فينالعا شىققان انگليا قۇراماسى يسپان فۋتبولشىلارىنا قارسى تارتىستى ويىن ورنەگىن كورسەتتى. 1-تايمدا يسپانيا قۇراماسى دۇركىن-دۇركىن شابۋىلداپ, قىسپاققا العانىمەن, قاقپاشى پيكفورد بىرنەشە سوققىنى تويتارىپ, قۇراماسىن قۇتقاردى. بىراق تايم ارالىعىنداعى ۇزىلىستەن الاڭعا يسپانيا ۇلتتىق قۇراماسى تىڭ كۇشپەن شىققانداي اسەر قالدىردى. 47-مينۋتتا نيكو ۋيليامستىڭ گولىنان العا ۇزاپ شىققان قارسىلاستارىن قانشا تىقسىرعانىمەن, اعىلشىن فۋتبولشىلارىنىڭ شابۋىلى ناتيجەلى بولعان جوق. تەك 73-مينۋتتا كوۋل پالمەر ەنشىسىنە گول جازىپ, ەسەپتى تەڭەستىردى. جەڭىس گولىن 86-مينۋتتا ميكەل ويارسابال سوقتى. 90-مينۋتتاعى ستاندارتتى شابۋىلدا اعىلشىندار تارازى باسىن تەڭەستىرەتىن تاماشا مۇمكىندىك العان. گەحي ماركتىڭ باسپەن سۇزە سوققانى ءسوزسىز يسپانيا قۇراماسىنىڭ قاقپاسىندا تۋلايتىن ەدى, ەگەر جارتىلاي قورعاۋشى داني ولمو بولماعاندا.
1964 جىلى وتكەن ەۋروپا چەمپيوناتىنىڭ فينالدىق الامانىندا سسسر قۇراماسىن 2:1 ەسەبىمەن جەڭىپ, قۇرلىقتىڭ ۇزدىگى اتانعان يسپان فۋتبولشىلارى ارادا وتكەن الپىس جىلدا ءتورتىنشى مارتە چەمپيوندىق اتاققا قول جەتكىزىپ وتىر. 2008 جىلى ەۋروپا بىرىنشىلىگىنىڭ فينالدىق تارتىسىندا گەرمانيا قۇراماسىن 0:1 ەسەبىمەن ەڭسەرگەن يسپانيا فۋتبولشىلارى 2012 جىلى دا سول بيىگىنەن تومەندەگەن جوق. ءتىپتى قۇرلىق بايگەسىنىڭ كۋبوگى ءۇشىن فينالدا يتاليا قۇراماسىن 4:0 ەسەبىمەن ەسەڭگىرەتە جەڭگەنى جۇرت ەسىندە. ودان بەرى دە ءبىر مۇشەل ۋاقىت ءوتتى. يسپانيا قۇراماسى ەۋروپا چەمپيوناتىندا توپتان شىققانىمەن, فينالعا جەتپەي ءسۇرىندى. ۇلتتىق قۇرامانىڭ بۇگىنگى بۋىنى ءسوزسىز مىقتى ەكەنىن ايقىن دالەلدەپ بەردى.
1960 جىلدان بەرى ۇيىمداستىرىلاتىن ەۋروپا چەمپيوناتىنىڭ فينالدىق ماتچىندا گول سوققان ەڭ جاس فۋتبولشى پەترو ءاناستازيدىڭ 1968 جىلعى جەتىستىگىن ەشكىم جاڭارتا الماي كەلەدى. 1968 جىلى وتكەن ەۋروپا چەمپيوناتىنىڭ فينالدىق تارتىسىندا يتاليا قۇراماسى يۋگوسلاۆيا فۋتبولشىلارىن 2:0 ەسەبىمەن جەڭدى. ەكىنشى گولدى 31-مينۋتتا سوققان اناستازي سوندا 20 جاستان 64 كۇن اسقان ەدى. انگليا مەن يسپانيا قۇرامالارى اراسىنداعى تارتىستا گول سوققان نيكو ۋيليامس پەن كول پالمەر دە – 22-دەن اسقان فۋتبولشىلار. ەگەر 17 جاسقا تولعان لامين يامال فينالدا گول سوققاندا تاريحي ناتيجە تىركەلەر ەدى.
انگليا ۇلتتىق قۇراماسىنىڭ باس باپكەرى گارەت ساۋتگەيت شاكىرتتەرى ماتچتىڭ اقىرعى مينۋتتارىندا شارشاعانىن ايتتى. «ەكىنشى تايمنىڭ سوڭىندا ءبىزدىڭ ەسەپتى تەڭەستىرەتىن تاماشا مۇمكىندىگىمىز بولدى. جىگىتتەر بارىن سالىپ وينادى, يسپانيا قۇراماسى تالاسسىز تاڭداۋلى ۇجىم ەكەنىن ايگىلەدى. الپىس جىلدان بەرى جالىنان ۇستاتپاي كەلە جاتقان ەۋروپا چەمپيوناتىنىڭ كۋبوگىن قۇشاعىمىزعا قىسار ەدىك جەڭىسكە جەتكەندە», دەدى گ.ساۋتگەيت.
يسپانيا ۇلتتىق قۇراماسىنىڭ ەنشىسىنە ەۋروپا چەمپيوناتىنىڭ كۋبوگىن ءتورتىنشى مارتە بوكتەرگەن باس باپكەر لۋيس دە لا فۋەنتە الامانعا «مەن جاستارعا سەنەمىن» دەپ كەلگەنىن كورسەتتى. بۇل باپكەر 2015 جىلى يسپانيانىڭ 19 جاسقا دەيىنگى جاستار قۇراماسىن باپتاپ, ەۋروپا چەمپيونى اتاندى. فينالدىق تارتىستا رەسەي جاستار قۇراماسىن 2:0 ەسەبىمەن ۇتتى. وسى ماتچتا الاڭعا شىققان رودري كەشەگى ويىندا دا جاسىنداي جارقىلدادى. قاقپانى قورىعان ۋناي سيمون توعىز جىل بۇرىن دە لا فۋەنتەنىڭ قاناتىنىڭ استىندا قوسالقى قۇرامدا وتىردى. 2019 جىلى 21 جاسقا دەيىنگى جاستار اراسىندا وتكەن ەۋروپا چەمپيوناتىنىڭ فينالدىق تارتىسىندا لۋيس دە لا فۋەنتە شاكىرتتەرى گەرمانيا جاستارىن ەڭسەرگەن ەدى. وسى ماتچتا ميكەل ويارسابال, ۋناي سيمون, دانيەل ولمو سىندى ساڭلاقتار ساپتا بولدى.
2022 جىلدىڭ جەلتوقسانىندا يسپانيا ۇلتتىق قۇراماسىنىڭ باس باپكەرى قىزمەتىنە 61 جاستاعى لۋيس دە لا فۋەنتە تاعايىندالدى. مۇنداي لاۋازىمدى قىزمەتتىڭ جاۋاپكەرشىلىگىن ارقالاعانعا دەيىن جاستار قۇراماسىن ەۋروپا چەمپيونى اتاندىرعان ماماننىڭ بىلىكتىلىگى بىردەن بايقالدى. بىلتىر ۋەفا ۇلتتار ليگاسىنىڭ فينالدىق سايىسىندا فۋەنتە باپكەردىڭ شاكىرتتەرى حورۆاتيا قۇراماسىن پەنالتي سەرياسىندا (ەسەپ 4:5) ەڭسەرىپ كەتتى.
جاستار قۇراماسىنىڭ ساپىنان بەرى باۋلىپ كەلە جاتقان شاكىرتتەرى باپكەردىڭ سەنىمىنە سەلكەۋ تۇسىرمەدى. ء«بىرىنشى تايمدا گول سوعىلعان جوق, ءۇزىلىستى اناۋ ايتارلىقتاي اقىلگويلىك تانىتپادىم. تەك ءبىز قاشاندا ءوزىمىزدىڭ تەگەۋرىندى قۇراما ەكەنىمىزدى دالەلدەي الاتىنىمىزعا سەندىردىم, بولدى. مەن بۇل ۇجىمنىڭ جەتىستىگىمەن قاشاندا ماقتانامىن», دەدى لۋيس دە لا فۋەنتە.
يسپانيا قۇراماسى ەۋروپا چەمپيوناتىنىڭ فينالدىق دوداسىن ءتورت رەت جەڭگەن جالعىز ۇجىم اتاندى. گەرمانيا قۇراماسى ءۇش رەت جەڭسە, يتاليا, فرانتسيا قۇرامالارىنىڭ ەنشىسىنە ەۋروپا چەمپيونى دەگەن اتاق ەكى رەت بۇيىردى. انگليا قۇراماسى قاتارىنان ەكىنشى رەت قۇرلىق الامانىنىڭ فينالدىق دوداسىنا جەتكەنىمەن, جولى بولمادى. ولار 2021 جىلى وتكەن ەۋروپا چەمپيوناتىنىڭ فينالدىق تارتىسىندا يتاليا قۇراماسىنا ەسە جىبەردى.
