شىعىس قازاقستاندا شەتەلدىك باقىلاۋشىلار سايلاۋعا وڭ باعا بەردى

وسكەمەن. 26 ءساۋىر. ەلىمىز ءۇشىن ساياسي ماڭىزى زور ناۋقاننىڭ ءوتۋ بارىسىن باقىلاعان شەتەلدىك تاۋەلسىز باقىلاۋشىلار سايلاۋ بارىسىندا ەشقانداي زاڭبۇزۋشىلىقتاردىڭ ورىن الماعاندىعىن مالىمدەدى. بۇل تۋرالى egemen.kz ءتىلشىسى حابارلادى. سەرگەي پچەلياكوۆ – رەسەيدىڭ التاي ولكەسىنەن شىعىس وڭىرىندەگى سايلاۋ بارىسىن باقىلاۋعا كەلگەن دەلەگاتسيا قۇرامىنداعى 27 ادامنىڭ ءبىرى. ول ارىپتەستەرىمەن بىرگە وسكەمەن قالاسىنداعى بىرقاتار سايلاۋ ۋچاسكەلەرىندە تۇسكە دەيىن قىزمەت اتقارسا, كۇننىڭ ەكىنشى بولىگىندە وبلىستىڭ گلۋبوكوە اۋدانىنا ارنايى شىقتى. رۋبتسوۆسك قالاسى باسشىسىنىڭ ورىنباسارى رەتىندە قازاقستانداعى سايلاۋدا بىرقاتار ەرەكشەلىكتەردى بايقاعانىن جەتكىزدى. «مەن مۇنداي جاۋاپتى ناۋقانعا باقىلاۋشى رەتىندە ءبىرىنشى رەت قاتىسىپ وتىرمىن. ال ارىپتەستەرىمنىڭ اراسىندا 3-4 مارتە قاتىسقاندار بار. ءبىز وسكەمەن قالاسىنا 24 ساۋىردە كەلدىك. سودان بەرى بىرنەشە توپتارعا ءبولىنىپ, جۇمىس ىستەۋدەمىز. ءبىر توبىمىز 25 ساۋىردە زىريان اۋدانىنا اتتانىپ كەتتى. بۇگىن سول جاقتا جۇمىس ىستەدى. سايلاۋ ۋچاسكەلەرى اشىلا سالىسىمەن وسكەمەن قالاسىنداعى بەس سايلاۋ ۋچاسكەسىندە بولدىق. قازىر №82 جانە №83 سايلاۋ ۋچاسكەلەرىندە جۇمىس ىستەۋدەمىز. بايقاعانىمىز, جەرگىلىكتى تۇرعىندار وتە ساۋاتتى ەكەن. سايلاۋ تۋرالى جاقسى حاباردار ەتىلگەن, ءتيىستى شارالار جوعارى دەڭگەيدە ويداعىداي ۇيىمداستىرىلعانىن اتاپ وتكىم كەلەدى. ۋچاسكەلەر اشىلماي تۇرىپ كەلگەن سايلاۋشىلاردى بايقادىق. تۇسكى ساعات 11 جارىمعا دەيىن ءار ۋچاسكەلەرگە سايلاۋشىلاردىڭ 50 پايىزدان استامى كەلىپ, داۋىس بەرىپ ۇلگەردى. باقىلاۋشىلار تاراپىنان ەشقانداي زاڭبۇزۋشىلىقتار تىركەلگەن جوق», – دەيدى تاۋەلسىز باقىلاۋشى. سەرگەي ۆيكتوروۆيچتىڭ ايتۋىنشا, سايلاۋ بارىسىندا جاستاردىڭ بەلسەندىلىگى ەرەكشە نازار اۋدارتقان. ماسەلەن, جوعارى وقۋ ورنىندا ورنالاسقان №74 سايلاۋ ۋچاسكەسىندە كۇننىڭ العاشقى جارتىسىندا ستۋدەنت جاستاردىڭ باسىم بولىگى ءوز تاڭداۋلارىن جاساپ ۇلگەردى. تاۋەلسىز باقىلاۋشىلار توبى بولعان №82 جانە №83 سايلاۋ ۋچاسكەلەرى وسكەمەندەگى احمەت بايتۇرسىنوۆ اتىنداعى ورتا مەكتەپتىڭ عيماراتىندا ورنالاسقان. مۇندا نەگىزىنەن الماتى, ميحاەليس كوشەلەرىنىڭ تۇرعىندارى كەلىپ داۋىس بەردى. الدىڭعىسىندا تۇسكى ون ءبىر جارىمعا دەيىن بارلىق 848 سايلاۋشىنىڭ 466-سى كەلىپ تاڭداۋ جاساسا (55 پايىزى), سوڭعىسىندا 1 029 سايلاۋشىنىڭ 537-ءسى كەلىپ ۇلگەرگەن. «داۋىس بەرۋ تاڭەرتەڭگى 7-دە باستالدى. العاش بولىپ 18 جاستاعى وسى مەكتەپتىڭ 11-سىنىپ وقۋشىسى, «التىن بەلگىدەن» ۇمىتكەر ساعىنىش بايانبەكوۆا تۇڭعىش رەت ءوز تاڭداۋىن جاسادى. ودان سوڭ 74 جاستاعى قالا تۇرعىنى باتيح ابسادىقوۆ كەلدى. ولار بەلسەندىلىكتەرى ءۇشىن ەستەلىك سىيلىقتارمەن ماراپاتتالدى, – دەيدى №82 سايلاۋ ۋچاسكەسىنىڭ ءتورايىمى قانيپا مۇقىشەۆا. بۇل جەردەگى داۋىس بەرۋ بارىسىن باقىلاعان «نۇر وتان» پارتياسىنىڭ وسكەمەن قالالىق فيليالىنىڭ قوعامدىق باقىلاۋشىسى كۇلسارا داكەباەۆا دا سايلاۋ بارىسى ويداعىداي جۇرگەنىن, زاڭبۇزۋشىلىقتار ورىن الماعانىن مالىمدەدى. «وسى اۋداندا 15 جىلدان بەرى تۇرامىن. بىرنەشە سايلاۋلارعا قاتىستىم. ءبارى ويداعىداي ءوتتى. جارمەڭكە, كونتسەرتتىك باعدارلامالار جاقسى ۇيىمداستىرىلعان ەكەن. ۇيىمىزگە ءۇش مارتە كەلىپ سايلاۋ تۋرالى ايتىپ كەتتى. تىزىمنەن اتى-ءجونىمىزدى ەش قيىندىقسىز تاپتىق, وتباسىمىزبەن داۋىس بەردىك», – دەيدى قالا تۇرعىنى نادەجدا پاۋىتوۆا. دۋمان اناش, دەرەك: egemen.kz. سۋرەت: ليۋدميلا مالكو.