اكادەميستەردىڭ 2023-2024 وقۋ جىلىنداعى جەتىستىكتەرىن ەسكە الا وتىرىپ, اكادەميانىڭ ەكىنشى قۇرامىنىڭ بارلىق كونتسەرتى زور تابىسپەن وتكەنىن ايتا كەتۋىمىز كەرەك. جاس سوليستەر ك.بايسەيىتوۆا اتىنداعى كامەرالىق زال ساحناسىندا ونەر كورسەتىپ, اسىرەسە كورەرمەنگە ەرەكشە اسەر سىيلاعان «براۆو, وپەرا!» كونتسەرتىن ۇسىندى. سونداي-اق كلاسسيكالىق مۋزىكانى ۇناتاتىن جاندار XI تەاتر ماۋسىمى بويى «استانا وپەرا» رەپەرتۋارىندا ۇسىنىلعان وپەرالىق سپەكتاكلدەردە تىڭداۋشىلاردى تامساندىردى.
اكادەميا تىڭداۋشىلارىنىڭ ءبىلىم الۋ بارىسى قارقىندى جانە ءتۇرلى فورماتتا وتكەن. ماسەلەن, كوكشەتاۋلىق باريتون بەكۇلان ەربولات ۇلى مەن استانالىق تەنور نۇرسۇلتان انۋاربەك الەمگە ايگىلى التشى ءارى ديريجەر يۋري باشمەت ارتىستىك ديرەكتورى بولىپ تابىلاتىن XVII قىسقى ونەر فەستيۆالى اياسىندا سوچيگە وقۋعا شاقىرىلدى. سوليستەر ۇزدىك ۇستازدار مەن مۋزىكا قايراتكەرلەرىنىڭ شەبەرلىك ساباقتارى مەن دارىستەرىنە قاتىسىپ, قورىتىندى كونتسەرتتە ونەر كورسەتتى.
الەمگە ايدىك يتاليالىق كوۋچ-پيانيست ءارى ديريجەر الەسساندرو بەنيني مەن وزيمو قالاسىنداعى ۆوكال اكادەمياسىنىڭ پروفەسسورى اللا ءسيمونيشۆيليدىڭ شەبەرلىك ساباقتارى جىلدىڭ ەڭ ايتۋلى وقيعالارىنىڭ بىرىنە اينالدى. ماەسترولار جاس انشىلەردى گ.دونيتسەتتيدىڭ «قوڭىراۋ نەمەسە ءدارىحاناشىنىڭ نەكە ءتۇنى» وپەراسىنىڭ پرەمەراسىنا, سونداي-اق وسى كومپوزيتوردىڭ «ماحاببات سۋسىنى», پ.چايكوۆسكيدىڭ «يولانتا» قويىلىمدارىنا دايىندادى. وتاندىق ۇستازدار, ديريجەرلەر مەن كونتسەرتمەيستەرلەر دە جاس ارتىستەردىڭ قالىپتاسۋى جولىندا قاجىرلى جۇمىس اتقارعان. قازاقستاننىڭ ەڭبەك سىڭىرگەن قايراتكەرلەرى جۇپار عابدۋللينا مەن ازامات جىلتىركوزوۆ كۇن سايىن ولاردىڭ ۆوكالدىق شەبەرلىكتەرى مەن ساحنالىق ونەرلەرىن ۇشتاپ وتىردى.
اكادەميا تىڭداۋشىلارىنىڭ جەتكەن جەتىستىكتەرى زور. اتاپ ايتساق, فيرۋزا راحمەتوۆا نۇرجامال ۇسەنباەۆانىڭ ءبىرىنشى حالىقارالىق ۆوكالدىق ونەر بايقاۋىندا ەكىنشى ورىن يەلەنىپ, جۇلدەگەر اتاندى. ونىڭ ارىپتەسى لەيلا الامانوۆا ازەربايجان استاناسى باكۋدە وتكەن بيۋلبيۋل اتىنداعى IX حالىقارالىق ۆوكاليستەر بايقاۋىندا ەكىنشى ورىنعا قول جەتكىزدى. نەماتيللو زكرۋللاەۆ گرۋزيا استاناسى تبيليسيدە وتكەن وتار تاكتاكيشۆيلي اتىنداعى ءۇشىنشى حالىقارالىق «Rondo-Klasika» بايقاۋىندا ەكىنشى ورىن يەگەرى اتاندى. ونەر جولىنداعى بۇل جەتىستىكتەر اكادەميانىڭ جاس ۆوكاليستەرى جەتكەن جوعارى شەبەرلىك دەڭگەيىن كورسەتەتىنى انىق.
«بۇل جىل مەن ءۇشىن شىنىمەن ۇمىتىلماستاي بولدى. ۇزدىك ۇستازداردان ءبىلىم الىپ, تەاتردىڭ بەدەلدى ساحنالارىندا ونەر كورسەتۋگە بىرەگەي مۇمكىندىك الدىم. اكادەميا جاڭا ءبىلىم بەرىپ, داعدىنى قالىپتاستىردى, سونداي-اق ءوز كۇشىمىزگە دەگەن سەنىمدىلىكتى وياتتى», دەيدى سوپرانو فيرۋزا راحمەتوۆا.
ال حورۆاتيالىق باريتون يۋريتسا يۋراسيچ كاپۋن مەن رەسەيدەن كەلگەن سوپرانو اناستاسيا رەمەسكوۆا اتالعان جوبا وپەرا ونەرىن تەرەڭىرەك تۇسىنۋگە جول اشقانىن اتاپ ءوتتى.
«اكادەمياداعى وقۋ بىزگە وپەرا ونەرىن ءتۇسىنۋ تۇرعىسىنان جاڭا بەلەستەردى اشتى. ءاربىر شەبەرلىك سىنىپتارى, ءاربىر دايىندىق جاڭا, قۇندى تاجىريبە الا كەلدى. جاس دارىنداردى دامىتۋدا اكادەميا ماڭىزدى ءرول اتقارادى جانە دە ءبىز وسىناۋ ءۇردىستىڭ بولشەگى بولعانىمىزعا قۋانىشتىمىز», دەدى اناستاسيا رەمەسكوۆا.
«Astana Opera» حالىقارالىق وپەرا اكادەمياسىنىڭ اتقارۋشى ديرەكتورى ايسۇلۋ ءتاني تۇلەكتەرگە ءوز باعاسىن بەرىپ, ولاردىڭ ءبىر جىل بويى جوعارى شەبەرلىك پەن ارتىستىك دەڭگەيلەرىن پاش ەتكەندەرىن, ولار بۇعان وقۋ بارىسىندا قول جەتكىزگەنىن اتاپ ءوتتى.
«مەن ولاردىڭ جەتىستىكتەرىن ماقتان ەتەمىن جانە سوليستەر وپەرا الەمىندە ءوز مانساپتارىن ويداعىداي جالعاستىراتىنىنا سەنىمدىمىن. ءبىز وسى كۇزدە اكادەميستەردىڭ جاڭا قۇرامىن اسىعا كۇتەمىز جانە ولار دا سونداي قۋانىش پەن شابىت اكەلەدى دەگەن ۇمىتتەمىز. تۇلەكتەرىمىزگە ساتتىلىك پەن جاڭا شىعارماشىلىق جەڭىستەر تىلەيمىن», دەدى ايسۇلۋ ءتاني.
ءيا, اتالعان اكادەميانىڭ ەكىنشى شىعارىلىمى العاشقى قۇرام تۇلەكتەرىنەن ەش كەم ەمەس, تالانتتى ءارى زەرەك بولعان.
ەسكە سالساق, «Astana Opera» حالىقارالىق وپەرا اكادەمياسى 2019 جىلى اشىلدى. 2023-2024 وقۋ جىلىندا مۇندا ەلىمىزدەن جانە شەتەلدەردەن جاس ورىنداۋشىلار بىلىكتىلىكتەرىن ارتتىردى. ەكى كۋرستىڭ دا تۇلەكتەرى ماماندىقتى ءساتتى باستاپ, ەلىمىزدە ءساتتى جۇمىس ىستەپ جاتىر. ءتىپتى شەتەلدە دە سۇرانىسقا يە.
