ياعني بۇعان دەيىن شەكارا شەگىنەن اسا الماي جۇرگەن ۇلتتىق كۇرەسىمىزدى التى قۇرلىققا اپاردى. وعان دالەل مىناۋ: 2005 جىلى توكەەۆتىڭ تەگەۋرىندى تۇياق تىرەۋىنىڭ ارقاسىندا جەكە شاڭىراق كوتەرگەن قازاق كۇرەسى 12 جىلدىڭ ىشىندە (2017 دەيىن) 8 الەم چەمپيوناتى, 11 ازيا چەمپيوناتى, 3 الەم كۋبوگى, 3 ەۋروپا بىرىنشىلىگىن وتكىزىپ ۇلگەرىپتى. راسىندا, جوعارىداعى جارىستاردى وتكىزۋ ەكىنىڭ ءبىرىنىڭ قولىنان كەلە بەرمەسى انىق. مۇنىڭ سىرتىندا سوناۋ قيىردا جاتقان برازيليا ەلىندە قازاق كۇرەسىنەن كادەتتەر جانە جاستار اراسىندا قۇرلىق بىرىنشىلىگىن ۇيىمداستىرۋ, وڭتۇستىك افريكا رەسپۋبليكاسىندا ەكى دۇركىن قارا قۇرلىق چەمپيوناتىن وتكىزۋ وڭاي ما؟!
كىتاپتا جوعارىداعى سپورتتىق ءىس-شارالاردىڭ بارلىعى ايتىلىپ, جازىلعان. قۇندىلىعى – وسىندا. ياعني كەيىپكەردى بىلەتىن, ءتالىمىن ۇيرەنگەن, قاپتالداسىپ ۇزەڭگى سوعىستىرىپ بىرگە جۇرگەن شاكىرتتەرى مەن جورا-جولداس ارىپتەستەرىنىڭ جۇرەكجاردى ەستەلىكتەرى توپتاستىرىلىپتى. اسىرەسە ءوزىنىڭ اعايىن-تۋعاندارى مەن اپكە-باۋىرلارىنىڭ جۇرەكسوزى تازا بۇلاقتىڭ قاينارىنان ءۇزىلىپ تۇسكەن ءمولدىر تامشىداي. مىسالى, توكەەۆتىڭ تۋعان اپايى ۇلدىقىزدىڭ ەستەلىگىندە: «قازاقتا اكە بالاعا سىنشى» دەگەن بار ەمەس پە, بىردە اكەي ماعان: «بالام, ەرتە كەزدە ءبىزدىڭ جاۋىرىنى جەر يىسكەمەگەن قايىپبەردى دەگەن باتىر-بالۋان اتامىز بولعان ەكەن. مىنا سەرىك ءىنىڭ سول اتاسى سياقتى. باتىردى ەل ماقتايدى, جۇرت جاقتايدى, ءسويتىپ اقىلىنان اداستىرادى. بۇعان كوز قىرىڭدى سالا ءجۇر! بۇل بالاعا اللا تاعالا ناۋاداي قىلىپ نەسىبە بەرگەن. بۇل پەردەمەن تۋعان بالا», دەدى».
ەگەردە تۋىندىنى ءبىر عانا تۇلعانى ماقتاۋ-ماداقتاۋ ماقساتىندا قۇراستىرىلعان دۇنيە دەسەڭىز, قاتەلەسەسىز. مۇندا تاۋەلسىزدىك جىلدارىنداعى قازاق كۇرەسىنە دەگەن جاناشىرلىق ءھام ۇلت ۇپايىن تۇگەندەۋ جولىنداعى جەكە تۇلعانىڭ جانكەشتى ەڭبەگى تۋرالى بىلە الاسىز. ءبىر سوزبەن ايتقاندا, بۇل شىعارما توكەەۆتىڭ جەكە تۇلعاسى ارقىلى ءبىر ءداۋىردىڭ ساياسي-پسيحولوگيالىق احۋالى مەن ۇلتتىق كۇرەستىڭ مۇراتى جولىنداعى كۇردەلى وقيعالار تىزبەگى ىسپەتتى.
ءسوزىمىزدى تۇيىندەپ ايتار بولساق, تۋىندىنىڭ نەگىزگى قۇندىلىعى – تىلەۋلەستەر لەبىزىنىڭ توعىسۋى. بۇل ستيل زاماناۋي سۇرانىسقا يە. ويتكەنى مۇندا ءبىر ادامنىڭ كوزقاراسى ەمەس, كەيىپكەر تۋرالى قالام تەربەگەن 48 ادامنىڭ ءارتۇرلى پايىمى, تۇسىنىگى, ۇعىمى, پىكىرى سىڭىرىلگەن. كىتاپتى قۇراستىرۋشى قازاق سپورتىنىڭ شەجىرەشى-ءجۋرناليسى قىدىربەك رىسبەك ۇلى وسى جولدى دۇرىس تاڭداپتى. ياعني بۇل ءتاسىل – كەيىپكەردىڭ بولمىسى مەن ارەكەتىن تولىق اشىپ, تۇسىندىرە الاتىن بىردەن-ءبىر امال. كىتاپتىڭ ۇتارى دا وسىندا. سونداي-اق كولەمى 340 بەتتىك تۋىندى تاماشا سۋرەتتەرمەن بەزەندىرىلگەن. ءاربىر فوتو – ءبىر-ءبىر تاريح. قازىرگى تاڭدا الەۋمەتتىك ورتادا «كوزبەن سەزىنۋ» دەيتىن پسيحولوگيالىق ۇعىم پايدا بولدى. تاپسىرلەپ ايتقاندا, فوتودەرەكتەر ارقىلى كوزبەن وقۋ, تۇيسىكپەن سەزىنۋ. ءدال بۇل ستيل مىنا كىتاپقا سىڭىرىلگەن.
