فوتو: dizainmix.ru
تاراز قالاسىندا جاڭادان قۇرىلعان سۋ شارۋاشىلىعى جانە يرريگاتسيا ۋنيۆەرسيتەتى ءوز جۇمىسىن باستايدى.
«اتالعان مىندەتتى ىسكە اسىرۋ شەڭبەرىندە ۇكىمەت «م.ح. دۋلاتي اتىنداعى تاراز وڭىرلىك ۋنيۆەرسيتەتى» كوممەرتسيالىق ەمەس اكتسيونەرلىك قوعامىن قايتا قۇرۋ جانە ونىڭ نەگىزىندە ەكى جوو — «م.ح. دۋلاتي اتىنداعى تاراز ۋنيۆەرسيتەتى» كوممەرتسيالىق ەمەس اكتسيونەرلىك قوعامىن («تارۋ» كەاق) جانە «قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتى» كوممەرتسيالىق ەمەس اكتسيونەرلىك قوعامىن («قازۇسشيۋ» كەاق) قۇرۋ تۋرالى شەشىم قابىلدادى. وقۋ ورىندارى ولاردىڭ جارعىلىق كاپيتالدارىنا مەملەكەتتىڭ ءجۇز پايىز قاتىسۋى ارقىلى قۇرىلدى», دەلىنگەن ۇكىمەت حابارلاماسىندا.
جوو 2024 جىلدىڭ 1 قىركۇيەگىنەن باستاپ تالاپكەرلەردى قابىلدايدى دەپ جوسپارلانىپ وتىر.
قازۇسشيۋ-دا «سۋ شارۋاشىلىعى جانە مەليوراتسيا», «گەودەزيا جانە كارتوگرافيا», «سۋ شارۋاشىلىعىنداعى گيدروتەحنيكالىق قۇرىلىس», «سۋمەن جابدىقتاۋدىڭ ينجەنەرلىك جۇيەلەرى», «سۋ شارۋاشىلىعىنداعى يننوۆاتسيالىق تەحنولوگيالار» اتتى جاڭا ءبىلىم بەرۋ باعدارلامالارى ەنگىزىلەدى.
اتالعان ۋنيۆەرسيتەتكە 2024-2025 جىلدارعا 245 ورىنعا ارنالعان مەملەكەتتىك ءبىلىم بەرۋ تاپسىرىسىنىڭ نىسانالى كۆوتاسى (باكالاۆرياتقا – 210, ماگيستراتۋراعا – 20, دوكتورانتۋراعا – 15) ءبولىندى.
ءبىلىم بەرۋ تسيكلىندەگى جالپى كونتينگەنت سانى 4 000 ءبىلىم الۋشىنى قۇرايدى.
