كارين شترەنتس: بۇل سايلاۋ جاڭا جەتىستىكتەرگە ەكپىن بەرەدى

كوكشەتاۋ. 26 ءساۋىر. قازاقستاندا ءوتىپ جاتقان پرەزيدەنت سايلاۋىنىڭ بارىسىنا شەتەلدىك بايقاۋشىلار دا وتە جوعارى باعا بەرىپ وتىر. سونىڭ ناقتى دەرەگىن ءبىز كوكشەتاۋ قالاسىنداعى سايلاۋ وكرۋگىندە جۇرگەن گەرمانيا بۋندەستاگىنىڭ دەپۋتاتى كارين شترەنتس ارقىلى بايقادىق. بۇل تۋرالى egemen.kz ءتىلشىسى حابارلادى. «مەن كوركەيگەن قازاقستانعا قىزىعۋشىلىقپەن قارايمىن. ەڭسەلى ەلگە بىرنەشە رەت كەلدىم. ءار ساپارىمدا جەدەل وزگەرىستەرگە كۋا بولىپ, قۋانىپ جۇرەمىن. وسى كوكشەتاۋعا, كوركەم بۋرابايعا دا جولىم ءتۇستى», - دەدى ول. «تاۋەلسىز قازاقستاننىڭ بارلىق سالالارداعى تابىسى كوپ ۇلتتى حالىقتىڭ ىنتىماق-بىرلىگىندە, رەسپۋبليكا باسشىلىعىنىڭ ساليقالى ساياساتىندا, بولاشاق جوسپارلارىنىڭ باياندىلىعىندا دەپ بىلەمىن. قازىر بۇل ەلدىڭ حالىقارالىق قاۋىمداستىقتاعى بەدەلى جوعارى. وسى ساپارىمدا, جانىمداعى سەرىگىم ديپلومات بەرتولد حانس-فريدريح فون پلەتتسپەن بىرگە حالىقارالىق بايقاۋشى رەتىندە كوكشەتاۋ قالاسىنداعى №6 جانە №16 سايلاۋ ۋچاسكەلەرىندە بولدىم. جەرگىلىكتى حالىققا ريزامىن. ولار سايلاۋدىڭ, اسىرەسە, پرەزيدەنت سايلاۋىن مەملەكەتتىك ماڭىزى بار وقيعا دەپ سانايدى. ەشكىم ەرتەڭىنە بەي-جاي قارامايدى. سوندىقتان ەلەكتوراتتىڭ ساياسي بەلسەندىلىگى ءوسىپ وتىر. بۇل بولاشاقتىڭ نۇرلى بولاتىندىعىن كورسەتەدى», -دەپ تۇجىرىمدادى بايقاۋشى. گەرمانيالىق بايقۋشىنىڭ ايتۋىنشا, قازاقستاندا ۇلگى الاتىن جايلار كوپ. ول ءسوزىن: «ءبىز بۇل ەلدىڭ ءالى تالاي بەلەستەردى باعىندىراتىنىنا سەنەمىز. ارامىزداعى بايلانىس نىعايا بەرۋىنە تىلەستەسپىن», - دەپ اياقتادى. باقبەرگەن امالبەك. دەرەك, سۋرەت: egemen.kz .