قاراعاندىلىق سۋرەتشى, ءمۇسىنشى يگور باگراموۆ كوستەنكو شاحتاسىندا قازا تاپقان 46 كەنشىنىڭ قۇرمەتىنە قويىلاتىن مەموريالدىڭ جوباسىن بىلتىر باستاعان ەدى. جوبا دايىن بولعاندا ازىرلەمەنى قازا تاپقانداردىڭ وتباسىلارىنا كورسەتكەن.
ورتالىق ساياباقتاعى ەڭسەلى ەسكەرتكىشتى يگور باگراموۆ ءوزىنىڭ ءمۇسىنشى ارىپتەسى تاراس كيشكارەۆپەن بىرگە جاقىندا عانا اياقتادى. بيىكتىگى – 3 مەتر 20 سانتيمەتر. ەسكەرتكىشتى 2006 جىلى قازا تاپقان كەنشىلەردىڭ قۇرمەتىنە ورناتىلعان گرانيت ەسكەرتكىشىنىڭ جانىنا قويعان.
«ەسكەرتكىشكە اپاراتىن شاعىن جول بار. تۇعىرى قارا گرانيتتەن جاسالعان جانە مۇندا ءبىرىنشى ەسكەرتكىش سياقتى, قازا تاپقان بارلىق 46 كەنشىنىڭ اتى-ءجونى ويىلىپ جازىلعان. بەتوننان جاسالعان ءمۇسىن – الىسقا كوز تاستاپ تۇرعان قاراپايىم كەنشىنىڭ بەينەسى», دەيدى ي.باگراموۆ.
كوستەنكو شاحتاسىنىڭ جانىندا ورنالاسقان ءۇش مەترلىك مەموريالدىڭ قاڭقاسى مەتالدان. ەسكەرتكىشتىڭ نەگىزگى ماتەريالى – گاببرو تەگىستەلگەن قارا گرانيت. گرانيتكە قازا تاپقان كەنشىلەردىڭ ەسىمدەرى مەن اپات كۇنى قاشالىپ جازىلعان. ەسكەرتكىشتەن كەنجارعا كىرەبەرىستى كورسەتەتىن جارتىلاي دوڭگەلەك دوعاسى بار قابىرعانى كورۋگە بولادى. شاحتاعا كىرىپ بارا جاتقان كەنشىلەر بەينەلەرى بىرتە-بىرتە بۇلتقا سىڭگەندەي.
مەموريال قابىرعاسىندا جارىقشاق قايعى مەن شەردى سەزىندىرەدى. ەسكەرتكىشتىڭ ەكىنشى جاعىندا كەنشىنىڭ باسكيىمى قاشالىپ سالىنعان. اينالاسىنا گۇلدەر ەگىلىپ, جان-جاعى اباتتاندىرىلعان. جارىق شامدارى مەن تاعزىم جاساۋشىلارعا ورىندىق قويىلعان. بۇعان قوسا ەسكىرتكىشتى اينالدىرا قازا تاپقان كەنشىلەر سانىنا سايكەس 46 جاس قايىڭ ەگىلدى.
«ەسكەرتكىش الاڭىنا تاستوسەم توسەلدى. شاعىن قورشاۋمەن قورشالدى. 340 شارشى مەتر اۋماق جاۋىن-شاشىن سۋى جينالمايتىنداي, كولبەۋ جەردە ورنالاسقان. سونداي-اق ەرەكشە قاجەتتىلىكتەرى بار, ياعني ارباداعى ادامدار دا كەلە الاتىنداي ىڭعايلى ەتىپ جاسالعان. قازىر جارىقتاندىرۋ تىرەكتەرى ءۇشىن ەلەكتر قۋاتىن تارتۋ جۇمىستارى جۇرگىزىلىپ جاتىر. سوڭعى اتقارىلار جۇمىس – كوگالداندىرۋ. الداعى بىرنەشە كۇندە اۋماقتى اباتتاندىرۋ اياقتالادى», دەيدى ءمۇسىنشى.
وتكەن جىلدىڭ 28 قازانىنا قاراعان ءتۇنى كوستەنكو اتىنداعى شاحتاداعى جارىلىس سالدارىنان 46 ادام قازا تاۋىپ, 28 كەنشى جاراقات العان ەدى. بۇل ەكى بىردەي ەسكەرتكىش – سولاردىڭ رۋحىنا جاسالعان تاعزىم.
قاراعاندى وبلىسى
