قاراعاندىدا «ايبىن» رەسپۋبليكالىق اسكەري-پاتريوتتىق جيىن وتۋدە

قاراعاندى. 12 ماۋسىم. قالا ىرگەسىندەگى سپاسسك وقۋ-جاتتىعۋ بازاسىندا «ايبىن» رەسپۋبليكالىق اسكەري-پاتريوتتىق جيىن وتۋدە. شاراعا ەلىمىزدىڭ بارلىق وڭىرىنەن 800-گە جۋىق جاس قاتىسۋدا. بۇل تۋرالى egemen.kz ءتىلشىسى حابارلايدى. ۇيىمداستىرىلىپ وتىرعان شاراعا قورعانىس ءمينيسترىنىڭ ءبىرىنشى ورىنباسارى, قارۋلى كۇشتەرى باس شتابىنىڭ باسشىسى گەنەرال-پولكوۆنيك ساكەن جاسۇزاقوۆ قاتىسىپ, قاتىسۋشىلاردى قۇتتىقتادى. ول: «بۇل شارا جاستاردى وتانسۇيگىشتىككە تاربيەلەپ, پاتريوتتىق سەزىمىن قالىپتاستىرۋعا ارنالعان. سىزدەر وقۋ-جاتتىعۋ كەزىندە تەمىردەي ءتارتىپتى ۇيرەنىپ, اسكەري دايارلىقتارىڭىزدى جەتىلدىرە تۇسەسىزدەر. بارلىقتارىڭىزعا ساتتىلىك تىلەيمىن», – دەدى. اسكەري-پاتريوتتىق جيىندا قاتىسۋشىلار سپورتتىق سايىستاردان باق سىنايدى. اتاپ ايتساق, جاس ساربازدار مەن ستۋدەنتتەر بەلتەمىرگە تارتىلۋ, مىلتىق اتۋ, گاز تۇمشاسىن جەدەل كيۋ, مەديتسينالىق جاردەم كورسەتۋ, قاشىقتىققا جۇگىرۋ سەكىلدى سىناقتار تاپسىرادى. ايتا كەتەيىك, سايىس قورتىندىسى ەرتەڭ انىقتالىپ, ۇزدىكتەر ماراپاتتالاتىن بولادى. ايقىن نەسىپباي. دەرەك: egemen.kz. سۋرەت: vk.com.