زامانى تۋدىرعان بۇل ادامدار تۋرالى كەڭىنەن جازىلماي قالدى. كەي-كەيدە چارلز چاپلين كينولارىنىڭ كەسىندىلەرىن كورگەندە, مەنىڭ ەسىمە وسى «جىندى ابەن» تۋرالى اڭگىمەلەر تۇسەدى. ول كىسى نە ىستەمەگەن دەيسىز عوي؟ شاقپاق قانت ياكي دومالاق كامپيتتى اۋەگە لاقتىرىپ قالادى ەكەن دە, اۋزىمەن قاعىپ الاتىن كورىنەدى. ۇناماعان كىسىدەن وزىپ بارىپ, الدىندا كەلە جاتىپ تۇكىرگەندە, سوڭىنداعىنىڭ بەتىنە تيەتىنى ايتىلادى (سول زاماندا تۇسىرەتىن سوتكانىڭ جوعىن-اي, ءا؟). مۇنداي سايقىمازاقتىعى تۋرالى ۇزىندى-قىسقالى اڭگىمەلەر جەتەرلىك.
تۇرمەدەن دە سول سايقىمازاقتىعىنىڭ ارقاسىندا امان قۇتىلىپ شىققان. تەگىن ادام ساكەنگە سەرىك بولسىن با؟ ساكەننىڭ تامىرى رەتىندە ۇستالعانىمەن, تەرگەۋشىلەرگە جىندى كورىنىپ بوساعان. ۇرىپ-سوعىپ, ازاپتاۋدىڭ نەشە اتاسىن كورسەتكەنىمەن, اباقتىدان بوساتاردا شىقپاي وتىرىپ الىپتى. «جاتسام-تۇرسام يىعىمنان ەكى بىردەي قاراۋىل قويىپ, امان-ساۋلىعىمدى كۇزەتتىرىپ ۇستاپ ەدى. بوستاندىقتا ەندى مەنى كىم كۇزەتەدى؟» دەپ ەڭكىلدەپ جىلاسا كەرەك.
وسىنشاما سايقىمازاق كىسىنىڭ ءىستىڭ ىعىن بىلەتىن سوزگە تاپقىرلىعى تۋرالى دا اڭگىمە جەتەرلىك. ول كەزدە باسقارما, كاسىپوداق باسشىلارىنا كىرىپ, ماسەلەسىن شەشىپ شىعا بەرەدى ەكەن. قار تۇسە باسقارماعا كىرىپ, اڭگىمەسىن ايتىپ, قىلجاقتاپ وتىرسا, بۇيىمتايىن سۇراپتى. «مەندە جالعىز اتتان باسقا نە بار؟» دەپ تايىپ تۇرىپتى. باسقا ءلام دەمەگەن. ەرتەڭىنە قوراسىنا اتىنىڭ قىستىق ءشوبى جەتىپتى. ءبىر كەزدەرى قارشا بوراعانىمەن, بۇگىندەرى ۇمىتىلۋعا اينالعان وسىنشاما كوپ ءسوزدىڭ جالعىز ءتۇيىنى – اقىن عالىم جايلىبايدىڭ «جىندى ابەن» اتتى ولەڭى. بۇل شىعارما تۇلعانىڭ بار بولمىسىن اشىپ قانا قويماي, ونىڭ ومىرىنە قىزىقتىرا تۇسەدى.
«تولقىننىڭ باسىلعان جوق سۇمدىق ءانى,
ول كۇننىڭ اشىلعان جوق شىندىعى ءالى.
جاميعات اڭىز ەتكەن جاڭاارقادا,
«جىندى ابەن»؟
جىندىڭىز نە, سۇڭعىلانى.
كەز ولگەن جۇتاتۇعىن اۋادان «بال»,
زامانداس, وتكەن كۇننەن ساۋال اڭعار.
...مەن سەنىڭ ساۋلىعىڭا كۇماندانام,
ابەندى «جىندى» اتاعان ساۋ ادامدار»
دەيدى اقىن. «جىندى ابەن» تۋرالى ماتەريال جيناپ جۇرگەندەر بار دا شىعار, كىم بىلەدى؟
