باتىس قازاقستاندا سايلاۋشىلاردىڭ 96,5 پايىزى داۋىس بەردى

ورال. 26 ءساۋىر. باتىس قازاقستان وبلىسىندا پرەزيدەنت سايلاۋى كۇنىنىڭ ەكىنشى جارتىسىندا ەلەكتورالدىق بەلسەندىلىك دەڭگەيى ارتقانى بايقالدى. بۇل تۋرالى egemen.kz ءتىلشىسى حابارلادى. ايتالىق, مۇندا ساعات 14:00-دە داۋىس بەرۋ تىزىمىنە تىركەلگەن 404 465 سايلاۋشىنىڭ 67,13 پايىزى داۋىس بەرگەن. بۇل پايىزدىق كورسەتكىش ساعات 16:00 مەن 18:00-دە تيىسىنشە 79,01 جانە 90,16-نى قۇرادى. ال كەشكى ساعات 20:00-دە, ياعني, باتىسقازاقستاندىق سايلاۋشىلاردىڭ داۋىس بەرۋ ۇدەرىستەرى قورىتىندىلانار كەزدە اتالعان كورسەتكىش 96,51 پايىزعا جەتتى. داۋىس بەرۋ كەزىندە وعان وتاندىق جانە شەتەلدىك بايقاۋشىلاردىڭ قالىڭ توبى قاتىستى. ولاردىڭ ەلەۋلى بولىگىن قازاقستاندىق ازاماتتىق اليانس وكىلدەرى قۇرايدى. سولاردىڭ ءبىرى – «ابىروي» قوعامدىق بىرلەستىگى جانىنداعى پرەزيدەنتتىك سايلاۋدى باقىلاۋ جونىندەگى شتابتىڭ ۇيلەستىرۋشىسى اسقار شايعۇماروۆ بايقاۋشىلاردىڭ قىزمەتى جونىندە: «پرەزيدەنت سايلاۋى كۇنى ءبىزدىڭ تاۋەلسىز باقىلاۋشىلار توبى ورال قالاسىنداعى 16 ۋچاسكەدە ءوز قىزمەتتەرىن اتقاردى. سونداي-اق, ونداعان ەرىكتىلەر سايلاۋ ۇدەرىستەرىن باقىلاۋعا مۇمكىندىك الدى. بۇل, ارينە, ونشا كوپ ادام ەمەس. ايتسە دە, مۇنىڭ ءوزى ازاماتتىق اليانس وكىلدەرىنىڭ باستى ەلەكتورالدىق ناۋقانعا بەيجاي قاراي المايتىنىن كورسەتەدى. مۇنداي ازاماتتىق ۇنقاتۋ ولاردىڭ بەلسەندى ۇستانىم جولدارىنا بەل شەشە كىرىسە باستاعانىن كورسەتەدى. مۇنداعى ماقسات – بىرەۋ عانا. بۇل سايلاۋ كوميسسيالارىنان ادىلدىك پەن تازالىقتى جانە زاڭداردىڭ ساقتالۋىن تالاپ ەتۋ», – دەدى. ءتۇيىپ ايتقاندا, ەلىمىزدىڭ باتىستاعى قاقپاسى ورال وڭىرىندە ەل ەرتەڭىن ايقىندايتىن ەلەۋلى كۇن – پرەزيدەنت سايلاۋى جوعارى ازاماتتىق بەلسەندىلىك پەن ءورشىل كوڭىل-كۇي جانە جارقىن دا شات-شادىمان مەرەكە جاعدايىندا ءوتتى. بۇعان كەلتىرەر مىسالدار دا جەتكىلىكتى. ماسەلەن, ءدال بۇگىن وتباسىن قۇرعان جاس جۇبايلاردىڭ داۋىس بەرۋ ءۇشىن قول ۇستاسىپ, ءوز تاڭداۋلارىن جاساۋ ءۇشىن سايلاۋ ۋچاسكەسىنە بىرگە كەلۋى قانداي جاراسىمدى. ورال قالاسىنداعى №10 ورتا مەكتەپتىڭ جانىندا ورنالاسقان №428 سايلاۋ ۋچاسكەسىندە ءدال وسىنداي كورىنىسكە كۋا بولدىق. ولار 26 ءساۋىر كۇنى نەكە كۋالىكتەرىنە يە بولىپ ەرلى-زايىپتى اتانعان ازامات جانە اسەل ەسىمدى جاس جۇبايلار. تەمىر قۇسايىن. دەرەك, سۋرەت: egemen.kz.