• 22 قاڭتار, 2015

اقپاراتتار اعىنى

286 رەت

كورسەتىلدى

2 مين

وقۋ ءۇشىن

Egemen Qazaqstan

*وتكەن جىلى ەلىمىزدىڭ 20 مىڭعا جۋىق ازاماتى شارتتى اقشالاي كومەككە يە بولدى. دەنساۋلىق ساقتاۋ جانە الەۋمەتتىك دامۋ مينيسترلىگى حابارلاعانداي, اقمولا, شىعىس قازاقستان جانە جامبىل وبلىستارىندا «ورلەۋ» قاناتقاقتى جوباسىنىڭ ارقاسىندا 3 843 وتباسى نەمەسە 19 909 ازامات 413,3 ملن. تەڭگە كولەمىندە شارتتى اقشالاي كومەك العان. *«قازاگروماركەتينگ» اق سىياقى مولشەرلەمەلەرىن سۋبسيديالاۋعا وتىنىمدەر قابىلداي باستادى. قۇرىلىمنىڭ ءباسپاسوز قىزمەتى بۇل سۋبسيديالاۋ مەملەكەتىمىزدىڭ اگروونەركاسىپتىك كەشەندى دامىتۋ ءجونىندەگى «اگروبيزنەس-2020» باعدارلاماسى اياسىندا جۇرگىزىلەتىنىن مالىمدەدى. *استانادا جەڭىستىڭ 70 جىلدىعىنا وراي ارداگەرلەر ءۇشىن 579 ملن. تەڭگە ءبولىندى. قالالىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ دەرەگىنشە, قارت مايدانگەرلەردى قولداۋ ماقساتىندا كەڭ اۋقىمدى اكتسيالار مەن ءىس-شارالاردى وتكىزۋ جوسپارلانعان. بۇگىندە ەلوردادا ۇلى وتان سوعىسىنىڭ 228 ارداگەرى تۇرىپ جاتىر. *الماتىنىڭ 2015 جىلعى بيۋدجەتى ناقتىلاندى. قالالىق اكىمدىكتىڭ ءباسپاسوز قىزمەتى اتاپ كورسەتكەندەي, شاھار بيۋدجەتى – 434 ملرد. 497 ملن. 412,3 مىڭ تەڭگەنى, ونىڭ ىشىندە بيۋدجەت شىعىندارىن الىپ تاستاعانداعى ناقتىلى بيۋدجەت 350 ملرد. 841 ملن. تەڭگەنى قۇرادى. *قاراعاندىلىق كاسىپورىندار استاناداعى ەكسپو-2017 قالاشىعىن سالۋعا قاتىسادى. «استانا ەكسپو-2017» ۇق» اق باسقارماسىنىڭ توراعاسى مۇرات وماروۆتىڭ ايتۋىنشا, وڭىردەگى ءوندىرىس ورىندارى قۇرىلىسقا قاجەتتى تەمىر-بەتون بۇيىمدارىن, سەندۆيچ پانەلدەر, پوليەتيلەن جانە پرەستەلگەن قۇبىرلار, رادياتورلار جانە ارنايى كيىمدەر جەتكىزىپ بەرمەك. *بىلتىر وڭتۇستىك قازاقستاندا 405 مىڭ شارشى مەتر تۇرعىن ءۇي ەل يگىلىگىنە ۇسىنىلدى. وبلىستىق قۇرىلىس باسقارماسى باسشىسىنىڭ مىندەتىن اتقارۋشى ەرمەك قىدىروۆ 2014 جىلى سالاعا تارتىلعان ينۆەستيتسيا كولەمى 187 ملرد. 614 ملن. تەڭگەگە جەتكەنىن ءمالىم ەتتى. *جامبىل وبلىسىندا اۆتوبۋستارعا GPS-باقىلاۋ ورناتىلىپ جاتىر. وبلىستىق اكىمدىك ۇستىمىزدەگى جىلى باقىلاۋدىڭ بىرىڭعاي جۇيەسىن قۇرۋعا 18,2 ملن. تەڭگە قارالعانىن جەتكىزدى. بۇگىندە GPS جۇيەسى تارازداعى اۆتوبۋستاردىڭ 50 پايىزىنا قويىلعان. *ماڭعىستاۋ وڭىرىندە ماڭىزدى قۇجات قابىلداندى. ايماقتاعى مۇناي وندىرەتىن 7 كاسىپورىن وبلىس اكىمدىگىمەن, كاسىپوداقتار كەڭەسىمەن جانە كاسىپكەرلەر پالاتاسىمەن بىرلەسە وتىرىپ, جۇمىسشىلاردىڭ ەڭبەك قۇقىقتارىن قامتاماسىز ەتۋ ماقساتىندا مەموراندۋمعا قول قويدى. ايماق باسشىسى اليك ايدارباەۆ مۇنى جوعارى باعالادى. حابارلار ۇكىمەت, وبلىستىق اكىمدىكتەر سايتتارى مەن «قازاقپارات» دەرەكتەرى بويىنشا دايىندالدى.