سولتۇستىك قازاقستاندا قارىز ديقاندار جاۋاپقا تارتىلادى

پەتروپاۆل. 22 قاڭتار. «ازىق-ت ۇلىك كەلىسىمشارت» كورپوراتسياسىنىڭ سولتۇستىك قازاقستان وبلىستىق فيليالى بەلشەدەن قارىزعا باتقان ديقانداردان بەرەشەگىن ەندى سوت ارقىلى ءوندىرىپ الۋدى كوزدەپ وتىر. بۇل تۋرالى egemen.kz ءتىلشىسى حابارلادى. بۇگىنگى كۇنى بەرگەن سەرت, ايتقان ۋادەدەن اينىپ وتىرعان بورىشكەرلەردىڭ قارىزى 264 ميلليون تەڭگەدەن اسىپ جىعىلادى. ديقاندار جىلقى جىلىنىڭ وتە اۋىر سوققانىن ايتقانىمەن, مۇددەلى ۆەدوموستۆونىڭ بۇل ۋاجدەرمەن ەش كەلىسكىسى جوق. اۋا رايىنىڭ كۇردەلىلىگى ەسكەرىلىپ, بيدايدى ساتىپ الۋ باعاسى كوتەرىلگەنىن, ماسەلەن, 3- سۇرىپتى بيدايدىڭ ءبىر تونناسى 42 مىڭ تەڭگەنى قۇراعانىن العا تارتادى. «اۋىل شارۋاشىلىعى تاۋار وندىرۋشىلەرىنەن 9,5 ميلليارد تەڭگەگە 265 مىڭ توننا استىق ساتىپ الدىق. بۇلار – ءۇشىنشى, ءتورتىنشى, بەسىنشى سۇرىپتى بيداي جانە ارپا داقىلدارى. قابىلداۋ جۇمىستارى جالعاسقانىمەن, ءوز مىندەتتەرىنەن جالتارىپ جۇرگەندەر جوق ەمەس. سوعان قاراماستان وڭىردەگى شارۋا قوجالىقتارىن قارجىلاندىرۋ باعدارلاماسىن جۇزەگە اسىرىپ جاتىرمىز. اتاپ ايتقاندا, نەسيەگە 37 مىڭ توننا تۇقىم بەرۋدى جوسپارلاپ وتىرمىز», دەيدى «ازىق-ت ۇلىك كەلىسىمشارت كورپوراتسياسى» ۇك» اق سولتۇستىك قازاقستان وبلىسى بويىنشا وكىلدىگىنىڭ ديرەكتورى رۋستام جاناتاەۆ. ونىڭ ايتۋىنشا, وتكەن جىلى 1,5 ميلليارد تەڭگەگە 100-دەن استام اۋىل شارۋاشىلىعى تاۋار وندىرۋشىلەرى قارجىلاندىرىلىپتى. جاعدايلارىنا قاراپ, نەسيە مەرزىمى ۇزارتىلىپتى. ەندى ونىڭ ۋاقىتى سوزىلىپ كەتسە, سوتقا جۇگىنۋدەن باسقا امال قالماعانعا ۇقسايدى. ناۋرىزدان باستاپ «ازىق-ت ۇلىك كەلىسىمشارت» كورپوراتسياسى كوكتەمگى, كۇزگى دالا جۇمىستارىن اتقارۋعا جەڭىلدەتىلگەن نەسيە بەرە باستايدى. ال قىركۇيەك ايىنا دەيىن ۇن ۇگۋ كومبيناتتارىنا ارزان باعامەن بيداي جەتكىزىپ تۇرۋ بەلگىلەنگەن. الايدا, ۇكىمەت تاراپىنان جاسالىپ جاتقان وسىنداي قامقورلىقتاردى پايدالانىپ الىپ, ات-توندارىن الا قاشىپ جۇرگەن بورىشكەرلەردىڭ بۇل ارەكەتى ەش اقتاۋعا جاتپايدى. ءومىر ەسقالي. دەرەك: egemen.kz. سۋرەت: «قازاقپارات».