باتىس قازاقستاندا سايلاۋشىلاردىڭ 40 پايىزدان استامى داۋىس بەردى

ورال. 26 ءساۋىر. پرەزيدەنت سايلاۋى كۇنگى ءساۋىردىڭ اق تاڭىندا باتىسقازاقستاندىقتار ادەتتەگىسىنەن ەرتە وياندى. تاڭعى 6-دان باستاپ كوشەلەردە كادىمگىدەي قيمىل-قوزعالىس باستالىپ كەتتى. بۇل تۋرالى egemen.kz ءتىلشىسى حابارلادى. ءبىز ساعات ءتىلى 7-گە جاقىنداعاندا ەۋرازيا كوشەسى ماڭىنداعى №22 ورتا مەكتەپ عيماراتى جانىنداعى № 486 سايلاۋ ۋچاسكەسىندە تۇرعان ەدىك. ءبىر كەزدە وسى اراعا ءجۇزى جارقىن, كوڭىل-كۇيى كوتەرىڭكى جاس جىگىت تەز ادىمداي باسىپ جاقىندادى. كوزىندە وت-ۇشقىن بار. بۇل جاسى 18-گە تولىپ تۇڭعىش داۋىس بەرۋگە كەلگەن جوعارى وقۋ ورنىنىڭ 1-كۋرس ستۋدەنتى عابدول تىلەكوۆ بولىپ شىقتى. «ءبىز ءومىر ءسۇرىپ جاتقان بۇگىنگى قازاقستاننىڭ الەمدىك قاۋىمداستىق اراسىنداعى ورنى مەن سالماعىنىڭ جوعارىلاپ كەلە جاتقانى جۇرەگىمە جىلىلىق ۇيالاتادى. ءبىز جاستار بۇدان دا كورى جاقسىراق ءومىر ءسۇرۋ دەڭگەيىنە قۇشتارمىز. ءارى ەلىمىزدىڭ ءال-اۋقاتىنىڭ ارتا تۇسۋىنە مۇددەلىمىز. بۇل – ءبىزدىڭ تاڭداۋىمىزعا بايلانىستى. جەكە ءوزىم وسى تاڭداۋدى تەزىرەك داۋى بەرۋ جاشىگىنە ءتۇسىرۋ ءۇشىن ەرتە كەلدىم», - دەيدى ول. داۋىس بەرۋ ۇدەرىسى باستالعان تاڭعى 7 مەن 10 ارالىعىندا وبلىس ورتالىعىنداعى بىرنەشە سايلاۋ ۋچاسكەلەرىندە بولىپ ونداعى جۇمىستىڭ سىيپاتىمەن تانىستىق. سوندا ءبىر بايقاعانىمىز ءار ۋچاسكەنى حالىققا قىزمەت كورسەتۋ ورتالىقتارىمەن بايلانىستىراتىن تەلەفوندار ورناتىلىپتى. سونىمەن بىرگە ەرىكتىلەر داۋىس بەرۋگە كەلگەن جاسى ۇلعايعان ادامدار مەن مۇگەدەك جاندارعا كومەك بەرىپ جاتقاندارىنا كۋا بولدىق. ولاردىڭ كەيبىرى وزدەرىنىڭ اتى-ءجونىن تىزىمنەن تابا الماسا, وعان دا اقىل-كەڭەستەر بەرىلۋدە. داعدارىپ جۇرگەندەردىڭ قاي سايلاۋ ۋچاسكەسىنە جاتاتىنى انىقتالۋدا. حالىققا قىزمەت كورسەتۋ ورتالىعىمەن بايلانىستىڭ قاجەتتىلىگى دە وسىندا بولىپ شىقتى. ياعني قانداي جاعدايدا دا ەشكىم داۋىس بەرمەي كەرى كەتىپ جاتقان جوق. ساعات ءتىلى كۇندىزگى 12-ءنى سوققان كەزدە ورال قالاسىنداعى دوستىق داڭعىلى بويىندا ورنالاسقان باتىس قازاقستان وبلىستىق سايلاۋ كوميسسياسىنىڭ عيماراتىنا كەلدىك. مۇندا دا قىزۋ قيمىل-قوزعالىس. زال ورتاسىنا تابلو-تەلەۆيزور قويىلىپتى. باق وكىلدەرى ودان ءار ەكى ساعات سايىن جينالاتىن داۋىس بەرۋ دەرەكتەرىمەن تانىسا الادى ەكەن. ءدال وسى ساتتە ءبىز ساعات 12-00 گە دەيىن وبلىس بويىنشا داۋىس بەرۋگە تىركەلگەن 404 465 سايلاۋشىنىڭ 40 پايىزدان استامى ءوز تاڭداۋلارىن جاساپ ۇلگەرگەنىن كوردىك. بۇل 164 455 سايلاۋشى پرەزيدەنت سايلاۋى كۇنى وسى ۋاقىتقا دەيىن ازاماتتىق بەلسەندىلىك تانىتقانىن كورسەتەدى. ال وبلىستاعى شىڭعىرلاۋ اقجايىق جانە تەرەكتى اۋداندارى سايلاۋشىلارىنىڭ بەلسەندىلىگى بۇدان دا جوعارى تۇردى. بۇل وڭىرلەردە  داۋىس بەرۋشىلەردىڭ پايىزدىق كورسەتكىشى سول ساتتە 50-48-ءدى قۇرادى. تەمىر قۇسايىن. دەرەك, سۋرەت: egemen.kz