بۇگىنگى تاڭدا تۋريستەردى تىركەۋ ميگراتسيالىق پوليتسيادا ەمەس, eQonaq بىرىڭعاي بازاسى ارقىلى جۇرگىزىلەدى. شەتەلدىك ساياحاتشىلار شىمقالاعا نەگىزىنەن وزبەكستان, رەسەي, قىتاي, ءۇندىستان, تۇركيادان كەلەدى. شەتەلدىكتەردىڭ كوشىن باستاپ تۇرعان – وسى مەملەكەتتەردىڭ ازاماتتارى. يسپانيا, يتاليا, ۇلىبريتانيا, گەرمانيا, اقش پەن اۋستراليادان كەلەتىن تۋريستەردىڭ دە سانى جەتەرلىك.
جالپى, ساياحاتشىلار بىرنەشە ماقساتپەن مەگاپوليستى تۋريستىك باعىت رەتىندە تاڭدايدى ەكەن. بۇل – بىرىنشىدەن, كيەلى ورىندارعا زيارات ەتۋ. بۇلارعا, كوبىنەسە, وزبەكستاندىق تۋريستەر بارادى. ماسەلەن, سايرامداعى قوجا احمەت ياساۋي بابامىزدىڭ اكە-شەشەسى جاتقان جەر يبراھيم اتا مەن قاراشاش انا كەسەنەسى بار. كورشى ەلدىڭ تۋريستەرى شىمكەنتكە قوناقتاپ, اراسىندا تۇركىستاندى دا كورىپ قايتادى. سونداي-اق وزبەكستاندىق ساياحاتشىلاردى قىزىقتىراتىنى – شوپينگ ەكەن, ياعني دۇكەن ارالاۋ. سەبەبى كوپتەگەن الەمدىك برەندتىك كيىمدەر ساتاتىن دۇكەندەر شىمكەنتتە ورنالاسقان. سوندىقتان وزبەك اعايىندار بىزدەن كەلىپ قىمبات كيىمدەر كيگەندى, كوسمەتيكا ساتىپ العاندى ۇناتادى ەكەن.
ال ەۋروپالىق تۋريستەردى ءبىزدىڭ ءومىر ءسۇرۋ سالتىمىز, تۇرمىس جاعدايىمىز بەن مادەنيەتىمىز كوبىرەك قىزىقتىراتىن كورىنەدى. ولارعا ينفراقۇرىلىم, قوناقۇيدىڭ جاعدايى ماڭىزدى ەمەس. بار بولعانى بۇرىنعى كوشپەلى حالىقتىڭ بۇگىنگى ءومىرىن كورگىسى كەلەدى. قالاعا كەلۋشى تۋريستەردىڭ باراتىن جەرى – ەسكى قورعان ورنالاسقان تسيتادەل, قۋعىن-سۇرگىن قۇرباندارىنا ارنالعان مۋزەي, تۇركىستان وبلىستىق ولكەتانۋ مۇراجايى مەن تاعى باسقا تاريحي-مادەني ورىندار. سونداي-اق شىمكەنتتە ءبىرىنشى رەت وندىرىستىك تۋريزم سالاسى قولعا الىنىپ وتىر. ياعني شەتەلدىك ساياحاتشى-بلوگەرلەر مەگاپوليستىڭ شىمكەنت سىرا زاۋىتى, بال تەكستيل كىلەم ونىمدەرى فابريكاسى, سايرامداعى ناۋبايحانالار, قالاعا ىرگەلەس جاتقان بورتە ميلكا ءسۇت ونىمدەرى فابريكاسى سەكىلدى ءوندىرىس ورىندارىن ارالاپ, ارنايى سيۋجەت ءتۇسىرىپ قايتادى. سونىمەن قاتار تۋريستەردى وڭتۇستىكتىڭ تامىلجىعان تابيعاتى دا قىزىقتىرادى. بۇل رەتتە ولار اقسۋ-جاباعىلى قورىعىنا, قاسقاسۋداعى دەمالىس ايماقتارىنا, سايرام-وگەم ۇلتتىق تابيعي پاركىنە بارعاندى ۇناتادى ەكەن.
قوناقۇيدە جاتۋى, كولىكتى پايدالانۋى, ءتۇرلى كادەسىيلار الۋى نەمەسە باسقا دا قوسىمشا سەرۆيستەردى قوسقاندا ءبىر تۋريست مەگاپوليستىڭ قازىناسىنا ءبىر كۇنگە 45-50 مىڭ تەڭگە تابىس اكەلەتىن كورىنەدى. بىلايشا ايتقاندا, ءبىر ءتۋريستىڭ ءبىر كۇندىك شىعىنى شامامەن 100 دوللاردى قۇرايدى.
ساياحاتشىلار نەگىزىنەن الەۋمەتتىك جەلى, سايت, ءبىر-بىرىنەن ەستۋ ارقىلى شىمكەنتتى تاۋىپ كەلىپ جاتادى. بيىل قىتايداعى قازاقستان ءتۋريزمى جىلىنا وراي بۇل ەلدىڭ دە تۋريستەرىنىڭ سانى ارتقان. وعان جىل باسىندا قىتايدا وتكەن تۋريستىك كورمە دە سەپ بولدى. اتالعان ءىس-شارا اياسىندا قوناقۇيلەرمەن, ودان بولەك تۋريستىك وپەراتورلارمەن ەكىجاقتى ىسكەرلىك بايلانىستار ورناتىلعان. ءبىز قولدانىپ جۇرگەن الەۋمەتتىك جەلىلەردىڭ كوپشىلىگى قىتايدا تىيىم سالىنعان ەكەن. وسىعان بايلانىستى جۋىردا شىمقالادا بلوك-تۋر ۇيىمداستىرىلىپ, وعان 30-عا جۋىق شەتەلدىك تانىمال بلوگەرلەر شاقىرىلىپ, شاھاردىڭ كورنەكتى ورىندارى تانىستىرىلدى. ولاردىڭ قاتارىندا قازاقستاننىڭ دا بەلگىلى بلوگەرلەرى بولدى. 300 مىڭعا جۋىق وقىرمانى بار شەتەلدىك بلوگەرلەر ەلىنە ورالعان سوڭ شىمكەنت تۋرالى ارنايى بەينەروليكتەرىن جاريالاعان. ال ونىڭ قارالىمى ميلليوننان اسىپ جىعىلىپتى. ياعني مەگاپوليستى تانىتۋ ماقساتىندا قالا اكىمدىگى وسىنداي ادىستەردى دە قولدانىپ جاتىر. بۇل دا جارنامانىڭ ءبىر ءتۇرى دەيدى مامان. ءبىر سوزبەن ايتقاندا, الەمدىك الەۋمەتتىك جەلىگە قوسىلماعان قىتايعا شىمقالانى تانىستىرۋدىڭ ەبىن قالا اكىمدىگى سول ەلدىڭ بلوگەرلەرىن قوناققا شاقىرىپ, ءوزىمىزدى جارنامالاتۋ ارقىلى دا تاۋىپ جاتىر.
تۋريستەردى قىزىقتىراتىن شىمكەنتتىڭ تاعى ءبىر ەرەكشە قاسيەتى – گاسترونومياسى. ويتكەنى مەگاپوليستە شىعىس اسحاناسىنىڭ ءيسى مەن ءدامى سەزىلىپ تۇرادى. قالادا تاماقتانۋدىڭ ءۇش ءتۇرلى دەڭگەي ساتىسى بار. بۇل – بىرىنشىدەن, قىمبات مەيرامحانالار. مۇنداعى ءبىر رەتتىك تاماقتانۋدىڭ چەك باعاسى 10 مىڭ تەڭگەدەن باستالادى. ەكىنشىدەن, باعاسى ورتا ءدامحانالار جەلىسى. بۇل جەردە كليەنت ءبىر رەتتىك تاماقتانعانىنا 3 مىڭ تەڭگەدەي اقشا جاراتادى. ءۇشىنشىسى – ارزان كوشە تاماقتارى. مۇندا جول-جونەكەي توقتاپ جەپ كەتەتىن سامسالار مەن كۆاس, ايران كوجەلەردى ايتۋعا بولادى. شەتەلدىك تۋريستەر وسىنىڭ بارلىعىن دا تاتىپ, تىلىمەن ءدامىن سەزىپ كورگىسى كەلەدى. سامسا كوشە تاماعى سانالعانىمەن, ونىڭ دا ءتىل ۇيىرەر ءدامى ەرەكشە. سوسىن سامسانىڭ تامشى, كەسە دەپ اتالاتىن نەشە ءتۇرلىسى تەك شىمكەنتتىڭ اسحانالارىنان تابىلادى. ماسەلەن, قالانىڭ 112 كۆارتال, 4 شاعىن اۋدانىندا وسى سامسانىڭ ءتۇر-ءتۇرىن دايىندايتىن ورىن بار. وتكەندەگى بلوك-تۋردا شەتەلدىك تۋريستەر سول جەرگە بارىپ, قازاق سامساسىنان ءدام تاتىپ كورىپتى.
جالپى, «Visit Shymkent» مەكەمەسى تۋريستىك سالانى دامىتۋ ماقساتىندا قىزمەت اتقارادى. ونىڭ ىشىندە تۋريستەرگە اقپارات بەرۋ, تۋروپەراتورلاردى ءبىر-بىرىمەن بايلانىستىرۋ سەكىلدى مىندەتتەردى موينىنا العان. سونداي-اق تۋريندۋستريا سالاسىندا كاسىپ باستاپ, تۋروپەراتورلىق نەمەسە تۋراگەنتتىك بيزنەس اشامىن دەگەن كىسىلەرگە ليتسەنزيا اپەرۋ, قۇجات راسىمدەۋ جاعىنان كومەك كورسەتەدى. رەسمي مالىمەت بويىنشا قالادا 140-تان اسا قوناقۇي, 100-دەن كوپ تۋريستىك وپەراتور مەن اگەنتتىك بار.
«كەيىنگى جىلدارى مەملەكەت تۋريزمگە قاتتى كوڭىل بولە باستادى. سەبەبى بۇل سالادان تۇسەتىن پايدا كوپ. ەۋروپا ەلدەرىن الساق, يسپانيا, فرانتسيادا بيۋدجەتتىك كىرىستىڭ باسىم بولىگىن تۋريزم قۇرايدى. تۇركيا ەلىندە دە سونداي. ءبىر كەزدە رەسەي وتانداستارىن تۇركياعا بارۋعا تىيىم سالعان كەزدە ولاردىڭ بيۋدجەتى اجەپتاۋىر ويسىراپ قالعان ەدى. ارينە, شىمكەنت تايلاند, تۇركيا, دۋباي سەكىلدى تابيعاتىمەن تۋريستەردى تارتا المايدى. دەگەنمەن مەگاپوليستىڭ دە وزىندىك قىزىقتىراتىن تۇستارى بار. بۇل – قالا ءتۋريزمى, سوسىن ىسكەرلىك تۋريزم. شەتەلدىك ءىرى ينۆەستورلارمەن كەلىسىمشارتتار ءتۇزۋ دە ءتۋريزمنىڭ دامۋىنا وڭ ىقپالىن تيگىزەدى. سونىڭ ءبىر ايعاعى – بۇگىندە شاھارعا بيزنەس اشسام دەگەن نيەتپەن كەلەتىن شەتەلدىك ينۆەستورلار سانى كوپ. ولار يندۋستريالدى, ارنايى ەكونوميكالىق ايماقتاردا بولىپ, ىشكى نارىقتىڭ جاعدايىمەن تانىسىپ قايتادى. سونداي-اق گاسترونوميالىق تۋريزم بار. بىراق شىمكەنتتىڭ ءدامدى ءارى ارزان تاماعىن ىزدەپ كەلۋشىلەر – ازىرگە ءوزىمىزدىڭ وتانداستار. ونىڭ ۇستىنە «ساندىق», «بوزجىرا» سەكىلدى قازاقتىڭ ۇلتتىق تاعامدارىن دايىندايتىن مەيرامحانالار قالادا وتە كوپ. وسى تۇستا ءبىر نارسەنى ايتقىم كەلگەنى شەتەلدىك تۋريستەر ەشقاشان جايلى كۇي, راحات ىزدەپ شىمكەنتكە كەلمەيدى. مۇندا ولاردى قىزىقتىراتىنى – بۇرىنعى كوشپەلى حالىقتىڭ قازىرگى تۇرمىسى مەن الەۋمەتتىك جاي-كۇيى. شەتەلدىك تۋريستەرگە قىمبات قوناقۇيگە توقتاعاننان گورى قازاقتىڭ كيىزۇيىندە دامىلداعان الدەقايدا قىزىق. ولار ەڭ الدىمەن سونى قالايدى», دەدى «Visit Shymkent» تۋريستىك اقپاراتتىق ورتالىعىنىڭ وكىلى باعدات پارداباي.
سونىمەن قاتار جۋىردا قالالىق تۋريزم, سىرتقى بايلانىستار جانە كرەاتيۆتى يندۋستريا باسقارماسى التى ايلىق جۇمىستارىن قورىتىندىلاپ ەسەپ بەرگەن ەدى. جيىندا اتالعان باسقارما باسشىسى بەكسۇلتان ءادىلحانوۆ شاھاردان تاعى ءبىر الەمگە ايگىلى بەس جۇلدىزدى قوناقۇيدىڭ ءبىرى «Hilton» قوناقۇيىنىڭ قۇرىلىسى شىمسيتي شاعىن اۋدانىنان باستالىپ, 2026 جىلى اياقتالاتىنىن جەتكىزدى. پرەزيدەنت تاپسىرماسىنا وراي ەلىمىزدە كرەاتيۆتى يندۋستريانى قولداۋ ماقساتىندا باسقارمانىڭ ۇيىمداستىرۋىمەن ءار سەنبى سايىن قالانىڭ اربات جاياۋ جۇرگىنشىلەر الاڭىندا ارنايى جارمەڭكە ءوتىپ تۇرادى. وندا وسى كاسىپپەن نان تاۋىپ وتىرعان جاندار ءوز دۇنيەلەرىن ساۋداعا شىعارادى. سالا باسشىسىنىڭ ايتۋىنشا, الداعى ۋاقىتتا باسقارما مەگاپوليستەن كرەاتيۆتى حاب ورتالىعىن اشىپ, باكۋ مەن سامارقاند قالالارىنا روۋد-شوۋ ۇيىمداستىرۋدى جوسپارلاپ وتىر.
شىمكەنت
