سۋرەتتى تۇسىرگەن – ەرلان ومار, «EQ»
وتىرىستا الدىمەن ىشكى ىستەر ءمينيسترى ەرجان سادەنوۆ ەلدەگى جول قاۋىپسىزدىگىنىڭ توڭىرەگىندە قالىپتاسقان جالپى احۋالدى بايانداپ شىقتى.
ۇكىمەت باسشىسى ەلىمىزدە جول اپاتتارىنىڭ سانى ازايماي وتىرعانىن ايتا كەلە, ەلىمىزدەگى ءولىم-جىتىمگە مىسال كەلتىرىپ, وسى جىلدىڭ 6 ايىندا-اق مىڭعا جۋىق ادام قارا جولدىڭ ۇستىندە قازا تاپقانىنا قىنجىلدى.
پرەمەر-مينيستر كولىك جۇرگىزۋ مادەنيەتىنىڭ, جۇرگىزۋشىلەر مەن جاياۋ جۇرگىنشىلەردىڭ ەرەجە ساقتاۋ ءتارتىبىنىڭ دەڭگەيى تومەن ەكەنىنە نازار اۋدارا وتىرىپ, موپەدتەر ماسەلەسىن دە كوتەردى.
ءمينيستردىڭ بايانداماسىنان كەيىن ءسوز العان ولجاس اباي ۇلى ەلىمىزدىڭ باس پوليتسەيى ەرجان سادەنوۆتەن موپەدتەردى «تۇساۋلاۋعا» قاتىستى قولعا الىنىپ جاتقان ءىس-شارالار جايىن سۇرادى.
– جاڭا عانا «Egemen Qazaqstan» گازەتىنە شىققان «موپەدتەردىڭ ماسەلەسى ۋايىمعا اينالدى» دەگەن ماقالانى وقىپ شىقتىم. سول ماقالادا كورسەتىلگەندەي, بيىلدىڭ وزىندە موپەدتەردىڭ قاتىسۋىمەن بولعان اپاتتاردا 27 ادام قازا تاپقان. بۇل ماسقارا دەرەكتەر عوي! وسى ماسەلەنى قالاي شەشىپ جاتىرمىز؟ دەدى و.بەكتەنوۆ مينيسترگە قاراتا.
ە.سادەنوۆ مۇنداي پروبلەمانىڭ بار ەكەنىن مويىنداپ, كۇشەيتىلگەن جۇمىستىڭ ارقاسىندا موپەد جۇرگىزۋشىلەرى مىڭداپ تارتىپتىك جازاعا تارتىلىپ جاتقانىن جەتكىزدى.
– كوبىنە موپەدتەرمەن جاسوسپىرىمدەر, كۋرەرلەر جۇرەدى. زاڭناما اياسىندا ءتيىستى شارالار قابىلداپ جاتىرمىز. بارلىق موپەدتەر تىركەۋگە الىنباق. ولارعا مەملەكەتتىك نومەر بەرىلەدى. سودان كەيىن ول موپەدتەردى جۇرگىزۋ ءۇشىن كۋالىك الۋ كەرەك بولادى. قازىر زاڭ جوباسى سەناتتا جاتىر. بىراق ءبىز زاڭنىڭ كۇشىنە ەنگەنىن كۇتىپ وتىرماي جۇمىس جۇرگىزىپ جاتىرمىز. بۇگىندە 39 مىڭ جۇرگىزۋشى انىقتالىپ, تارتىپتىك جازاعا تارتىلدى. ونىڭ ىشىندە 202 ادام – كامەلەتكە جاسى تولماعاندار. ولاردىڭ اتا-انالارى جاۋاپقا تارتىلدى. ال ايىپ تۇراقتارىنا 5 مىڭنان استام موپەد قويىلدى. بۇل جۇمىستاردى ءالى دە جالعاستىرامىز, – دەدى ەرجان سادەنوۆ.
ۇكىمەت باسشىسى وتىرىستا مۇنداي ءتارتىپ بۇزاتىندارعا قاتاڭ شارالار قولدانىلۋى قاجەتتىگىن مىندەتتەدى.
قىسقاسى, كۇن تارتىبىندەگى وسى ماسەلەگە قاتىستى كوپ جايتقا نازار اۋدارعان و.بەكتەنوۆ ىشكى ىستەر, وقۋ-اعارتۋ, مادەنيەت جانە اقپارات مينيسترلىكتەرى مەن اكىمدىكتەرگە جول قوزعالىسى مەن قاۋىپسىزدىك ەرەجەلەرىن ساقتاۋ باعىتىنداعى اقپاراتتىق-ءتۇسىندىرۋ جۇمىستارىن جانداندىرۋ قاجەتتىگىن تاپسىردى.
