بۇل - مەملەكەت باسشىسى قاسىم-جومارت توقاەۆ پەن قحر توراعاسى سي ءتسزينپيننىڭ قازاقستانعا رەسمي ساپارى اياسىندا قول قويىلعان 30-عا جۋىق كەلىسىمنىڭ ءبىرى.
سالتاناتتى ءىس-شاراعا قازۇازۋ رەكتورىنىڭ ءبىرىنشى ورىنباسارى پىرىمقۇل يبراگيموۆ, لانچجوۋ ۋنيۆەرسيتەتى دەلەگاتسياسىنىڭ جەتەكشىسى, پارتيا كوميتەتىنىڭ حاتشىسى ما سياوتسزە, الماتى قالاسىنداعى قحر باس كونسۋلى تسزيان ۆەي, عىلىمي-زەرتتەۋ ينستيتۋتتارى مەن مەملەكەتتىك ورگاندار وكىلدەرى قاتىستى.
رەكتوردىڭ ءبىرىنشى ورىنباسارى پىرىمقۇل يبراگيموۆتىڭ ايتۋىنشا, ورتالىقتىڭ نەگىزگى قىزمەتى – قازاقستانداعى اقىلدى اۋىل شارۋاشىلىعى سالاسىنداعى وزىق تەحنولوگيالاردىڭ ترانسفەرتىن قامتاماسىز ەتۋ. مۇنىمەن قوسا ورتالىق ماماندارى اۋىل شارۋاشىلىعىن دامىتۋعا جاردەمدەسىپ, تسيفرلاندىرۋ, گەنوتيپتەردى زەرتتەۋ, جاسىل جانە تومەن كومىرتەكتى تەحنولوگيالار, سۋدى ءتيىمدى پايدالانۋدا بىرلەسكەن جوبالاردى ىسكە اسىرادى.
«وسى ماسەلەلەردى شەشۋ ءۇشىن ورتالىق عىلىمي-زەرتتەۋلەر مەن ءبىلىم بەرۋ بارىسىندا وقىتۋشىلارمەن جانە ستۋدەنتتەرمەن الماسۋ, بىرلەسكەن عىلىمي جوبالار مەن جاريالانىمداردى, عىلىمي ماتەريالداردى بىرلەسە دايارلاپ, اقپارات الماسىپ, ءبىلىم بەرۋ باعدارلامالارى مەن وقۋ جوسپارلارىن ازىرلەۋدى, سەمينارلار, كونفەرەنتسيالار جانە شەبەرلىك ساباقتارىن, بىرلەسكەن اكادەميالىق ءىس-شارالاردى ۇيىمداستىرۋدى جۇزەگە اسىرادى», دەپ اتاپ ءوتتى پىرىمقۇل شولپانقۇل ۇلى.
وسى رەتتە قازۇازۋ باسقارما توراعاسى-رەكتور, ۇعا پرەزيدەنتى, اكادەميك اقىلبەك كۇرىشباەۆتىڭ عىلىم, ءبىلىم بەرۋ جانە اگرارلىق سالادا قازاقستان مەن قىتايدىڭ سەنىمدى سەرىكتەس رەتىندە ىنتىماقتاستىعىنىڭ دامۋىنداعى زور ۇلەسىن, وسى جۇمىستاردى حالىقارالىق دەڭگەيدە ۇيىمداستىرعانىن اتاپ وتكەن ورىندى. رەكتوردىڭ باستاماسىمەن ۋنيۆەرسيتەت قحر-دىڭ 20-دان استام جەتەكشى ءبىلىم بەرۋ, عىلىمي ۇيىمدارىمەن تىعىز بايلانىس ورناتىپ, بىرقاتار كەزدەسۋلەر وتكىزىپ, ناتيجەسىندە ءوزارا ىقپالداستىق كەلىسىمشارتتارى جاسالعان ەدى.
الماتى قالاسىنداعى قحر باس كونسۋلى تسزيان ۆەي ءوز سوزىندە ەكى ەل اراسىنداعى ىنتىماقتاستىقتى دامىتۋ بارىسىنا توقتالىپ, عىلىم جانە ءبىلىم بەرۋ بايلانىستارىن تەرەڭدەتۋدىڭ ءتيىمدى تەتىكتەرىن بىرلەسە ىزدەستىرۋ مەن ىسكە اسىرۋدا قولعا الىنعان باستامالارعا قولداۋ ءبىلدىردى. ورتالىقتىڭ اشىلۋى ەكى ەلدىڭ عالىمدارىنا اۋىل شارۋاشىلىعى ونەركاسىپتىك كەشەنى ماسەلەلەرى بويىنشا بىرلەسكەن عىلىمي زەرتتەۋلەر جۇرگىزۋگە, جاڭا تەحنولوگيالار ترانسفەرتىن جۇزەگە اسىرۋعا, باسەكەگە قابىلەتتى مامانداردى بىرلەسە دايارلاۋعا مۇمكىندىك بەرەتىنىن اتاپ ءوتتى.
ءوز كەزەگىندە لانچجوۋ ۋنيۆەرسيتەتى دەلەگاتسياسىنىڭ جەتەكشىسى ما سياوتسزە قىتايدىڭ اۋىل شارۋاشىلىعىن دامىتۋداعى تاجىريبەلەرىن پايدالانا وتىرىپ, قىتاي تەحنولوگياسىن قازاقستانعا ەنگىزۋ بارىسىنا, اۋىل تسيفرلاندىرۋدىڭ ماڭىزدىلىعىنا نازار اۋداردى.
لانجوۋ ۋنيۆەرسيتەتى – ءجۇز جىلعا جۋىق تاريحى بار, قحر ءبىلىم مينيسترلىگىنىڭ تىكەلەي قاراماعىنداعى جانە Double First Class قۇرامىنا كىرەتىن جەتەكشى وقۋ ورداسىنىڭ ءبىرى. مۇندا 31 فاكۋلتەتتە اۋىل شارۋاشىلىعى عىلىمدارى, فارماكولوگيا جانە توكسيكولوگيا, ينجەنەريا, ەكولوگيا, ماتەماتيكا, حيميا, فيزيكا, بوتانيكا جانە زوولوگيا, بيولوگيا, بيوحيميا, كلينيكالىق مەديتسينا, الەۋمەتتىك عىلىمدار, كومپيۋتەرلىك عىلىمدار, وڭىرلىك ەكونوميكا جانە يادرولىق عىلىم سالالارى بويىنشا ماماندار دايارلانىپ جاتىر.
ورتالىق قىزمەتىن ءارى قاراي دامىتۋ ماقساتىندا زەرتحانالاردى قۇرىپ, ولاردى جابدىقتاۋدى, بىرلەسكەن زەرتتەۋلەر جۇرگىزۋدى قىتاي تاراپىنان قارجىلاندىرۋ كوزدەرىن قاراستىرۋ, ءبىلىم بەرۋ باعدارلامالارىن جۇزەگە اسىرۋدى جەدەلدەتۋ سياقتى كەشەندى ماسەلەلەر تالقىلاندى.
تاراپتار قازاقستان-قىتاي اقىلدى اۋىل شارۋاشىلىعى ورتالىعىنىڭ اشىلۋى جانە ءوزارا ارىپتەستىك ىنتىماقتاستىقتى ودان ارى دامىتۋ تۋرالى كەلىسىمگە قول قويىپ, وقۋ ورنىنىڭ عىلىمي-يننوۆاتسيالىق ينفراقۇرىلىمىمەن, عىلىمي جەتىستىكتەرمەن تانىستى.
الماتى
