فوتو: مەرەي قاينار ۇلى
قازىرگىدەي تەحنولوگيا تۇرەن سالىپ تۇرعان ۋاقىتتىڭ وزىندە ورگە قاراي سۋ جىبەرۋ - كۇردەلى ءىس. وسىنداي ماشاقاتتىڭ ءتۇيىنىن تۇستىكباي قارت وتكەن عاسىردا-اق تارقاتقان. فيزيكا زاڭدىلىعىن اينالىپ وتكەن توعان تاريحىن اۋىل تۇرعىنى زاڭعار كارىمحان ايتىپ بەردى.
«1931-1932 جىلدارى وزەننىڭ جايداق جەرى جىرعالى قىستاعىنىڭ ءور جاعىنان باستاپ, قولمەن توعان قازىپ, كيتىڭقارا تاۋىنىڭ باۋىرىمەن جۇرگىزىپ وتىرىپ, تالپىنداعى ەگىندىككە سۋ شىعارعان. ول كەزدە تەحنيكا كۇشى جوق, قالاي سالعانى جۇمباق. تۇستىكباي اتانىڭ باسشىلىعىمەن ىلدي جەرلەرگە كەسەك تاستى قالاپ وتىرىپ, سۋ جىرىپ كەتپەيتىندەي ەتىپ ارنا جاساعان. ارنانىڭ سۋ جۇرەتىن دەڭگەيىن سىناپ قويىپ, ولشەپ وتىرعان ەكەن. سول توعان كۇنى بۇگىنگە دەيىن «تۇستىكباي توعانى» دەپ اتالادى», دەدى اۋىل تۇرعىنى.
توعاننىڭ ۇزىندىعى - 12 شاقىرىم. 30-جىلدارى 80 گەكتار جەرگە ەگىن ەگىپ, ادامداردى اشتىقتان امان الىپ قالعان بۇل توعاننىڭ ماڭى كيەلى كورىنەدى.
وڭىردەگى ءتىلشىمىز مەرەي قاينار ۇلى جاڭاتالاپ اۋىلىنا جاساعان ساپارى بارىسىندا بىلگەن ەرەكشە توعان تۋرالى تولىق «تۇستىكباي توعانى» ماقالاسىنان وقي الاسىزدار.
