فوتو: ۇلتتىق سپورت قاۋىمداستىعىنىڭ ءباسپاسوز قىزمەتى
اۋقىمدى سپورتتىق شاراعا 10-نان استام ەلدەن كوماندالار قاتىسادى. يران, تۇركيا, ۆەنگريا, قىرعىزستان, وڭتۇستىك افريكا رەسپۋبليكاسى رەسەي فەدەراتسياسىنىڭ جانە ت.ب. ەلدەردىڭ شاباندوزدارى ءدۇبىرلى دودادا باق سىنايدى.
ايتا كەتەرلىگى, قىرعىزستان قۇراماسى « ۇلى دالا جورىعىنا» قاتىساتىن ەڭ ۇزدىك اتتاردى ىرىكتەۋ ماقساتىندا كوپكۇندىك ات سپورتى مارافونىن وتكىزگەن.
قىرعىزستان ات سپورتى فەدەراتسياسىنىڭ ۆيتسە-پرەزيدەنتى ماناس سۇلتانوۆ « ۇلى دالا جورىعى» مارافون-بايگەسىنە شاقىرۋدى قابىلداۋ ۇلكەن مارتەبە ەكەنىن اتاپ ءوتتى.
«قازاقستاندا وتەتىن كوپكۇندىك ات جارىسىنا دايىندىق اياسىندا 300 شاقىرىمدىق قاشىقتىققا «كوچموندور جۋرۋشۋ» ىرىكتەۋ مارافونى ءوتتى. بارلىق كوماندالارعا ساتتىلىك تىلەيمىن جانە جەڭىمپازداردىڭ كوپ بولۋىن قالايمىن. ەڭ ءتوزىمدى جانە جىلدام سايگ ۇلىكتەر جەڭىسكە جەتىپ, تۇعىردان كورىنەتىنىنە سەنىمدىمىن», دەدى م.سۇلتانوۆ.
مارافون-بايگە 5 مىڭ جىلدان استام بۇرىن ادام بالاسى جىلقى مالىن العاش رەت قولعا ۇيرەتكەن سولتۇستىك قازاقستان وبلىسىنداعى بوتاي ەلدى مەكەنىندە 3 قىركۇيەكتە باستالادى.
« ۇلى دالا جورىعىنا» كاباردين-بالقار رەسپۋبليكاسىنىڭ قۇراماسى دا قاتىسۋعا دايىندالىپ جاتىر. «امد كاۆكاز» ات سپورتى كلۋبىنىڭ نەگىزىن قالاۋشى احەد ماحوۆ ەلىمىزدەن ات جارىسىنا قاتىسۋعا شاقىرتۋ العانىن اتاپ ءوتتى.
«مارافون-بايگەنىڭ بۇكىل ادامزات ءۇشىن كيەلى مەكەن سانالاتىن بوتاي قونىسىنان باستالۋى ەرەكشە ماڭىزدى. ءبىزدىڭ كوماندا اڭىزدار مەن تاريحي جادىگەرلەرگە تولى بوتاي جەرىنە بارۋعا ەرەكشە ىنتالى. ولاي بولسا, كۇت ءبىزدى, قازاقستان!», دەدى ا.ماحوۆ.
ايتا كەتەيىك, ات جارىسى استانادا 7 قىركۇيەكتە اياقتالادى. ونىڭ جەڭىمپازدارى 8 قىركۇيەكتە وتەتىن 5-ءشى دۇنيەجۇزىلىك كوشپەلىلەر ويىندارىنىڭ اشىلۋ سالتاناتىنا قاتىسادى.
« ۇلى دالا جورىعى» – جىلقىنىڭ ەڭ مىقتى تۇقىمى انىقتالاتىن دالالىق لابوروتورياسى.
ەسكە سالا كەتەيىك, «JORYQ» رەسپۋبليكالىق فەدەراتسياسى قازاقستان رەسپۋبليكاسى ۇلتتىق سپورت قاۋىمداستىعىنىڭ قۇرامىنا كىرەدى. سونىمەن قاتار قاۋىمداستىق قۇرامىنا بايگە, كوكپار, اۋدارىسپاق, اسىق اتۋ, ساداق اتۋ, جامبى اتۋ, تەڭگە ءىلۋ, قۇسبەگىلىك جانە ت.ب. فەدەراتسيالار كىرەدى. قازاقستان رەسپۋبليكاسىنىڭ ۇلتتىق سپورت قاۋىمداستىعىنا بەلگىلى كاسىپكەر, مەتسەنات, «التىن قىران» قورى قامقورشىلىق كەڭەسىنىڭ توراعاسى» يسلامبەك سالجانوۆ باسشىلىق ەتەدى.
