شەتەلدەگى سايلاۋشىلار دا بەلسەندىلىك كورسەتۋدە

استانا. 26 ءساۋىر. ەلىمىزدىڭ شەتەلدەردە جۇرگەن ازاماتتارى دا پرەزيدەنتتىك سايلاۋعا بەلسەنە قاتىسىپ, ءوز داۋىستارىن بەرۋدە. سىرتقى ىستەر مينيسترلىگى اكىمشىلىك جانە باقىلاۋ دەپارتامەنتىنىڭ ديرەكتورى قايرات سارجانوۆ وسىلاي دەدى. بۇل تۋرالى egemen.kz ءتىلشىسى حابارلادى. ق.سارجانوۆ: «شەتەلدەردەگى 65 سايلاۋ ۋچاسكەسىنىڭ مالىمەتتەرىنە سايكەس, جالپى داۋىس بەرۋى ءتيىس 20 822 ادام بولعان. ازىرگە ولاردىڭ 10 861-ءى ءوز تاڭداۋىن جاسادى», دەدى. دەپارتامەنت ديرەكتورىنىڭ ايتۋىنشا, شەتەلدەردە جۇرگەن ازاماتتاردىڭ كونستيتۋتسيالىق سايلاۋ قۇقىعىن مەيىلىنشە قامتاماسىز ەتۋ ماقساتىندا ءتيىستى جۇمىستار ءوز دەڭگەيىندە جۇرگىزىلگەن. سونداي-اق, ول شەتەلدەردەگى سايلاۋ ۋچاسكەلەرىنىڭ سانى بۇرىنعىعا قاراعاندا ءبىرشاما كوبەيگەنىن جەتكىزدى. دالىرەگى, برازيلياداعى, فينلياندياداعى, تايلاندتاعى, حورۆاتياداعى ەلشىلىكتەردىڭ, انتالياداعى, برەستەگى, قازانداعى, تالليندەگى جانە ۇرىمشىدەگى كونسۋلدىقتاردىڭ جانىنان قۇرىلعان سايلاۋ ۋچاسكەلەرىندە ەلىمىزدىڭ ازاماتتارى بيىل ءبىرىنشى رەت داۋىس بەرگەن. جولدىباي بازار. دەرەك, سۋرەت: egemen.kz.