اتىراۋدا شەتەلدىك بايقاۋشىلار سايلاۋعا جوعارى باعا بەردى

1-سۋرەت.

اتىراۋ. 26 ءساۋىر. اتىراۋعا تمد بايقاۋشىلار ميسسياسىنان كەلگەن وكىلدەر سايلاۋدىڭ ءوتۋ بارىسىنا جوعارى باعا بەردى. بۇل تۋرالى egemen.kz ءتىلشىسى حابارلادى. اتىراۋ وبلىسى ايماقتىق سايلاۋ كوميسسياسى توراعاسىنىڭ ورىنباسارى تامارا امان-تۇرلينانىڭ مالىمەتىنشە, اتىراۋعا 28 بايقاۋشى كەلگەن. ولاردىڭ اراسىندا ەۋروپالىق  قاۋىپسىزدىك جانە ىنتىماقتاستىق ۇيىمىنان – 14 جانە تمد بايقاۋشىلار ميسسياسىنان دا 14 بايقاۋشى بار. ماسەلەن, تمد بايقاۋشىلار ميسسياسى اتىنان كەلگەن بايقاۋشىلاردىڭ 9-ى تاتارستان رەسپۋبليكاسىنان, ال 5-ءۋى اتىراۋمەن شەكارالاس استراحان وبلىسىنان كەلگەن. حالىقارالىق بايقاۋشىلار سايلاۋدىڭ ءوتۋ بارىسىن جوعارى باعالادى.

2-سۋرەت.

نادەجدا بوريسوۆا (2-سۋرەت), تمد بايقاۋشىلار ميسسياسىنىڭ وكىلى (تاتارستان رەسپۋبليكاسى, رەسەي فەدەراتسياسى): «ءبىز حالىقارالىق بايقاۋشى رەتىندە بىرنەشە سايلاۋ ۋچاسكەلەرىنىڭ اشىلۋ ساتىنە كۋا بولدىق. ودان سوڭ بىرنەشە سايلاۋ ۋچاسكەلەرىندەگى داۋىس بەرۋ ۇدەرىسىنە باقىلاۋ جۇرگىزدىك. ءبىزدىڭ بايقاعانىمىز – سايلاۋ ۋچاسكەلەرىنىڭ دايىندىعى جوعارى دەڭگەيدە, تەحنولوگيالىق قوندىرعىلارمەن جاقسى جابدىقتالىپتى. سايلاۋشىلار داۋىس بەرۋگە كوتەرىڭكى كوڭىل-كۇيمەن كەلىپ جاتىر. بۇل قازاقستان ازاماتتارىنىڭ داۋىس بەرۋدى پارىز سانايتىنىن بايقاتادى», – دەدى. ۆلاديمير زولوتوكولوۆ (1-سۋرەت), تمد بايقاۋشىلار ميسسياسىنىڭ تاعى وكىلى (استراحان وبلىسى, رەسەي فەدەراتسياسى): «ءبىز قازاقستاندا بۇعان دەيىن دە بولعانبىز. سايلاۋعا دايىندىقتىڭ جوعارى دەڭگەيدە وتكەنىن اڭعاردىق. سايلاۋ ۇدەرىسى زاڭ تالاپتارىنا ساي وتۋدە. ەشبىر زاڭ بۇزۋشىلىقتى كورگەنىمىز جوق. شىن مانىندە سايلاۋ مەرەكە سەكىلدى ءوتىپ جاتىر. اسىرەسە, كوركەمونەرپازداردىڭ ونەرى سايلاۋعا مەرەكەلىك رەڭ  بەردى», – دەدى. جولداسبەك شوپەعۇل. دەرەك: egemen.kz. سۋرەت: راحىم قويلىباەۆ.