قاراعاندىدا ءىنىسىن ولتىرگەن قىزدىڭ سوتى باستالدى

استانا. 22 قاڭتار. قاراعاندىدا ۇيدەگى توندى ۇرلاپ كەتۋ ءۇشىن 11 جاستاعى تۋىس ءىنىسىن ولتىرگەن 20 جاستاعى قىزعا سوت باستالدى. بۇل تۋرالى Tengrinews.kz حابارلادى. وبلىستىق قىلمىستىق ىستەر جونىندەگى ارنايى مامانداندىرىلعان سوتتا اپكەسىنىڭ تونىن ۇرلاپ كەتۋ ءۇشىن ونىڭ ۇلىن ولتىرگەن قىزعا قاتىستى سوت پروتسەسى ىسكە كىرىستى. پروكۋرور سايان اققوجين ايىپتاۋ ءمانىن مالىمدەدى: وتكەن جىلعى 25 قىركۇيەك كۇنى 11 جاستاعى لەون سەرىكباەۆ اناسىنىڭ ءسىڭلىسى ونىڭ تونىن ۇرلاپ, سومكەگە سالىپ جاتقانىن كورىپ قويعانى ءۇشىن اجال قۇشتى. بۇل كەزدە بالانىڭ اتا-اناسى جۇمىستا بولعان. بەسىنشى سىنىپتا وقيتىن بالا مەكتەپكە بارماقشى بولىپ كيىنىپ جاتقان. قىز ونى توندى قايتىپ اكەلەتىنىن ايتىپ سەندىرەدى. ولار پاتەردەن شىققاننان كەيىن قىز بالانى ءوزىنىڭ فەدوروۆكا اۋدانىنداعى ۇيىنە بارىپ كەلۋگە كوندىرەدى. قىز بۇعان ءبىرىنشى ساباققا دەيىن جەتكىزەتىنىن ايتادى. وسىعان سەنىپ قالعان بالا ناعاشى اپكەسىنىڭ سوڭىنان ەرەدى. ال ۇيگە كىرگەن بويدا قىز بالانى الدىمەن پىشاقپەن ۇرىپ, ارتىنان تۇنشىقتىرا باستايدى. سوسىن ۇستىنەن مەكتەپ فورماسىن شەشىپ الىپ, ولاردى پورتفەل-وقۋلىقتارىمەن قوسا پەشكە ورتەيدى. ءبارى بىتكەسىن بالانىڭ ءولى دەنەسىن كوشەدەگى اجەتحاناعا اپارىپ تاستايدى. بالانىڭ جوعالىپ كەتكەنىن ونىڭ اتا-اناسى №63 ورتا مەكتەپتەگى مۇعالىمى لەوننىڭ ساباققا كەلمەگەنىن حابارلاعاندا ءبىر-اق بىلەدى. وسىدان كەيىن ەرىكتىلەردىڭ قاتىسۋلارىمەن لەون سەرىكباەۆتى ىزدەۋ ءبىر تاۋلىككە سوزىلدى. پوليتسەيلەر بۇل ارادا جاعدايدى ءبىرشاما تەكسەرە كەلىپ, بۇعان بالانىڭ 20 جاسار ناعاشى اپكەسىنىڭ بار ەكەنىن انىقتايدى. بويجەتكەننىڭ سونىڭ الدىندا ۇل بالانى جۇلمالاپ جەتەلەپ الىپ بارا جاتقانىن, ال لەوننىڭ وعان ەرگىسى كەلمەگەن ءتۇر تانىتقانىن كورگەن كورشىلەر تابىلدى. قۇقىق قورعاۋشىلار كۇدىكتى قىزدى بىردەن قاماۋعا الدى. تەرگەۋ ەكسپەريمەنتىن جۇرگىزۋشىلەر قىلمىس ورنىن كورسەتۋگە شىققاندا كۇدىكتىنىڭ ءوزىن وتە ادەپسىز ۇستاعانىن ايتتى. «كىناسىن مويىنداپ, جاساعان ىسىنە وكىنىشىن بىلدىرگەنىنە قاراماستان, قىز وقيعا ورنىن كورسەتىپ جۇرگەندە, ىلعي جىميىپ, كۇلۋمەن ءجۇردى», - دەپ اتاپ ءوتتى ولار. قۇرىش نۇرىمبەت. دەرەك, سۋرەت: Tengrinews.kz.