28 جىلدان كەيىنگى مەدالدىڭ سىڭعىرى
شامامەن وسىدان ءبىر اي بۇرىن «Egemen Qazaqstan» گازەتىندە «جۇلدەسىز 28 جىل» دەگەن تاقىرىپتا ماقالا جارىق كورگەن ەدى. سول ساراپتامادا ءبىز 1996 جىلى اتلانتادا الاۋى تۇتانعان وليمپيا ويىندارىندا وتاندىق نىسانا كوزدەۋشىلەرىمىز ءۇش جۇلدە العانى تۋرالى ايتا كەلە سول كەزدەن بەرى بىردە-ءبىر عالامدىق دودادا دارالانا الماعانىمىز جايىندا اشىنا جازعان ەدىك. بيىل سول ساتسىزدىكتىڭ سەڭى بۇزىلدى. پاريجدە قازاقستان قۇراماسىنىڭ قورجىنىنا العاشقى مەدالدى سالعان – ءدال سول سپورت ءتۇرىنىڭ وكىلدەرى. قۇرامىندا الەكساندرا لە مەن يسلام ساتپاەۆ سىندى مەرگەندەرى بار قازاقستان كومانداسى پنەۆماتيكالىق مىلتىقپەن 10 مەترلىك قاشىقتىقتان اتۋدان «كىشى» فينالدا گەرمانيانى 17:5 ەسەبىمەن ويسىراتا ۇتىپ, قولا مەدالدى ەنشىلەدى.
شيرەك عاسىرعا جۋىق ۋاقىتتان سوڭ جەڭىپ العان جۇلدەنىڭ دە ءجونى بولەك بولادى ەكەن. وعان جانكۇيەرلەرىمىز كادىمگىدەي قۋانىپ قالدى. ال وسى جارىستىڭ باس جۇلدەسىن قىتايلىق حۋان يۋيتين مەن شەن ليحاو ولجالاسا, وڭتۇستىك كورەيانىڭ وعلاندارى كىم دجي-حەن مەن پاك حا دجۋن كۇمىسپەن كۇپتەلدى.
– شىنىمدى ايتسام, قازىر قۋانىشىمدا شەك جوق. وسى جاتتىعۋ بويىنشا شاكىرتتەرىمنىڭ مەدال الاتىنىن الدىن الا سەزگەن ەدىم. ويتكەنى الەكساندرا مەن يسلامنىڭ اياقالىسىن كورىپ ءجۇرمىن. ەكەۋى دە الەمدىك دەڭگەيدە جۇلدەگە تالاسا الاتىن سپورتشىلار ەكەنىن الدەقاشان دالەلدەگەن. ولار ازيا چەمپيوناتى مەن الەم كۋبوگى كەزەڭدىك سايىستارىندا ءدال وسى باعدارلاما بويىنشا ۇنەمى فينالعا شىعىپ جۇرگەن. تەك سوڭعى ساتتە ساتتىلىك جولداس بولماي ءجۇردى. ال بۇل جولى كوزدەگەن ماقساتىمىزعا قول جەتكىزىپ, كوڭىلىمىز ءبىر مارقايىپ قالدى, – دەيدى قازاقستان ۇلتتىق قۇراماسىنىڭ باس باپكەرى ولگا دوۆگۋن.
ەستەرىڭىزدە بولار, 1996 جىلى اتلانتا وليمپياداسىندا سەرگەي بەلياەۆ ەكى رەت جەڭىس تۇعىرىنا كوتەرىلدى. ول 50 مەترلىك قاشىقتىقتان جاتىپ اتۋدا كۇمىس مەدالدى يەلەندى. ودان كەيىن بەلياەۆ ءۇش قالىپتا اتۋدا دا ءدال سول ناتيجەنى قايتالادى. ۆلاديمير ۆوحميانين 25 مەترلىك قاشىقتىقتان تاپانشا اتۋدا قولا مەدالدى موينىندا جارقىراتتى. بۇل ونىڭ وليمپيا ويىندارىنداعى ەكىنشى جۇلدەسى ەدى. سودان ءتورت جىل بۇرىن ۆوحميانين بارسەلوناداعى باسەكەدە تمد قۇراماسى ساپىندا ءۇشىنشى ورىنعا تابان تىرەدى. مىنە, ەندى ارادا 28 جىل وتكەننەن سوڭ قۇرالايدى كوزگە اتقان مەرگەندەرىمىز ساتسىزدىكتىڭ سەڭىن بۇزىپ, ءوز كورەرمەندەرىن قاتتى قۋانتتى.
جاقسىلىقتىڭ ارمانى, ەلدوستىڭ ەرلىگى
كوپ كەشىكپەي دزيۋدوشىلاردىڭ دوداسى باستالدى. 60 كگ سالماق دارەجەسىندە ەل نامىسىن ەلدوس سمەتوۆ قورعادى. نەگىزى داڭقتى بالۋاننىڭ وسى جولى وليمپياداعا بارۋىنىڭ ءوزى مۇڭ بولدى. ەلىشىلىك جارىستىڭ وزىندە وعان باسەكەلەس بولۋعا جارايتىن ەكى بىردەي ساقا سپورتشى تابىلدى. تىپتەن, نۇرقانات سەرىكباەۆ پەن ماعجان شامشادين سوڭعى ساتكە دەيىن وليمپيادالىق رەيتينگتە سمەتوۆتەن جوعارى تۇردى. سول سەبەپتى دە ۇلتتىق قۇراما باپكەرلەرىنە «تورتجىلدىقتىڭ باستى دوداسىنا وسى ۇشەۋىنىڭ قايسىسىن اپارساق» دەپ باس قاتىرۋلارىنا تۋرا كەلدى. سودان دزيۋدو سالاسىنىڭ باسى-قاسىندا جۇرگەن ماماندار ولاردى ءوزارا كۇرەستىرۋدى قۇپ كوردى. استانادا وتكەن تارتىستا ەلدوستىڭ اسىعى الشىسىنان ءتۇستى. ول نۇرقاناتتى دا, ماعجاندى دا ەڭسەرىپ, پاريجگە جول تارتتى.
فرانتسيانىڭ باس شاھارىندا ءبىز مۇلدەم باسقا سمەتوۆتى كوردىك. بۇرىنعىداي باس-كوزسىز العا ۇمتىلعان ەكپىندى شابۋىل جوق. ەسەيگەن ەلدوس ءار قيمىلىن تەك ەسەپپەن عانا جۇمسادى. اقىرىن ءجۇرىپ, انىق باستى. كوبىنە-كوپ قارىمتا شابۋىلعا جۇگىندى. ءار بەلدەسۋدە قارسىلاسىنىڭ بوساڭسىعان ءساتىن كۇتتى. سول مەزەتتە عانا ارىستانشا اتىلىپ, استىرتىن جوسپارىن جۇزەگە اسىردى. پاريج تاتاميىندەگى باستاپقى باسەكەلەردە جاستار اراسىنداعى ەۋروپا چەمپيونى, بەلگيالىق تورنيكە تساكادەۋو مەن قۇرلىق بىرىنشىلىگىنىڭ كۇمىس جۇلدەگەرى, ۋكراينالىق ديلشود حولماتوۆتى قاپى قالدىرسا, شيرەك فينالدا يان يۋن ۆەيمەن كۇش سىناستى. تايپەيدىڭ وكىلى دە ازۋلى ەدى. ونىڭ توكيو وليمپياداسىنىڭ ءفيناليسى, الەم چەمپيوناتىنىڭ ەكى دۇركىن جۇلدەگەرى, ازيا ويىندارىنىڭ جەڭىمپازى دەگەن اتاعى بار. سونىمەن قاتار يان قازىرگى كەزدە دۇنيەجۇزىلىك رەيتينگتە كوش باستاپ تۇر. وتە ساۋاتتى تاكتيكا قۇرعان سمەتوۆ ءدال سول ءدۇلدۇلدى باسەكەنىڭ اياقتالۋىنا تۋرا ءبىر مينۋت قالعاندا «ۆازاريگە» ءتۇسىردى.
جارتىلاي فينالدا عالىمجان جىلكەلديەۆتىڭ شاكىرتىن فرانسيسكو گارريگوس كۇتىپ تۇردى. يسپانيا دزيۋدوشىسى دا – كوپتى كورگەن كوكجال. ول – 2021 جىلعى الەم چەمپيوناتىنىڭ قولا جۇلدەگەرى, 2023 جىلعى الەم چەمپيونى, ەۋروپا بىرىنشىلىگىنە ءۇش التىن جانە ءۇش قولا مەدالدى موينىندا جارقىراتقان ساقا سپورتشى. سونىڭ الدىندا عانا گارريگوس جاپونيانىڭ جۇلدىزى ريۋدزيۋ ناگايامانى قىلقىندىرىپ تاستاپ, ەسىنەن تاندىرعانى تاعى بار. بىراق پيرەنەي تۇبەگىنەن كەلگەن تارلان ەلدوستىڭ الدىندا دارمەنسىزدىك تانىتتى. قازاقتىڭ قايسار ۇلى ونىڭ دا تاس-تالقانىن شىعاردى.
«ەر كەزەگى – ۇشكە» دەپ اتام قازاق تەگىن ايتپاعان عوي. بۇعان دەيىن سمەتوۆتىڭ وليمپيا ويىندارىندا ەكى رەت جەڭىس تۇعىرىنا كوتەرىلگەنىن جانكۇيەرلەر جاقسى بىلەدى. 2016 جىلى جالىنداپ تۇرعان 24 جاسىندا ول ريو-دە-جانەيرودا كۇمىس مەدالدى يەلەندى. 2021 جىلى جۇلقىنىپ تۇرعان 29 جاسىندا توكيودا قولانى قاناعات تۇتتى. مىنە, ەندى ءۇشىنشى مارتە باس جۇلدە ءۇشىن تالاسۋ مۇمكىندىگىنە يە بولىپ وتىر. قانداسىمىز ول مۇمكىندىكتى قالت جىبەرگەن جوق. فينالدا ءوز ەلىندە, ءوز جەرىندە, ءوز كورەرمەندەرىنىڭ كوز الدىندا فرانتسيانىڭ ماقتانىشى, توكيو وليمپياداسىنىڭ قولا جۇلدەگەرى, ەۋروپا چەمپيونى لۋكا محەيدزەنى الىپ ۇرعان قازاقتىڭ ءور مىنەزدى ورەنى وليمپيا ويىندارىنىڭ جەڭىمپازى اتاندى. بۇل اتاققا ەلدوس 32 جاسىندا قول جەتكىزدى.
ءدال وسى ءساتتى الاش جۇرتى تابانى كۇرەكتەي 44 جىل كۇتكەن ەدى. كۇرەس تۇرلەرىن سەرىك ەتكەن قازاق بالۋاندارى العاش جانە سوڭعى رەت 1980 جىلى ماسكەۋدەگى ويىنداردا التىن تۇعىردان قول بۇلعادى. كەلمەسكە كەتكەن الىپ يمپەريانىڭ باس شاھارىندا گرەك-ريم كۇرەسى شەبەرلەرى جاقسىلىق ۇشكەمپىروۆ پەن ءشامىل سەرىكوۆ اتوي سالدى. سول كەزدە جاقسىلىق اعامىز جەڭىس تۇعىرىندا «بىزدەن كەيىن قازاقتان وليمپيادا چەمپيوندارى كوپتەپ شىقسا عوي...» دەپ جىلاپ تۇرىپ ايتقان ەدى. ءيا, ودان كەيىن الاش توپىراعىنان اپايتوستەر كوپتەپ شىقتى. تورتجىلدىقتىڭ باستى دوداسىندا كۇمىسپەن دە كۇپتەلدىك, قولاعا دا قول سوزدىق. بىراق كوپكە دەيىن باس جۇلدە بۇيىرمادى. مىنە, ەندى اراعا 44 جىل سالىپ, الاش جۇرتىنىڭ اسقاق ارمانى ورىندالدى. ەلدوس سمەتوۆتەي دارا تۋعان تۇلعا پاريجدە قارسى كەلگەندەردى الىپ تا, شالىپ تا جىعىپ, وليمپيادا چەمپيونى اتاندى. بۇل – قازاقستان دزيۋدو تاريحىنداعى وليمپيا ويىندارىنىڭ العاشقى التىن مەدالى!
ماراپاتتاۋ راسىمىنەن كەيىن ەل ماقتاعان ەلدوس: «مۇمكىن ەمەس ەشنارسە جوق. سوعان كوزىم جەتتى. ەگەر نيەت بولسا, ءبارىن دە جەڭۋگە بولادى. ءبارى دە قولدان كەلەدى ەكەن. جاقسىلىق ۇشكەمپىروۆ اتامىزدىڭ ارمانى ورىندالىپ, جەكپە-جەك تۇرلەرىنەن قازاقتان وليمپيادا چەمپيونى شىقتى. وتە قۋانىشتىمىن», دەپ ءتىل قاتتى.
ەل ماقتاعان ەلدوستىڭ ەرلىگىن قايتالاۋعا ءابيبا ابۋجاقىنوۆا دا ءبىر تابان جاقىندادى. قازاقتىڭ قايسار قىزىنىڭ سوڭعى كەزدەرى ءوزى قاتىسقان جارىستاردىڭ تۇگەلگە دەرلىگىنەن ولجالى ورالعانىنا ءدۇيىم جۇرت كۋا. ول 2022 جىلى ۇلانباتىرداعى گراند-سلەمدە – قولا, استاناداعى ازيا چەمپيوناتىندا – كۇمىس, تاشكەنتتەگى الەم چەمپيوناتىندا – قولا, ابۋ-دابيدەگى گراند-سلەمدە – قولا, 2023 جىلى الماداعى گران-پريدە – التىن, پاريجدەگى گراند-سلەمدە – قولا, تبيليسيدەگى گراند-سلەمدە – قولا, حانچجوۋداعى ازيا ويىندارىندا – كۇمىس, 2024 جىلى وديۆەلاستاعى گران-پريدە – قولا, باكۋدەگى گراند-سلەمدە – قولا, تاشكەنتتەگى گراند-سلەمدە – كۇمىس, انتالياداعى گراند-سلەمدە – قولا جانە تاشكەنتتەگى الەم چەمپيوناتىندا قولا مەدالدى يەلەندى. بايقاساڭىزدار, 2022 جىلدان بەرى قانداسىمىز 12 رەيتينگتىك جارىستا جەڭىس تۇعىرىنا كوتەرىلدى. بيىلدىڭ وزىندە ابۋجاقىنوۆا ءوزى باق سىناعان التى حالىقارالىق دودالاردىڭ بەسەۋىندە اتوي سالدى. ونداي تۇراقتىلىعىمەن ەلىمىزدىڭ بىردە-ءبىر دزيۋدوشىسى ماقتانا المايتىنى انىق. سول سەبەپتى دە قازاق جانكۇيەرلەرى ءابيبا پاريجدە دە اتوي سالادى دەپ ۇمىتتەندى.
جارىستى ابۋجاقىنوۆا جاقسى باستادى. يزرايلدىك شيرا ءريشونيدى تاكتيكالىق تۇرعىدان ۇتسا, تايپەيلىك لين چەن-حاونى 17 سەكۋندتا الىپ ۇردى. شيرەك فينالدا يسپانيالىق لاۋرا مارتينەس ابەلەندامەن تەڭ دارەجەدە ايقاسىپ جاتىپ, ابايسىزدا ونىڭ «قاقپانىنا» ءتۇسىپ قالدى. ەۋروپا چەمپيوناتىنىڭ قولا جۇلدەگەرىنەن ايقىن ۇتىلسا دا, ابيباعا دەگەن سەنىمىمىز سەيىلگەن جوق. ويتكەنى تۇرىمتايداي قىزدىڭ بويىندا وجەت مىنەز بەن قايسارلىق بار. سول قاسيەتتەرىنىڭ ارقاسىندا ول تالاي ءدۇبىرلى دۇرمەكتە دارالاندى. ءيا, جارىستىڭ جالعاسى جامان بولعان جوق. جۇبانىش بەلدەسۋىندە پاراگۆايلىق گاربريەلا نارۆاەستى «وساەكومي» ادىسىنە سالىپ, ياعني تاتاميدە 20 سەكۋند تىرپ ەتكىزبەي ۇستاپ, تازا جەڭدى. سودان قولا مەدال ءۇشىن تارتىس باستالدى. قارسىلاسى – تارا بابۋلفات. 18 جاستاعى شۆەتسيانىڭ جاس جۇلدىزىمەن ايقاسقان ابۋجاقىنوۆانى ءبىز مۇلدەم تانىماي قالدىق. ول تىم بوساڭ شىقتى. سىلبىر قيمىلداپ, تىزگىندى قارسىلاسىنا بەرىپ قويدى. سكانديناۆيا تۇبەگىنەن كەلگەن سۇلۋ ول مۇمكىندىكتى قالت جىبەرمەي, ءبىزدىڭ قىزدى قاپى قالدىردى. ناتيجەسىندە, جەڭىس تۇعىرىنا كوتەرىلۋگە ءتيىس ءابيبا بەسىنشى ورىندا قالىپ قويدى. اسا جەڭىل سالماقتىڭ باس جۇلدەسىن جاپونيالىق ناتسۋمي تسۋنودا جەڭىپ الدى.
عۇسماننان عۇسمانعا دەيىن
حح عاسىردىڭ 50-60 جىلدارى عۇسمان قوسانوۆ ەسىمدى مىقتى سپورتشىنىڭ بولعانىن ءوز قاراقتى جانكۇيەرلەر جاقسى بىلەدى. قىسقا قاشىقتىققا جۇگىرۋدە ول الدىندا جان سالماي, تالاي رەكوردتىق كورسەتكىشكە قول جەتكىزدى. كەڭەس وداعى چەمپيونى بولدى, كسرو حالىقتارى سپارتاكياداسىندا كۇمىس الدى, تالاي ءدۇبىرلى دودالاردا دارالاندى. سەمەي وبلىسى تۋماسىنىڭ ماڭدايىنا قازاق جاستارى اراسىنان شىققان تۇڭعىش وليمپيادا جۇلدەگەرى اتانۋ باقىتى بۇيىردى. اتاپ ايتساق, 1960 جىلى ريم وليمپياداسىنىڭ قۇرامىندا عۇسمان قوسانوۆ پولتاۆالىق لەونيد بارتەنەۆ, باكۋلىق يۋري كونوۆالوۆ جانە لەنينگرادتىق ەدۆين وزولين سىندى سپورتشىلارى بار كسرو قۇراماسى 4ح100 ەستافەتاسىندا كۇمىس مەدالدى مويىندارىنا ءىلدى. 1965 جىلى قوس قازاق قوسانوۆ پەن ءامين تۇياقوۆ جانە وزولين مەن نيكولاي پوليتيكو ساياسي ماڭىزى بار سايىس – كسرو-اقش جەلاياقتارىنىڭ ماتچتىق كەزدەسۋىنىڭ جەڭىمپازى اتاندى.
ارادا 60 جىل وتكەننەن سوڭ قازاق دالاسىنان تاعى ءبىر عۇسمان شىقتى. ول – عۇسمان قىرعىزباەۆ. بىراق تۇركىستان وبلىسىنىڭ تۋماسى جەڭىل اتلەتيكانى ەمەس, دزيۋدونى تاڭدادى. ءوز نەسىبەسىن وسى سپورت تۇرىنەن تاپتى. 2019 بەن 2022 جىلدارى ءال-فۋدجايرا مەن استانادا ازيا بىرىنشىلىگىنىڭ قولا جۇلدەسىن يەلەندى, 2021 جىلى بۋداپەشتتە الەم چەمپيوناتىنىڭ كۇمىس جۇلدەگەرى اتاندى. باسقا دا حالىقارالىق جارىستاردا جاسىنداي جارقىلدادى.
پاريج وليمپياداسىندا 66 كگ سالماقتا كۇرەسكەن عۇسمان كىل مىقتىلارمەن ايقاستى. ۇزدىكتەر تىزىمىندە قىرعىزباەۆ 26 ورىندا بولسا, العاشىندا جولىققان ءتورت قارسىلاسىنىڭ بارلىعى دا دۇنيەجۇزىلىك رەيتينگتە ودان جوعارى تۇر. سونىڭ ۇشەۋىن ول ۇتتى. تۇساۋكەسەر كەزدەسۋدە كانداسىمىز ەۋروپا چەمپيوناتىنىڭ كۇمىس جۇلدەگەرى, يسپانيالىق داۆيد گارسيا تورنەنى (№9) تىزە بۇكتىردى. ىلە-شالا ريو وليمپياداسىنىڭ كۇمىس, توكيو وليمپياداسىنىڭ قولا جۇلدەگەرى, الەم چەمپيونى, الەم چەمپيوناتىنىڭ ەكى دۇركىن قولا جۇلدەگەرى, ازيا ويىندارىنىڭ جەڭىمپازى, وڭتۇستىككورەيالىق ان باۋلدى (№13) ەكى جەڭنەن ۇستاپ, الىپ ۇردى. شيرەك فينالدىق سايىس تا قىرعىزباەۆ ءۇشىن اسا اۋىرعا سوقتى. الەم چەمپيوناتىنىڭ قولا جۇلدەگەرى, ەۋروپا چەمپيونى ۆاليد حياردى (№16) «گران-پالە-ەفەمەر» كەشەنىنە جينالعان كورەرمەندەر كەرەمەت قولدادى. جەرگىلىكتى دزيۋدوشىعا بۇيرەگى بۇرعان تورەشى باسەكە بەل ورتادان اسقان تۇستا ەكىنشى شيدو كورسەتتى. قازاق بالۋانىنا تاعى ءبىر ەسكەرتۋ بەرىلسە, ول جارىس جولىنان شىعىپ قالادى. ەرەجە سولاي. سودان نامىسقا تىرىسقان عۇسمان ايقاستىڭ اياقتالۋىنا 7 سەكۋند قالعاندا ءادىس جاساماق بولعان حياردى ۇستىنەن باسىپ قالدى دا, جەڭىستى ج ۇلىپ اكەتتى.
جارتىلاي فينالدا ۆيلليان ليمانى دا (№8) جەڭۋگە بولاتىن ەدى. كەزىندە جاستار اراسىندا الەم چەمپيونى اتانعان 24 جاستاعى برازيليالىق بالۋان پانامەريكا ويىندارىندا ەكى رەت جۇلدە الىپ, قۇرلىق بىرىنشىلىگىندە ءۇش مارتە توپ جارىپ, تاعى ەكى رەت جۇلدەگەرلەر ساناتىنا قوسىلدى. ودان بولەك, گراند-سلەم مەن گران-پري تۋرنيرلەرىندە ۇزدىكتەر قاتارىنان كورىندى. الايدا سول مەجەدە عۇسماننىڭ كۇرەسى جۇرمەدى. ول ليمانىڭ ىرقىنا وڭاي كونىپ, ونىڭ جەتەگىندە كەتتى. گولدەن-سكوردا ۆيلليون قانداسىمىزدى قاپى قالدىردى.
ءۇشىنشى ورىن ءۇشىن قىرعىزباەۆ ستراحانيا بۋنچيچپەن (№30) كەزدەستى. بويى سىرىقتاي سەربيانىڭ ساڭلاعى بويىنىڭ, قولى مەن اياعىنىڭ ۇزىندىعىن پايدالانعىسى كەلىپ, قازاقتى ءبىراز ابىگەرگە سالدى. ەرمەك ناسيەۆتىڭ شاكىرتى وعان كونبەدى. وڭتايلى ءبىر تۇستا ءبۋنچيچتىڭ وسال تۇسىن تاۋىپ, سىرتتان شالىپ قۇلاتتى. ءسويتىپ, عۇسمان قىرعىزباەۆ وليمپيا ويىندارىنىڭ قولا جۇلدەگەرى اتاندى. جارايسىڭ, جايساڭىم! ءبىر ايتا كەتەرلىگى عۇسمانعا دا وليمپيادا بەلەسى 32 جاسىندا باعىندى. ەل ماقتانىشىنا اينالعان قوس ساڭلاق تا 1992 جىلدىڭ كۇزىندە دۇنيەگە كەلگەن.
ايەلدەر اراسىندا 52 كگ سالماق دارەجەسىندە وزبەك قىزى ديورا كەلديەروۆاعا تەڭ كەلەر ەشكىم تابىلمادى. ەكىنشى كەزەڭدە ول وليمپيادا جانە الەمنىڭ ءتورت دۇركىن چەمپيونى ۋتە ابەدەن ايلاسىن اسىردى. سول كەزدە التى جىل بويى ادام بالاسىنا بەت قاراتپاعان جاپونيانىڭ اتاقتى دزيۋدوشىسىنىڭ ەڭكىلدەپ تۇرىپ جىلاعانىن كورسەڭىزدەر. ودان كەيىن دە كەلديەروۆا ەش كەدەرگىگە جولىقپادى. ول فرانتسيالىق اماندين بيۋشار (توكيو وليمپياداسىنىڭ كۇمىس جۇلدەگەرى, ارالاس كوماندالىق سايىستاعى وليمپيادا چەمپيونى, الەم چەمپيوناتىنىڭ بەس دۇركىن قولا جۇلدەگەرى, ەۋروپانىڭ ءۇش دۇركىن چەمپيونى) مەن كوسوۆالىق ديستريا كراسنيچيدى (توكيو وليمپياداسىنىڭ جەڭىمپازى, الەم چەمپيوناتىنىڭ ەكى دۇركىن قولا جۇلدەگەرى, ەۋروپانىڭ ەكى دۇركىن چەمپيونى) جولىنان ىعىستىردى. ءسويتىپ, ديورانىڭ ەسىمى دزيۋدودان وزبەكستاننان شىققان تۇڭعىش وليمپيادا چەمپيونى رەتىندە تاريحتا قالدى.
P.S. وليمپيا ويىندارىندا باسقا دا سپورت تۇرلەرىنەن باسەكەلەر كوپ. قازاقستاننىڭ سپورتشىلارىنىڭ ءبىرى ۇتىلسا, ءبىرى فينالدىق كەزەڭگە ءوتىپ, جۇلدەلى ورىندار ءۇشىن تالاسىپ جاتىر. قازاق جانكۇيەرلەرىن ەرەكشە ءبىر قىنجىلتقان جايت – وليمپيادانىڭ اشىلۋ سالتاناتىندا قازاقتىڭ كوك بايراعىن ۇستاپ شىققان اتاقتى بوكسشى, الەم جانە ازيا چەمپيونى, ازيا ويىندارىنىڭ ەكى دۇركىن جۇلدەگەرى اسلانبەك شىمبەرگەنوۆتىڭ العاشقى اينالىمنان اسا الماۋى. 71 كگ سالماقتا جۇدىرىقتاسقان قانداسىمىز يوردانيالىق زەياد يشايشكە ەسە جىبەردى. ال قالعان بوكسشىلارىمىز ازىرگە ءساتتى ونەر كورسەتىپ تۇر.
