مەملەكەتتىك قىزمەت جەتىلدىرىلەدى

كەشە مەملەكەتتىك قىزمەت ىستەرى جانە سىبايلاس جەم­قورلىققا قارسى ءىس-قيمىل اگەنتتىگىنىڭ ۇيىمداستىرۋىمەن مەملەكەتتىك قىزمەتتى جەتىلدىرۋ ماسەلەلەرى بويىنشا دوڭگەلەك ۇستەل بولىپ ءوتتى. اتالعان شاراعا پارلامەنت دەپۋتاتتارى, بىرقاتار وبلىستاردىڭ اكىمدەرى, پرەزيدەنت اكىمشىلىگىنىڭ, پرەمەر-مينيستر كەڭسەسىنىڭ وكىلدەرى, مينيسترلىكتەردىڭ جاۋاپتى حاتشىلارى مەن ايماق اكىمدەرىنىڭ اپپارات باسشىلارى قاتىستى. «قيىنداتىلعان تەستىلەۋدىڭ تاساسىندا كوپتەگەن تاجىريبەلى مامانداردىڭ نەبارى 1-2 بالل جيناي الماي قالۋى ءجيى كەزدەسەدى. سول سەبەپتى, تەستىلەۋ بارىسىندا وزگەرىستەر مەن ونداعى كانديداتتاردى ىرىكتەۋ كەزىندە جاڭا جاعدايلار قاراستىرۋ كەرەك بولىپ وتىر», دەگەن اگەنتتىك توراعاسى قايرات قوجامجاروۆ  ولاردىڭ تاراپىنان «ا» باسقارۋشىلىق كورپۋسىنا ىرىكتەۋ ءتارتىبىن جەتىلدىرۋ ۇسىنىلاتىنىن ايتتى. دوڭگەلەك ۇستەلدە مەملەكەتتىك قىزمەت پەرسونالىن باسقارۋدىڭ وزەكتى ماسەلەلەرى, «ا» باسقارۋشى كورپۋسىن تەستىلەۋدى جانە ولاردى ىرىكتەۋ شارتتارىن ودان ءارى جەتىلدىرۋ, سونداي-اق, مەملەكەتتىك اپپاراتتى كاسىبيلەندىرۋ مەن مەملەكەتتىك قىزمەت كورسەتۋ تۋرالى, باسقا دا ماسەلەلەر ءسوز بولدى. پرەزيدەنت اكىمشىلىگى باسشىسىنىڭ ورىنباسارى  عا­بيدوللا ءابدىراحىموۆ «ەلباسى نۇرسۇلتان نازارباەۆ تاۋەلسىزدىك العالى بەرى  مەملەكەتتىك قىزمەت ينستيتۋتىنا, مەملەكەتتىك باسقارۋ جۇيەسىنە ەرەكشە نازار اۋدارىپ كەلەدى», دەي كەلە, 2030, 2050 جىلدارعا دەيىنگى دامۋ ستراتەگيالارى كاسىبي ۇكىمەت قۇرۋدا, مەملەكەتتىك قىزمەت سالاسىن جەتىلدىرۋ ىسىندە ماڭىزدى ءرول اتقاراتىنىن اتاپ ءوتتى. سونداي-اق, ول ەلباسىنىڭ سىندارلى ساياساتىنىڭ ارقاسىندا اتالعان  ماسەلەلەردە كوپتەگەن تىڭ وزگە­رىستەر بولعانىنا توقتالدى.  ءبىز پوستكەڭەستىك ەلدەر ىشىندە العاش بولىپ مەملەكەتتىك قىزمەت تۋرالى زاڭدى, سىبايلاس جەمقورلىققا قارسى زاڭدى قابىلدادىق.  قا­زاقستان جەتىستىكتەرىن بۇگىندە بۇكىل الەم مويىندايدى, دەدى ع.ءابدىراحىموۆ. ال ق.قوجامجاروۆ باستى نازاردى مەريتوكراتيا قاعيداسىن بۇلجىتپاي ورىنداۋ ارقىلى تالانتتاردى باسقارۋ مەن مانساپتىق جوسپارلاۋ سەكىلدى ماسەلەلەرگە اۋدارا كەلىپ, كادرلاردى ىرىكتەۋ مەن ىلگەرىلەتۋدىڭ زاماناۋي تەحنولوگيالارى مەن تەتىكتەرىن ەنگىزۋدىڭ كومەگىمەن مەملەكەتتىك قىزمەتتىڭ مودەلىن جەتىلدىرۋگە بولاتىندىعىن اتاپ كورسەتتى. وڭىرلەردىڭ وكىلدەرى كادرلاردى ىرىكتەۋ مەن جوعارىلاتۋ ماسەلەسى بويىنشا بىرقاتار ۇسىنىستارىن جەتكىزدى, ونىڭ ىشىندە, وبلىستىق جانە اۋداندىق دەڭگەيلەردەگى اۋىستىرۋلار ارقىلى كادر تاپشىلىعىن شەشۋگە بولاتىنىنا قاتىستى ماسەلەلەر قوزعالدى. مەملەكەتتىك قىزمەت سالا­سىنداعى باسقارۋشى وڭىرلىك حابتىڭ باسشىسى ءاليحان بايمەنوۆ دوڭگەلەك ۇستەل بارىسىندا ايتىلاتىن تاقىرىپتاردىڭ مەملەكەتتىك قىزمەتتى جەتىلدىرۋدە ماڭىزدى ەكەندىگىن اتاپ ءوتتى. سونداي-اق, ول مازمۇنى وتە كۇردەلى بولىپ تابىلاتىن مەملەكەتتىك قىزمەت ماسەلەسىن  تالقىلاۋدا وسىنداي القالى جيىن ۇيىمداستىرۋ سالانى جەتىلدىرۋگە وڭ ىقپالىن تيگىزەتىنى ءسوزسىز ەكەنىن اتاپ كورسەتتى. ەلىمىز مەملەكەتتىك قىزمەتتى جەتىلدىرۋ باعىتىندا ايماقتا كوشباسشى سانالادى. كورشى ەلدەر ءبىزدىڭ مودەلىمىز بەن زاڭدارىمىزدى زەردەلەۋدە جانە ءوز شەشىمدەرىندە پايدالانۋدا. دەگەنمەن, ءومىر بۇل سالانى ودان ءارى جەتىلدىرۋدى قاجەت ەتىپ وتىر, دەي كەلە,  ءا.بايمەنوۆ ەلىمىزدەگى مەملەكەتتىك قىزمەتتىڭ جاڭا مودەلى ەڭ وزىق تاجىريبەگە ساي بولعانىمەن, جاڭا شەشىمدەردى ىزدەۋ دە كەرەكتىگىن كولدەنەڭ تارتتى. پارلامەنت دەپۋتاتتارى ءوز­دەرىنىڭ سوزدەرىندە «ا» باس­قارۋ­شى كورپۋسى كادر رەزەرۆىنىڭ قۇرامىن جاساقتاۋدىڭ تەتىكتەرىن جەتىلدىرۋگە نازار اۋداردى. اتالعان ماسەلەگە بايلانىس­تى ناقتى ۇسىنىستار ەنگىزىلدى. بۇدان باسقا, دوڭگەلەك ۇستەلگە قاتىسۋشىلار كونكۋرستىق ىرىكتەۋ ۇدەرىستەرىن ۇمىتكەرلەردىڭ تەك زاڭنامانى بىلگەندىگىمەن عانا ەمەس, سونىمەن قاتار, كاسىبي جانە ىسكەرلىك قىرلارى ارقىلى دا باعالاۋ قاجەتتىگىن اتاپ كورسەتتى. ەلميرا ماتىباەۆا, «ەگەمەن قازاقستان».