– اكەي, مىنە, مەنىڭ سىزگە كۇيەۋ بالا بولعانىما اتتاي ون بەس جىل تولىپتى. قىزىڭىزبەن تانىسپاي تۇرىپ, مەن سىزبەن تانىسىپپىن. قايدا, قاشان تانىسقانىمىز ەسىڭىزدە مە؟ – دەپ اتاسىنا سىناي ءتىل قاتتى.
– ەسىمدە ەمەي! سوندا كۋپەدە تانىسقاندا, سەن بالاڭ جىگىت ەدىڭ. ءالى ەسىمدە, العاش قوراپتاعى كومپيۋتەردى سەنەن كورىپ تاماشالاعانىم... ەسىڭدە شىعار, كومپيۋتەرىڭدى قىزىقتاپ, مازاڭدى العانىم... ودان ساعان ريزا بولعان باسىم ۆاگون رەستورانىنا اپاردىم ەمەس پە؟
– ءاپ, بارەكەلدى, اينا قاتەسىز سولاي بولعان... سىزدەن ءبىر بىلگىم كەلگەنى, بىزبەن بىرگە كۋپەدە ەڭگەزەردەي, سىمباتتى سپورتسمەن جىگىت بولىپ ەدى عوي؟
– ە, ءيا, ەسىمدە.
– سول جىگىت سىزدەن زۆونداپ الايىنشى دەپ تەلەفونىڭىزدى ەكى-ءۇش مارتە سۇراعاندا, نەعىپ بەرە قويمادىڭىز؟ جانە مەنى اپارعان رەستورانعا ونى نەعىپ ەرتپەدىڭىز؟ سوعان مەن ءالى كۇنگە تاڭعالامىن...
– ال ايتايىن. ال مەن وعان تەلەفونىمدى بەرە قويدىم دا, ونى رەستورانعا بىزبەن بىرگە شاقىرا قويدىم دەلىك... سودان ءوزىڭ سەكىلدى ونىمەن ۇرەمكە سوعىستىرىپ ءىشىپ, تانىس-ءبىلىس بولىپ, اعىل-تەگىل اڭگىمەمىز جاراسا كەتتى دەلىك. سودان وزىڭمەن بولعانداي كۋپەدە دە سىي-سياپاتىمىز جاراسىپ, ەرتەسىندە بىرگە ءتۇسىپ قيماي قوشتاسىپ, وعان دا ساعان بەرگەن مەكەنجايىمدى ايتا سالدىم دەلىك. سودان ول دا سەن سياقتى العاش كەلگەن ءبىزدىڭ قالامىزدان قوناقۇي ىزدەپ شارق ۇرىپ, وندا ورىن بولماي, باياعى مەنىمەن حابارلاسىپ, ودان ول مەنىڭ ۇيىمە ءوزىڭ سياقتى ۋاقىتشا تابان تىرەدى دەلىك... ال سودان ول مەنىڭ بويجەتكەنىممەن تانىسىپ, ءبىر-ءبىرىن ۇناتىپ... نە كەرەك, ول ەكەۋى سەندەر سەكىلدى كوپ وتپەي امپەي-جامپەي بولىپ... قىزىم قارا باسىپ, ودان ەكىقابات بولىپ قالعانىن جەتكىزىپ, ەكەۋى ۇيلەنەتىندەرىن ايتسا, مەن پاقىر كونبەي قايدا بارادى دەيسىڭ؟
– اكەي, سول كەزدە ۇيىڭىزگە تۇراقتاتىپ, اقىرى قىزىڭىزعا قوساق بولۋعا لۇقسات ەتكەن سىزگە ريزامىن.
– ە, مەن دە, وزىڭدەي ءبىزدىڭ قالاداعى كومپيۋتەردىڭ بىردەن-ءبىر قوجاسى بولىپ وتىرعان كۇيەۋ بالاما ريزامىن.
– سوندا دا ايتىڭىزشى, اناۋ كۋپەدەگى جىگىتكە نەعىپ تەلەفونىڭىزدى بەرە قويمادىڭىز؟
– ونى كورىپكەلدىگىم دەپ بىلەمىن... قالتاسىندا قاراپايىم قالتا تەلەفونى جوق كۇيەۋ بالا كىمگە كەرەك؟
بەرىك سادىر
