«ازاماتتىق پوزيتسيامدى ايقىنداعان سايلاۋ»

كوكشەتاۋ. 26 ءساۋىر. اقمولا وبلىسىنىڭ سايلاۋشىلارى ءوز تاڭداۋىن جاساۋدا بەلسەندىلىك تانىتۋدا. بيىل العاش رەت داۋىس بەرىپ وتىرعان شوقان ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ 1-كۋرس ستۋدەنتى ءامىرحان تاشەنوۆ بۇل كۇننىڭ ءوزى ءۇشىن ەرەكشە ەستە قالاتىنىن ايتتى. بۇل تۋرالى egemen.kz حابارلادى. «بۇگىن مەن ءۇشىن ەرەكشە قۋانىشتى كۇن. بيىل تۇڭعىش رەت سايلاۋعا قاتىسىپ, ءوزىمنىڭ №16 ۋچاسكەمدە داۋىس بەردىم. ەلىمنىڭ ازاماتى رەتىندە ۇلكەن جاۋاپكەرشىلىك ارقالاعانىما ەرەكشە قۋاندىم. سەبەبى, ومىرىمدەگى ايتۋلى وقيعا – قازاقستان رەسپۋبليكاسىنىڭ پرەزيدەنتىن سايلاۋعا قاتىستىم», – دەيدى ءامىرحان. سونداي-اق, ول سايلاۋ ۋچاسكەسىنە كەلگەن كەزدە كوڭىلى تولقىعانىن دا ايتتى. «ۋچاسكەگە تولعانىسپەن اياق باستىم. ايتسە دە, كوميسسيا توراعاسى مەن حاتشىسى تۇڭعىش رەت داۋىس بەرۋشى رەتىندە ماعان جىلىشىراي تانىتتى. ءتىپتى ەستەلىك سىيلىق تارتۋ ەتتى. بۇل ءبىزدىڭ قوعامنىڭ ءوزىنىڭ جاس مۇشەسىنە قۇرمەتى مەن سەنىمىن ايعاقتايدى. مۇنداي ءىلتيپات مەنىڭ جىگەرىمدى تاسىتتى. اباي اتامىز وسيەتتەگەندەي, ەلىمنىڭ ءبىر كىرپىشى بولىپ قالانۋىم, ونىڭ بولاشاعىنا ادال قىزمەت ەتىپ, وتانىمنىڭ وركەندەۋى جولىندا ايانباي ەڭبەك ەتۋىم قاجەتتىگىن ءتۇسىندىم», – دەيدى ازات ەلدىڭ ايبىندى ۇلانى. باقبەرگەن امالبەك. دەرەك, سۋرەت: egemen.kz.