«پەتروپاۆلدا سايلاۋ ۇدەرىسى ۇزدىكسىز قاداعالاندى»

پەتروپاۆل. 27 ءساۋىر. پەتروپاۆلدا سايلاۋشىلاردىڭ داۋىس بەرۋ ۇدەرىسى ۇزدىكسىز قاداعالاندى. مۇنداي دەرەكتى قوعامدىق بايقاۋشىلاردىڭ ءبىرى اسەل ساپارعالي ايتىپ بەردى. بۇل تۋرالى egemen.kz ءتىلشىسى حابارلادى. «شىنى كەرەك, مۇنداي اسا ماڭىزدى ساياسي شاراعا بايقاۋشى رەتىندە ءبىرىنشى رەت قاتىسقاندىقتان, قاتتى قوبالجىدىم. بىراق الدىن الا تياناقتى ازىرلىكتەردىڭ جۇرگىزىلۋى كوڭىلدەگى كۇدىكتى سەيىلتىپ, سەنىمىمدى كۇشەيتتى. سايلاۋعا باقىلاۋ جاساۋ جونىندەگى رەسپۋبليكالىق قوعامدىق كوميسسياسى وبلىستىق فيليالىنىڭ توراعاسى سەرگەي حۋدياكوۆ ارقايسىمىزبەن جەكە سويلەسىپ, ناقتى باعىت-باعدار بەردى», – دەيدى ەلىمىزدەگى ەڭ ماڭىزدى ساياسي ناۋقاندى قاداعالاعان جاس مامان. سايلاۋعا دايىندىق جۇمىستارىنىڭ جوعارى دەڭگەيدە وتكەنىن ايتقان ول سەمينار-ترەنينگتەردىڭ پايداسى مول بولعانىنا توقتالدى. «دايىندىق كەزىندە تەوريالىق ءبىلىمىمىزدى نىعايتتىق, تاجىريبەمىزدى بايىتتىق. سايلاۋالدى ماسەلەلەرگە جان-جاقتى قانىقتىق. قولىمىزعا ادىستەمەلىك ماتەريالدار, كومەكشى قۇرالدار بەرىلىپ, زاڭنامالىق نورمالاردىڭ قاتاڭ ساقتالۋىنا باسا نازار اۋدارىلدى. قازىر وي ەلەگىنەن وتكىزىپ وتىرسام, «كوز – قورقاق, قول – باتىر» دەگەندەي, ءبارى دە ادامنىڭ جەكە جىگەرىنە, قوعامدىق بەلسەندىلىگىنە بايلانىستى ەكەن. ماعان تاڭداۋ تۇسكەندە, بىردەن كەلىسىمىمدى بەردىم. ويتكەنى, ءبىز, جاستار, قولىمىزدان ءىس كەلەتىنىن, كەز كەلگەن ساياسي شارالاردى زاڭدى تۇردە جۇزەگە اسىرا الاتىنىمىزدى دالەلدەي بىلدىك. ادامنىڭ بولاشاقتاعى ماقساتى مەن كاسىبي بىلىكتىلىگى وسىنداي ناقتى جاعدايلارمەن ولشەنسە كەرەك», – دەگەن اسەل قوعامدىق بايقاۋشى مارتەبەسىن يەلەنگەنىنە ەش وكىنبەيتىنىن ايتتى. «مەنىڭ كۇنى بويعى مىندەتىم №635 سايلاۋ ۋچاسكەسىندە باسقا دا قوعامدىق ۇيىم وكىلدەرىمەن بىرلەسە وتىرىپ, ولقىلىقتاردىڭ ورىن الماۋىن قاداعالاۋ بولدى. بارلىق ۇدەرىستەر زاڭعا سايكەس اتقارىلىپ, سايلاۋشىلار تاراپىنان بىردە-ءبىر رەنىش ايتىلعان جوق. حالىقارالىق بايقاۋشىلار دا جالپىعا ورتاق دەموكراتيالىق تالاپتاردىڭ ساقتالعانىن جەتكىزدى. ولاردىڭ كەيبىرى قازاقستانداعى سايلاۋ شەت ەلدەردى قىزىقتىرىپ وتىرعانىن جاسىرمادى. ءبىزدىڭ وي-پىكىرلەرىمىز دە وسىعان سايادى. سەبەبى, ساياسي ناۋقاندى ۇيىمداستىرۋشىلاردىڭ تىنىمسىز تىرلىگى, جۇمىستاردىڭ جۇيەلىلىگى, اقپاراتتاندىرۋ قىزمەتتەرىنىڭ جەدەلدىگى, سونداي-اق, ەلەكتوراتتىڭ جوعارى بەلسەندىلىگى ءتانتى ەتتى», – دەيدى بايقاۋشى. قويىلعان تالاپتاردىڭ ارقاسىندا وزدەرىنە جۇكتەلگەن مىندەتتەردى بارىنشا جاۋاپكەرشىلىكپەن اتقارۋعا تىرىسقان بايقاۋشىلار سايلاۋ ۋچاسكەلەرى اشىلعان كەزدەن باستاپ جابىلعانعا دەيىن سايلاۋ ۇدەرىستەرىن ۇزبەي قاداعالاپ وتىردى. «ساياسي ناۋقاننىڭ اشىق وتۋىنە باسىمدىق بەرىلدى. سايلاۋدىڭ ءوز دارەجەسىندە ۇيىمداستىرىلۋىنا ۇلەس قوسقانىمدى دەموكراتيالىق قادامدى تەرەڭدەتۋدىڭ ءبىرى كورىنىسى رەتىندە باعالايمىن», – دەيدى سايلاۋدىڭ ءادىل وتۋىنە وزىندىك ۇلەسىن قوسقان جاس بايقاۋشى. ءومىر ەسقالي. دەرەك, سۋرەت: egemen.kz.