بيىلعى ماۋسىم ەڭ ىستىق اي بولىپ تىركەلدى

مامانداردىڭ ايتۋىنشا, جاۋىن-شاشىننىڭ شامادان تىس ءتۇسۋى ەلدىڭ سولتۇستىك جارتىسىندا تىركەلسە, وڭتۇستىك بولىگىندە قۇرعاقشىلىق بايقالعان.

سينوپتيكتەردىڭ مالىمەتىنشە, ايدىڭ كوپ بولىگىندە ەلگە قارا جانە جەرورتا تەڭىزدەرىنەن جىلى اۋا ماسسالارى كىرگەن.

«كوپتەگەن وڭىردە ءورت قاۋپى جوعارى بولدى. ايدىڭ ورتاسى مەن اياعىندا رەكوردتىق جوعارى اۋا تەمپەراتۋراسى بايقالدى», دەپ حابارلادى «قازگيدرومەت» رمك ءباسپاسوز قىزمەتى.

مىسالى, كۇندىز ەلىمىزدىڭ باتىسى مەن وڭتۇستىگىندە تەرمومەتر +35+43°C, سولتۇستىك جانە ورتالىق وبلىستاردا +30+40°C دەيىن كوتەرىلدى.

9 ماۋسىمدا قىزىلوردادا تەرمومەتر كورسەتكىشى +40,5°C-قا جەتىپ, 2016 جىلعى رەكوردتى (+40,1°C) جاڭارتتى. 17 ماۋسىمدا اقتوبەدە 2006 جىلعى رەكوردتان اسىپ, +39,2°C بولدى, الدىڭعىسى +38,5°C بولعان. اتىراۋدا 18 ماۋسىمدا اۋا تەمپەراتۋراسى +41,5°س-قا دەيىن كوتەرىلىپ, 2010 جىلعى رەكوردتى (+41°س) جاڭارتتى.

سونداي-اق 27 ماۋسىمدا رەسپۋبليكانىڭ ورتالىعى مەن وڭتۇستىك وبلىستارىندا 2014 جىلعى رەكوردتار جاڭارتىلدى.

جەزقازعان مەتەوستانتسياسىندا +40,5°س بايقالسا, بۇرىنعى رەكورد +39,6°C بولدى. قىزىلوردادا اۋا تەمپەراتۋراسى +42,6°س-قا دەيىن ىسىپ, +41,5°س-تان استى. تۇركىستاندا جاڭا رەكورد +42,5°C بولسا, الدىڭعى +41,5°C بولعان.

28 ماۋسىمدا الماتىدا اۋا تەمپەراتۋراسى +37°C-قا جەتتى, وسىلايشا 2014 جىلعى رەكورد (+35,5°C) جاڭاردى.

استانادا ءبىر ايداعى ورتاشا اۋا تەمپەراتۋراسى +21,8°س بولدى, بۇل نورمادان 2,2°س جوعارى بولدى, ال نورما +19,6 گرادۋس.

ەڭ جوعارى اۋا تەمپەراتۋراسى 28 ماۋسىمدا تىركەلدى (+36,5°C); 2014 جىلعى رەكورد جاڭارتىلدى – +35,4°C. ەلوردادا ەڭ تومەنگى اۋا تەمپەراتۋراسى 1 ماۋسىمدا +6,2°C بولدى.