«پەتروپاۆلدا بىردە-ءبىر زاڭ بۇزۋشىلىق تىركەلگەن جوق»

پەتروپاۆل. 26 ءساۋىر. قازاقستاندا ءوتىپ جاتقان ساياسي  شارالار رەسەي تاراپىنان اركەز زور قىزىعۋشىلىق تانىتىپ كەلە جاتقانى  بەلگىلى. بۇل جولعى پرەزيدەنت سايلاۋىنا كورشى ەلدىڭ ومبى, تۇمەن جانە قورعان وبلىستارىنان  ەلۋگە جۋىق بايقاۋشى قاتىسىپ, سايلاۋ بارىسىن باستان-اياق  باقىلادى.  بۇل تۋرالى egemen.kz ءتىلشىسى حابارلادى. ءبىز  سولاردىڭ ءبىرى  ميحايل كاراكوزدى   اڭگىمەگە  تارتىپ, العان اسەرلەرىمەن ءبولىسۋدى وتىنگەن ەدىك. «بۇل – مەنىڭ  قىزىلجار وڭىرىنە ەكىنشى ساپارىم. مۇنىڭ الدىندا  پارلامەنت ءماجىلىسى سايلاۋىنا بايقاۋشى رەتىندە قاتىسىپ,  كوپ ءتالىم الىپ قايتقان  بولاتىنبىز. رەسەيدىڭ ومبى وبلىسىنىڭ دەلەگاتسياسىن ومبى ۇكىمەتى توراعاسىنىڭ ورىنباسارى ۆلاديمير كومپانەيششيكوۆ باستاپ كەلدى.  دەلەگاتسيا مۇشەلەرى  شەتىنەن  تاجىريبەلى, كاسىبي بىلىكتى ماماندار.  كەڭ قۇشاعىن ايقارا اشىپ, قوناقجاي پەيىلمەن قارسى العان قازاق ەلىنە  ريزامىز. ەندى نەگىزگى تاقىرىپقا  ويىساتىن بولساق, كەزەكتەن تىس پرەزيدەنت سايلاۋىنا   جەر-جەرلەردەگى تىڭعىلىقتى دايىندىعى, سولتۇستىكقازاقستاندىقتاردىڭ  كوتەرىڭكى كوڭىل-كۇيمەن,  ساياسي بەلسەندىلىكپەن قارسى العانى  بىردەن  بايقالدى.  وعان سايلاۋ ۋچاسكەلەرىن ارالاۋ بارىسىندا انىق كوز جەتكىزدىم.  № 635 سايلاۋ ۋچاسكەسىندە بولعانىمدا  سايلاۋشىلارمەن اڭگىمەلەسىپ, پىكىرلەرىن سۇراستىردىم. قاي قايسىسىن بولسىن قازاقستاننىڭ بولاشاعى, ەرتەڭگى تاعدىرى بەيجاي قالدىرمايدى ەكەن. ءبارىنىڭ ويلارى  «ايتۋلى وقيعاعا  ءوز قالاۋىمىزبەن كەلدىك.  ويتكەنى, وتانىمىز – بىرەۋ, ءبىزدى ورتاقتاستىراتىن–بىر مۇددە, ءبىر ماقسات.  ەلىمىز كۇن وتكەن سايىن گۇلدەنىپ كەلەدى. وسىندايدا ءار داۋىستىڭ قانشالىقتى ماڭىزدى ەكەنى بىلىنەدى.  سول سەبەپتى قوعامدىق سانالىلىق تانىتۋ – ءار قازاقستاندىقتىڭ اسىل پارىزى» دەگەن پايىمدارمەن ۇندەسىپ جاتتى. مەنى وسىندا 80-نەن اسسا دا, تاياعىنا سۇيەنىپ كەلگەن  الپەش دەگەن كەيۋانانىڭ قايسارلىعى تاڭ قالدىردى. دەنساۋلىعىن سىلتاۋراتىپ, ۇيدە داۋىس بەرەمىن دەپ سىلتاۋ تابۋعا بولار ەدى. بىراق دىمكاستىگىنە قاراماستان كۇيرەكتىككە سالىنباعان باتىر كەيپى كەرەمەت ءسۇيسىندىردى. ول ماعان «كەلەسى  سايلاۋعا كەلۋگە دە كۇش-قۋاتىم جەتەدى» دەپ قالجىڭداپ قويادى. ودان ءارى ول № 636, 639, 642, 630 سايلاۋ ۋچاسكەلەرىندەگى  سايلاۋ ۇدەرىسىمەن تانىسقاندا دا  دەموكراتيالىق تالاپتار مەن زاڭ نورمالارى ساقتالۋىنىڭ كۋاسى بولعانىن,  بايقاۋشى رەتىندە  سايلاۋ ۋچاسكەلەرىندە جۇرگەن پرەزيدەنتىككە ۇمىتكەرلەردىڭ سەنىمدى وكىلدەرى مەن قوعامدىق ۇيىم مۇشەلەرى بۇرا تارتۋشىلىقتاردىڭ كەزدەسپەگەنىن,  ءادىل دە اشىق ءوتۋى قامتاماسىز ەتىلگەنىن جەتكىزدى. «قازاقستان – ءبىزدىڭ ەجەلگى كورشىمىز.  توسەكتە باسى, توسكەيدە  مالى قوسىلعان تاتۋ ەلمىز.  بىرىڭعاي ەكونوميكالىق كەڭىستىككە قوسىلعالى  ينتەگراتسيالىق بايلانىستارىمىز تەرەڭدەپ, نارىق كوكجيەگى كەڭەيىپ كەلەدى.  الىس-بەرىسىمىز ارتتى. بەيبىتشىلىك پەن  كەلىسىمدى نىعايتۋ جولىنداعى  قازاقستاننىڭ  ۇمتىلىسى مەن الەمدىك ارەناداعى بەدەلى جوعارى.  وركەنيەتتى 30 ەلدىڭ قاتارىنا كىرۋ قادامىنا  ساتتىلىك تىلەيمىن. مەن بۇل پىكىرلەرىمدى حالىقارالىق بايقاۋشىلارمەن وتكەن بريفينگتە دە مالىمدەدىم. بۇل جولعى پرەزيدەنتتىڭ سايلاۋ دا حالىقارالىق قاۋىمداستىق تاراپىنان وڭ باعا الارى داۋسىز», - دەيدى ول. ءومىر ەسقالي. دەرەك, سۋرەت: egemen.kz