«سايلاۋ دەموكراتيالىق ۇستانىمدار نەگىزىندە ءوتتى»

كوكشەتاۋ. 26 ءساۋىر. اقمولا وبلىسىندا سايلاۋعا كەشكە قاراي حالىقتىڭ 87 پايىزى داۋىس بەردى. سايلاۋدا تاڭەرتەڭ ەرتەمەن داۋىس بەرۋدىڭ باسى-قاسىندا جۇرگەن ازاماتتاردىڭ اراسىندا كوكشەتاۋ قالالىق ءماسليحاتىنىڭ حاتشىسى بورانباي بەگالين دە بولدى.  ول «نۇر وتان» پارتياسىنان بايقاۋشى رەتىندە قاتىستى. بۇگىن وسى ازاماتپەن اڭگىمەلەسكەنىمىزدە ول بىزگە سايلاۋدىڭ ءوتۋ بارىسى تۋرالى ايتىپ بەردى. بۇل تۋرالى egemen.kz ءتىلشىسى حابارلادى. «مەن كوكشەتاۋ قالاسىنداعى №6 سايلاۋ ۋچاسكەسىندەگى سايلاۋ بارىسىنا «نۇر وتان» پارتياسىنان بايقاۋشى بولىپ قاتىستىم. ساعات تۋرا 7.00-دە كوميسسيا توراعاسى, №1 ورتا مەكتەپتىڭ ديرەكتورى يرينا گولوۆچەنكو جىلى شىرايمەن قارسى الىپ, «قازاقستان رەسپۋبليكاسىنداعى سايلاۋ بارىسىن باقىلاۋ جونىندەگى رەسپۋبليكالىق قوعامدىق كوميسسيانىڭ» مۇشەسى ۆيكتور گەي جانە پرەزيدەنتتىككە ۇمىتكەر ءا.قۇسايىنوۆ شتابىنىڭ مۇشەسى سەرىك ەسماعامبەتوۆ ۇشەۋمىزدى ارنايى ورىنعا ورنالاستىردى», - دەدى ول. سودان كەيىن ول سايلاۋدىڭ ءوتۋ ءتارتىبى تۋرالى ويىمەن ءبولىستى. وندا بايقاۋشى تاڭەرتەڭ ەرتەمەن قازاقستان رەسپۋبليكاسىنىڭ ءانۇرانى ورىندالىپ, جۇرتشىلىقتىڭ كوزىنشە بيۋللەتەندەر ساقتالعان سەيفتىڭ اشىلۋىنا, ءمولدىر داۋىس بەرۋ جاشىگىنىڭ مورلەنۋى راسىمىنە قاتىسىپ, وسىنداعى بەس داۋىس بەرۋ كابيناسىن بايقاپ شىققاننى ايتتى. «كوميسسيا مۇشەلەرى تۇرعىنداردى ءتىزىم بويىنشا تولقۇجاتتارىمەن تەكسەرىپ, بيۋللەتەن العاندىعى جونىندە ارنايى جۋرنالعا قولدارىن قويدىرىپ وتىردى. كەلۋشىلەر تاراپىنان قانداي دا ءبىر تۇسىنىسپەۋشىلىك, ارتىق سۇراقتار قويۋ بايقالعان جوق. داۋىس بەرۋ ۇيىمشىلدىق جاعدايىندا وتكىزىلە باستادى», - دەدى بورانباي بەگالين. سونىمەن بىرگە ول ۋچاسكەلىك كوميسسيا تاراپىنان كونستيتۋتسيالىق زاڭنامانىڭ قاتاڭ ساقتالعانىن, مۇنىڭ ءوزى  داۋىس بەرۋدىڭ ءوز دارەجەسىندە وتۋىنە ىقپال ەتكەنىن جەتكىزدى. ونىڭ ايتۋىنشا, سايلاۋدا بەلسەندىلىك تە جوعارى بولدى. ساعات 16.00-دەگى مالىمەت بويىنشا داۋىس بەرۋشىلەردىڭ 87 پايىزى وزدەرىنىڭ ازاماتتىق پارىزىن وتەپ ۇلگەردى. سونداي-اق, سايلاۋ ۋچاسكەسىندە بۋفەتتىڭ جۇمىس ىستەۋى, مەكتەپ پەن قالا ونەرپازدارىنىڭ كونتسەرتتىك باعدارلاماسىنىڭ قويىلۋى مەرەكەلىك كوڭىل-كۇيدى وسىرە ءتۇستى. باقبەرگەن امالبەك. دەرەك, سۋرەت: egemen.kz