- پاۆلودار قالاسىنىڭ №2 سوتى كوشى-قون پوليتسياسىنىڭ قىزمەتكەرى ك.-عا قاتىستى پارا بەرۋشىنىڭ پايداسىنا زاڭسىز ارەكەتتەر جاساعانى ءۇشىن پارا الۋ فاكتىسى بويىنشا (قك-ءنىڭ 366-بابىنىڭ 2-بولىگى) قىلمىستىق ءىستى قارادى, دەپ مالىمدەدى پاۆلودار وبلىستىق سوتى.
ك. 2022 جىلدىڭ 31 تامىزى مەن 2023 جىلدىڭ 23 ءساۋىرى ارالىعىندا شەتەل ازاماتى ە.-دەن كوشى-قون زاڭناماسىنا سايكەس اكىمشىلىك جاۋاپكەرشىلىككە تارتپاعانى ءارى قازاقستاندا ۋاقىتشا تۇرۋعا رۇقسات بەرگەنى ءۇشىن جالپى سوماسى 100 000 تەڭگەنى پارا رەتىندە العان. سوتتالۋشىنىڭ كىناسى كۋالاردىڭ ايعاقتارىمەن, قۇجاتتىق دالەلدەمەلەرمەن جانە ساراپتامالىق قورىتىندىلارمەن دالەلدەندى, – دەپ تولىقتىردى سوت.
پارا العانى ءۇشىن (قك-ءتىڭ 366-بابىنىڭ 2-بولىگى) زاڭ بويىنشا نەگىزگى جازا رەتىندە ايىپپۇل نەمەسە 3 جىلدان 7 جىلعا دەيىن باس بوستاندىعىنان ايىرۋ جازاسى كوزدەلگەن. قىلمىس جاساۋ ۇزاق مەرزىمدى, جۇيەلى تۇردە بولعانىن, ءىستىڭ ءمان-جايىن ءارى ك.-نىڭ جەكە باسىن ەسكەرە وتىرىپ, سوت وعان نەعۇرلىم جەڭىل جازا, ياعني ايىپپۇلدى تاعايىنداۋعا نەگىز كورمەدى.
«سونىمەن قاتار, سوت كىناسىن تولىق مويىنداۋىن, شىن جۇرەكتەن وكىنۋىن, قىلمىستىق قۇقىق بۇزۋشىلىقتى اشۋعا بەلسەنە كومەكتەسۋىن جانە ونىڭ جاسىن ەسكەرە وتىرىپ, ك.-عا تومەن مەرزىم - 3 جىلعا باس بوستاندىعىنان ايىرۋ جازاسىن تاعايىندادى. سونداي-اق ك., «پوليتسيا اعا لەيتەنانتى» ارناۋلى اتاعىنان ءارى ءومىر بويىنا مەملەكەتتىك قىزمەتتە لاۋازىمداردى اتقارۋ قۇقىعىنان ايىرىلدى. ۇكىم زاڭدى كۇشىنە ەنگەن جوق», – دەلىنگەن اقپاراتتا.
