2021 جىلى ينستيتۋت عالىمدارى قازاقى تازىنىڭ گەنەتيكالىق تۇرعىدان زەرتتەۋگە گرانت ۇتىپ الىپ, وعان بيولوگيا عىلىمدارىنىڭ كانديداتى, اعا عىلىمي قىزمەتكەر اناستاسيا پەرفيلەۆا جەتەكشىلىك ەتتى. بۇل جوبا بىلتىر اياقتالدى. تازى تۇقىمىنىڭ گەنەتيكالىق ارتۇرلىلىگى مەن پوپۋلياتسيالىق قۇرىلىمىن انىقتاۋ ءۇشىن ينستيتۋت عالىمدارى زەرتتەۋ كەزىندە گەنەتيكالىق ماركەرلەردىڭ ەكى ءتۇرىن, ميكروساتەلليتتەر مەن ءبىر نۋكلەوتيدتى نۇسقالاردى العاش رەت قولداندى.
«تالداۋ ناتيجەسى تازىنىڭ گەنەتيكالىق ارتۇرلىلىگى جوعارى, ال ينبريدينگ دەڭگەيى تومەن, بىرەگەي تۇقىم ەكەنىن كورسەتتى. بۇل تۇقىمنىڭ گەنەتيكالىق الەۋەتى, اسىرەسە وڭتۇستىك جانە شىعىس قازاقستان ايماعىندا كوپ بايقالدى. ال سولتۇستىك وڭىردە سايكەسىنشە از. زەرتتەۋدىڭ تاعى ءبىر جاڭالىعى – تازى ەجەلدەن كەلە جاتقان ءارى فيلوگەنەتيكالىق تاريحتا بەرىك ورىن العان تۇقىم ەكەنى راستالدى. سونداي-اق تازىنىڭ پوپۋلياتسياسى 50 شاقتى ۇرپاق بۇرىن گەنەتيكالىق تۇرعىدان جويىلىپ كەتۋ قاۋپى دە بولعانى انىقتالدى», دەيدى بيولوگيا عىلىمدارىنىڭ كانديداتى, پروفەسسور باقىتجان بەكمانوۆ.
قازىر ينستيتۋت عالىمدارى تازىنىڭ اڭ اۋلاۋ قابىلەتىنە جاۋاپ بەرەتىن 18, 22 جانە 25 حروموسومالارداعى بەس باعىت ەرەكشە قىزىعۋشىلىق تۋدىرىپ وتىرعانىن ايتادى. وسىنداعى 12 گەننىڭ ىشىندەگى «CAB39L» گەنى تازىنىڭ جۇگىرۋ جىلدامدىعى مەن توزىمدىلىگىنە اسەر ەتەتىن ۇمىتكەر گەن بولماق. بۇل ناتيجەلەر بولاشاقتا تازىنى ودان ءارى جەتىلدىرۋ مەن ونى ساقتاۋعا مۇمكىندىك بەرەدى. سونداي-اق تازىنى جەكە تۇقىم رەتىندە حالىقارالىق دەڭگەيدە مويىنداۋ تۋرالى ۇسىنىسقا قولداۋ بولماق. قىسقاسى, بۇل زەرتتەۋلەر تازى تۇقىمىنىڭ گەنەتيكالىق قۇپياسىن عانا ەمەس, ونىڭ تاريحىن تەرەڭ بىلە تۇسەمىز.
