ارداگەرلەرگە ارنالعان اكتسيا

كەشە ورتالىق كوممۋنيكاتسيالار قىزمەتىندە بولعان ءباسپاسوز ءماس­ليحاتىندا رەسپۋبليكالىق «ارداگەرلەر ۇيىمى» قوعامدىق بىرلەستىگى ور­تا­لىق كەڭەسىنىڭ توراعاسى ومىرزاق وز­عانباەۆ جاردەم الۋدا ارداگەرلەردىڭ قولىن ۇزارتاتىن «جەڭىس» اكتسياسى باستالعانىن جاريالادى. « ۇلى وتان سوعىسىنداعى جەڭىستىڭ 70 جىلدىعىنا ارنالعان شارالار تۋرالى» دەگەن تاقىرىپتا وتكەن ءباسپاسوز ءماسليحاتىنا «سامۇرىق-قازىنا» ۇلتتىق ءال-اۋقات قورىنىڭ باسقارۋشى ديرەكتورى دارحان قالەتاەۆ, ەۋرازيالىق مەديا فورۋمنىڭ باس ديرەكتورى رۋسلان جەمكوۆ, «ءومىر جولى 24» قوعامدىق قورىنىڭ ديرەكتورى ەرنار نۇربەكوۆ قاتىستى. ولار ۇلى جەڭىستىڭ 70 جىلدىعىنا وراي اتقارىلىپ جاتقان شارالارعا توقتالىپ, سوعىس ارداگەرلەرىنە جاسالاتىن قامقورلىقتار جونىندە اڭگىمەلەدى. «ەستەرىڭىزدە بولسا, «سامۇرىق-قازىنا» اق پەن رەسپۋبليكالىق «ارداگەرلەر ۇيىمى» قوعامدىق بىرلەستىگى 2015 جىلى ۇلى وتان سوعىسىنداعى جەڭىستىڭ 70 جىلدىعىن تويلاۋ قارساڭىنداعى دايىندىق جۇمىستارى اياسىندا ارىپتەستىك تۋرالى مەموراندۋمعا قول قويدى. قازىرگى جۇزەگە اسىرىلىپ جاتقان يگى جوبالار سونىڭ جەمىسى دەۋگە بولادى», دەدى د.قالەتاەۆ. باسقارۋشى ديرەكتور ءال-اۋقات قورىنىڭ ايتۋلى شاراعا وراي بولگەن قاراجاتى تۋرالى دا ايتتى. «2014 جىلى «سامۇرىق-قازىنا» ۇوس ارداگەرلەرىن قولداۋعا 130 ملن. تەڭگە قارجى ءبولدى. بيىل ءبىز بۇل كومەكتى ەسەلەپ ارتتىردىق. ءسويتىپ, ونىڭ كولەمى 600 ملن. تەڭگەدەن اسىپ ءتۇستى. وسى قارجى ەسەبىنەن ارداگەرلەرگە ءتيىستى كومەك كورسەتىلىپ, جۇيەلى نەگىزدە كەشەندى قولداۋ جاسالادى. وتكىزىلەتىن شارالار جوسپارى «ارداگەرلەر ۇيىمى» ورتالىق كەڭەسىمەن كەلىسىلدى. قور بۇل باعدارلاماعا قاتىسۋ ءۇشىن سەرىكتەستەردى تارتىپ وتىر. وسى ورايدا قايىرىمدىلىق اكتسيالارىن وتكىزۋ, اقپاراتتىق ينتەرنەت-پورتالدى قۇرۋ, سونداي-اق كوپ سەريالى «ناشا ۆوينا» دەرەكتى ءفيلمىن ءتۇسىرۋ جانە باسقا دا شارالاردى ۇيىمداستىرۋ قاراستىرىلعان», دەدى ول. ادامزات تاريحىندا ەڭ قاسىرەتتى بولعان ەكىنشى دۇنيە­جۇ­زىلىك سوعىسقا 60 ميلليوننان استام ادام قاتىسقانىن, ونىڭ 26 ميل­ليوننان استامى كسرو ازامات­تارى بولعانىن ايتقان ارداگەر­لەر كەڭەسىنىڭ توراعاسى, قازاق­ستاننان وتاندى قورعاۋعا 1 ميل­ليون 200 مىڭنان استام ادام اتتانىپ, ونىڭ 400 مىڭنان استا­مى مايداننان ورالماعانىن ايتتى. قازىرگى كوزى ءتىرى 5 مىڭعا جۋىق سوعىس ارداگەرلەرىنە مەملەكەتپەن قاتار قوعامنىڭ دا قامقورلىعى قاجەت ەكەنىنە نازار اۋدارتتى. «بۇگىن وسى مەموراندۋم بويىنشا جاڭا اكتسيانى ىسكە اسىرعالى وتىرمىز. بۇل اكتسيانى ءبىز «جەڭىس» دەپ اتادىق. وسى شارا جەتپىس جىلدىقتان كەيىن دە ارداگەرلەردى قامقورلىققا الىپ, ولارعا قاجەتتى قولداۋ كورسەتەتىن ۇيىم بولعالى تۇر. وسى اكتسيا اياسىندا ارداگەرلەرگە «قاۋىپ-قاتەر دابىلى» تاراتىلادى. ياعني, ۇيدە جالعىز قالعان, قاراۋشىسى جوق ارداگەرلەر قيىن جاعدايعا تۇسكەن كەزدە قولىنداعى بىلەزىكتى نەمەسە موينىنداعى القا تۇرىندەگى قۇرىلعىنىڭ تۇيمەسىن باسسا, ورتالىق ديسپەتچەرلىك پۋنكت­كە حابار تۇسەدى. حابار نەگىزىندە بۇل ارداگەر تۋرالى تولىق اقپارات شىعارىلىپ, قارتتارعا دەرەۋ جەدەل جاردەم ماشيناسى نەمەسە باسقا دا كومەك تۇرلەرى بارادى», دەدى ءو.وزعانباەۆ. بۇيىرتسا, الداعى جۇما كۇنى­نەن باستاپ بۇل قۇرىلعىلار قارت­تارعا تاراتىلا باستايدى. ار­دا­گەر­لەر ءساۋىر ايىنىڭ اياعىنا دەيىن قۇرىلعىلارمەن تولىق جابدىق­تالىپ بولادى ەكەن. دەسەك تە, وكى­ن­ىشتىسى, ەلىمىزدە بالالارى مەن جاقىن تۋعاندارىنىڭ قامقور­لى­عىنسىز, قاراۋسىز قالعان ارداگەرلەر دە بار ەكەن. ونى ءتىلشىنىڭ قويعان سۇراعىنا وراي, ارداگەرلەر ۇيىمى كەڭەسىنىڭ توراعاسى ايتتى. «باۋىر ەتى بالالارى مەن ەت جاقىن تۋىستارى بولا تۇرىپ, قاراۋسىز قالعان, قارتتار ۇيلەرىن تۇراق ەتكەن ارداگەرلەرىمىز بار», دەپ قورىتتى ول ءوز ءسوزىن. نۇرباي ەلمۇراتوۆ, «ەگەمەن قازاقستان».