فوتو: David Johnson/Darwin College/University of Bristol
1948 جىلى روزماري فاۋلەر فيزيكا زاڭدارىن قايتا جازىپ, ۇلكەن جاڭالىقتارعا جول اشقان. ونىڭ كاون بولشەكتەرىن اشۋى بولشەكتەر فيزيكاسىنىڭ تەورياسىن وزگەرتۋگە جانە جەنەۆاداعى (شۆەيتساريا) CERN-دە اشىلعان حيگگس بوزونى سياقتى بولشەكتەردى بولجاۋعا ۇلكەن سەپتىگىن تيگىزگەن. بىراق سوعىستان كەيىن ول ۇلىبريتانيادا 1949 جىلى فيزيك پيتەر فاۋلەرگە ۇيلەنىپ, ءۇش بالاسى بولعان كەزدە اكادەميادان كەتۋدى ۇيعارعان.
دوكتور فاۋلەر بۇل ول ءۇشىن ۇلكەن مارتەبە ەكەنىن, بىراق سودان بەرى ول ەرەكشە قۇرمەتكە لايىق ەشتەڭە ىستەمەگەنىن العا تارتقان.
بريستول ۋنيۆەرسيتەتىنىڭ رەكتورى, نوبەل سىيلىعىنىڭ لاۋرەاتى سەر پول نەرس وعان كەمبريدجدەگى ءۇيىنىڭ جانىنداعى جەكە ديپلومدار راسىمىندە قۇرمەتتى عىلىم دوكتورى اتاعىن بەرگەن.
نەرس دوكتور فاۋلەردىڭ ينتەللەكتۋالدى قاتاڭدىعى مەن قىزىعۋشىلىعىن جوعارى باعالاپ جانە ول «قازىرگى فيزيكتەردىڭ جۇمىسىن جانە عالام تۋرالى تۇسىنىگىمىزدى قالىپتاستىراتىن ماڭىزدى جاڭالىقتارعا جول اشتى» دەپ اتاپ وتكەن.
1948 جىلى پروفەسسور سەسيل پاۋەلل باستاعان بريستول عارىشتىق ساۋلەلەردى زەرتتەۋشىلەر توبى جاڭا ەلەمەنتتەر بولشەكتەرىن ىزدەۋمەن اينالىسقان. ولار قازىرگى تۇجىرىمدامالار بويىنشا اتوم يادروسىندا تىعىز بايلانىسقان نۋكلونداردىڭ كۇشتى اسەرلەسۋىنە جاۋاپ بەرەتىن تۇراقسىز ەلەمەنتار بولشەك - پيوندى تاپقان. بۇل جاڭالىعى ءۇشىن پروفەسسور پاۋەلل 1950 جىلى نوبەل سىيلىعىنا يە بولعان.
ول كەزدە نەبارى 22 جاستا بولعان روزماري فاۋلەر ەرەكشە بولشەكتەردىڭ ىزدەرىن كورۋ كەزىندە ەرەكشە ءبىر نارسەنى بايقاعان. ول ءۇش پيونعا (سۋباتومدىق بولشەكتىڭ ءبىر ءتۇرى) ىدىرايتىن بولشەك.
ءبىر جىل وتكەننەن كەيىن, روزماري فاۋلەر ءوزىنىڭ اشقان جاڭالىعىن ءۇش عىلىمي ماقالادا جاريالاپ, ۋنيۆەرسيتەتتى تاستاپ كەتكەن.
