەڭگەدەن اسا قاراجات جۇمسالدى. باعالاۋ اياقتالۋىنا قاراي جوعالعان ەڭ قاجەتتى زاتتارىن ساتىپ الۋ ءۇشىن 150 اەك-كە دەيىنگى مولشەردە قوسىمشا تولەمدەر دە جۇزەگە اسىرىلادى. بۇگىنگى تاڭدا 21 800 وتباسى جالپى سوماسى 9,9 ملرد تەڭگەگە ءتيىستى وتەماقى الدى.
قازىرگى ۋاقىتتا بارلىق وبلىستا تۇرعىن ءۇي مەن ساياجاي قۇرىلىسىن تەكسەرۋ جانە باعالاۋ جۇمىسى تولىعىمەن اياقتالدى. سۋ تاسقىنىنان زارداپ شەككەن ازاماتتارعا 4 790 سالىنعان جانە ساتىپ الىنعان ءۇي مەن پاتەر بەرىلدى.
ماسەلەن, 323 جاڭا ءۇي سالىنىپ, پايدالانۋعا بەرىلدى. سولتۇستىك قازاقستان وبلىسىندا – 235 وتباسى, قوستاناي وبلىسىندا – 57, اقتوبە وبلىسىندا – 26 جانە پاۆلودار وبلىسىندا 5 وتباسى جاڭا ءۇيدىڭ كىلتىن الدى. سۋ تاسقىنىنان زارداپ شەككەن وڭىرلەردە كۇزگە دەيىن بارلىعى 2 568 ءۇي سالىپ, تاپسىرۋ جوسپارلانعان, جۇمىس قارقىندى جۇرگىزىلىپ جاتىر.
4 467 وتباسى ءۇشىن قيراعان باسپاناسىنىڭ ورنىنا جاڭا ءۇي مەن پاتەرلەر ساتىپ الىندى. قوستاناي وبلىسىنىڭ تۇرعىندارىنا 315 تۇرعىن ءۇي بەرىلسە, اقمولادا – 219, اتىراۋدا – 1 372, اقتوبەدە – 447, سولتۇستىك قازاقستاندا – 1 102, باتىس قازاقستاندا – 1 004, قاراعاندى – 6 جانە پاۆلوداردا 2 تۇرعىن ءۇي بەرىلدى.
كوميسسيا شەشىمدەرىنىڭ قورىتىندىسى بويىنشا جالپى سوماسى 48,2 ملرد تەڭگەگە 8 717 وتباسى تۇرعىن ءۇيىن جوندەۋگە جانە قالپىنا كەلتىرۋگە وتەماقى الدى. سونىمەن قاتار زارداپ شەككەن بيزنەسكە كەلتىرىلگەن شىعىندى وتەۋ بويىنشا جۇمىس جۇرگىزىلىپ جاتىر. وڭىرلىك كوميسسيالار شوب سۋبەكتىلەرىنىڭ جالپى سوماسى 5,8 ملرد تەڭگەگە 374 ءوتىنىمىن قاراپ, ماقۇلدادى. سۋعا كەتكەن مال ءۇشىن بەرىلگەن مەملەكەتتىك كومەك كولەمى 2,8 ملرد تەڭگەدەن استى.
